Audi RS7 តម្លៃ ២០ ម៉ឺនដុល្លារ ជាឡានការពារគ្រាប់ល្បឿនលឿនជាងគេក្នុងលោក

2019-07-11 07:59:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តការពារគ្រាប់ភាគច្រើនមានល្បឿនអតិបរមាមិនខ្លាំងក្លាប៉ុន្មានឡើយ ដោយសារតែម៉ាស៊ីនរថយន្តរងសម្ពាធពីទម្ងន់ដែកដែលពាសលើរថយន្តដើម្បីការពារគ្រាប់កាំភ្លើង។ ប៉ុន្តែក្រុមហ៊ុន AddArmor ដែលជំនាញខាងកែច្នៃរថយន្ត បានបង្ហាញចេញរថយន្ត Audi RS7 ស៊េរីពិសេសមួយ អះអាងថាជារថយន្តការពារគ្រាប់ល្បឿនលឿនជាងគេក្នុងលោក។

រថយន្ត Audi RS7 ស៊េរីពិសេសមានបំពាក់ដោយតួខ្លួនប្រភេទប៉ូលីកាបូណាត និងកញ្ចក់ការពារគ្រាប់មានក្រាលដោយប៉ូលីកាបូណាត ដែលក្រុមហ៊ុនអះអាងថាមានភាពរឹងមាំជាងដែកការពារគ្រាប់ ១០ ដង ហើយមានទម្ងន់ស្រាលជាង ៦០%។ វាអាចផ្ដល់សមត្ថភាពការពារគ្រាប់កម្រិត B4 ដោយថែមទម្ងន់ដល់រថយន្តមិនដល់ ១០០ គីឡូក្រាមឡើយ។

ម៉ាស៊ីនរថយន្តបានកែច្នៃឲ្យខ្លាំងជាងប្រភេទធម្មតា ដោយប្រើម៉ាស៊ីន APR ចំណុះ ៤,០ លីត្រ ប្រភេទ Twin-Turbo មាន ៨ ស៊ីឡាំង ផលិតកម្លាំងបាន ៧៦០ សេះ អាចបើកបរដល់ល្បឿន ៣២០ គ.ម/ម៉ ហើយបង្កើនសន្ទុះពី ០ ដល់ ៩៦ គ.ម/ម៉ ក្នុងពេលតែ ២,៩ វិនាទី។

ក្រុមហ៊ុន AddArmor ក៏អាចដំឡើងនូវឧបករណ៍មួយចំនួនដូចជាភ្លើងបាញ់ឲ្យព្រាលភ្នែក និងកាំភ្លើងយន្តជាដើម ហើយអាចដំឡើងក្បាំងខាងមុខដើម្បីអាចឲ្យរថយន្តបើកទម្លុះជញ្ជាំងបានផងដែរ។ គួរដឹងថា Audi RS7 ពិសេសនេះមានតម្លៃចាប់ពី ២០៥ ០០០ ដុល្លារឡើងទៅ៕