Apple នឹងសាកផលិត ឧបករណ៍ដែលកំពុងលក់ដាច់ខ្លាំង នៅរោងចក្រវៀតណាម

2019-07-18 02:05:51
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple នឹងចាប់ផ្ដើមការសាកល្បងផលិត AirPods នៅរោងចក្រវៀតណាម ដែលវាជាផលិតផលកំពុងលក់ដាច់ខ្លាំងមួយ ហើយស្របពេលដែលក្រុមហ៊ុនកំពុងពន្លឿនផែនការរើសង្វាក់ផលិតកម្មខ្លះៗចេញពីប្រទេសចិន។ នេះបើតាមការចុះផ្សាយរបស់ Nikkei Asian។

Goertek ដែលជារោងចក្រដៃគូសំខាន់មួយរបស់ Apple នឹងចាប់ផ្ដើមសាកល្បងការផលិតនៅអំឡុងត្រីមាសទី ៤ ឆ្នាំ ២០១៩ នេះ ដែលនឹងផលិត AirPods ជំនាន់ថ្មី នៅរោងចក្រភាគខាងជើងប្រទេសវៀតណាម។ ប្រភពចំនួនពីរដែលបានដឹងគម្រោងនេះ បានប្រាប់ដូច្នេះ។

នេះនឹងជាការផលិត AirPods លើកដំបូងនៅក្រៅទឹកដីប្រទេសចិន ដែលជាប្រទេសមានសេដ្ឋកិច្ចធំជាងគេលើលោកលំដាប់លេខ ២។ AirPods ជាផលិតផលលក់ដាច់ខ្លាំងបំផុតមួយ ដែលកាលពីឆ្នាំមុនអាចលក់ចេញបាន ៣៥ លានគ្រឿង ធៀបនឹងឆ្នាំ ២០១៧ លក់បាន ២០ លានគ្រឿង។

Apple បានសុំឲ្យដៃគូផ្គត់ផ្គង់គ្រឿងបន្លាស់ ឲ្យជួយជ្រោមជ្រែងដល់ការខិតខំរបស់ Goertek ត្បិតថាជាការផលិតទំហំតូចមួយមែន។

អ្នកវិភាគបានលើកឡើងថា ក្រុមហ៊ុនបច្ចេកវិទ្យាជាច្រើនកំពុងរើទីតាំងផលិតមកវៀតណាម ឬបង្កើនចំនួនផលិតនៅវៀតណាម ដើម្បីជៀសពីការជាប់ពន្ធ (ពេលនាំទំនិញទៅអាមេរិក) ខណៈដែលចិនកំពុងមានសង្គ្រាមពាណិជ្ជកម្មជាមួយអាមេរិក។ ហើយវៀតណាមមានសង្វាក់ផលិតកម្មពេញលេញ បើប្រៀបធៀបប្រទេសអាស៊ីអាគ្នេយ៍ដទៃ។ យ៉ាងណាក្ដី គ្រប់គ្នាកំពុងបារម្ភថាវៀតណាមអាចផ្ទុះឡើងខ្លាំង ហើយអាចនឹងប្រឈមមុខនឹងការខ្វះខាតកម្លាំងពលកម្ម និងការកើនឡើងនៃការចំណាយលើការផលិត៕

ចុចអាន៖

ប្រភព៖ Asia.Nikkei ប្រែសម្រួល៖ សុខហេង