ជើងឯករង Fortnite ប្រាក់រង្វាន់ជាង ១ លានដុល្លារ ធ្លាប់ត្រូវម្តាយទាញ Xbox គ្រវែងចោល

2019-08-01 01:34:49
ចំនួនមតិ 0 | ចំនួនចែករំលែក 0

ចន្លោះមិនឃើញ

Jaden Ashman ដែលមានរហ័សនាម 'Wolfiez' ជាបេក្ខជនមួយរូបបានឈ្នះតំណែងជើងឯករងនូវប្រាក់រង្វាន់ ១ ១២៥ ០០០ ដុល្លារ នៅឯព្រឹត្តិការណ៍ប្រកួតហ្គេម Fortnite World Cup។

ផ្តើមចេះលេងហ្គេមនៅវ័យ ៦ ឆ្នាំ មកទល់បច្ចុប្បន្នគេមានវ័យ ១៥ ឆ្នាំហើយ ប៉ុន្តែទម្រាំជោគជ័យក្នុងវិស័យហ្គេមអាជីពក្មេងប្រុសរស់នៅទីក្រុងឡុងដុង ប្រទេសអង់គ្លេសបានឆ្លងកាត់ផលលំបាកជាច្រើន។ ម្តាយរបស់ Jaden បានទម្លាយថានៅប៉ុន្មានឆ្នាំចុងក្រោយនេះ អ្នកស្រីបានព្យាយាមហាមឃាត់កូនឲ្យជៀសឆ្ងាយពីការលេងហ្គេម ដើម្បីមានពេលវេលាគ្រប់គ្រាន់ផ្តោតលើការសិក្សា។

ប្រាប់ BBC អ្នកស្រី Lisa Dallman និយាយថា៖ "ខ្ញុំធ្លាប់បានហាមឃាត់កូនប្រុសខ្ញុំមិនឲ្យលេងហ្គេម រហូតធ្លាប់ទាំងគ្រវែង Xbox ចោល ខូចខាតយ៉ាងដំណំថែមទៀតផង"។ សួរនាំដល់ការប្រើប្រាស់ប្រាក់រង្វាន់ដ៏ច្រើនសម្បើមនេះ អ្នកស្រីសង្កត់ធ្ងន់៖ "ខ្ញុំមិនទាន់មានគម្រោងច្បាស់លាស់នៅឡើយ"។

យ៉ាងណាមិញតាមការគិតរបស់សាមីខ្លួនផ្ទាល់ Jaden ធ្លាប់និយាយថានឹងទិញផ្ទះថ្មីជូនម្តាយ ហើយសេសសល់ប្រាក់ប៉ុន្មានយកទៅសម្រេចក្តីស្រមៃនាថ្ងៃអនាគតរបស់ខ្លួនឯង។

បញ្ជាក់ថាព្រឹត្តិការណ៍ Fortnite World Cup បានឆ្លងកាត់ជើងខ្លាំង ១០០ នាក់មកពី ៣០ ប្រទេសចូលរួម ដោយអ្នកទាំងនោះក៏បានជម្រុះចេញពីអ្នកលេងឯទៀតប្រមាណជាង ៤០ លាននាក់ទូទាំងសកលលោក។