មង្គលការ ខ្ញុង ទាំងមូល ប្រិយមិត្តបែរជាសរសើរកូនកំដរខាងប្រុសទាំង៣ទៅវិញ

2019-08-09 09:34:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងក្នុងក្រុមនាយ ពែកមី គឺអ្នកនាង ស្រេង សុកាន់ដា ហៅ ខ្ញុង បានចូលរោងការតាមប្រពៃណីជាមួយលោក អ៊ុំ ក្សត្រា ហៅ កៃដ នាថ្ងៃម្សិលមិញ ក្រោមការចូលរួមជាសាក្សីរបស់ភ្ញៀវកិត្តិយសជាច្រើន។ ប៉ុន្តែនៅក្នុងនោះ ក្រៅពីចំណាប់អារម្មណ៍លើកូនកំលោះ កូនក្រមុំ ទស្សនិកជន ក៏ចាប់អារម្មណ៍ខ្លាំងលើកូនកំដរទាំង៣របស់កូនកំលោះដែរ។

កូនកំដរទាំង៣របស់កូនកំលោះ គឺមានឧកញ៉ា ទុំ សារុត ហៅឃ្លោក ដោយឡែក២នាក់ទៀត មិនត្រូវបានគេដឹងឈ្មោះទេ ប៉ុន្តែប្រភពម្នាក់ដែលស្និទ្ធនឹងកូនកំលោះក្រមុំទាំងពីរ បានប្រាប់ឲ្យដឹងថា ពួកគេទាំងពីរសុទ្ធជាមិត្តសំឡាញ់របស់កូនកំលោះ ពោលគឺជាមិត្តតាំងពីនៅសិក្សានៅសាលាមួយនាខេត្តកំពង់ស្ពឺ។ ចំណុចទាក់ចិត្តចេញពីក្រុមកូនកំដរទាំង៣នាក់នេះ គឺថា អ្នកទាំងបី ហាក់មានវ័យច្រើនរៀងៗខ្លួន ពិសេសបំផុត គឺត្រង់ក្បាល អត់សក់ដូចគ្នាតែម្ដង។

បែបនេះហើយ ប្រិយមិត្តមួយចំនួន បានទាំងធ្លោយបែបកំប្លែងមាត់ថា "កូនកំដររបស់កូនកំលោះពិតជា Cute អស់ទាស់មែន។ ចំពោះមូលហេតុ នៃការជ្រើសរើសអ្នកកំដរសុទ្ធតែអត់សក់នេះ តាមប្រភពគឺថា ក៏ដោយសារ កូនកំលោះនាយ កៃដ ក៏ខ្សត់សក់សិតដូចគ្នាដែរ។

ដូច្នេះហើយ ទើបកូនកំលោះរើសរកអ្នកកំដរ ដែលមានភិនភាគសក់ក្បាលដូចគ្នា ហើយនេះក៏ទំនងជាមូលហេតុ ដែលឧកញ៉ាឃ្លោក ត្រូវជ្រើសរើសដូចគ្នា បើទោះអតីតតារាកំប្លែងក្នុងក្រុមនាយ កុយ រូបនេះ មានវ័យច្រើនជាងកូនកំលោះឆ្ងាយក៏ដោយ។ “ចំណុចមួយទៀត តាមខ្ញុំស្មាន ក៏ប្រហែលគេ(កូនកំលោះ) ចង់ឲ្យប្លែកដែរមើលទៅ"។ ប្រភពបន្ថែម។

ខ្ញុង និងនាយ កៃដ បានគ្នាជាប្ដីប្រពន្ធ តាំងពីឆ្នាំ ២០១៧ ក្រោយពីពួកគេបានដាច់ស្រេចជាមួយស្វាមី និងភរិយារៀងខ្លួន។ កាលណោះ ពួកគេបានសែនព្រេននៅមុខចាស់ៗ និងឲ្យជីដូនជីតាដឹងលឺនៅស្រុកកំណើតរួចរាល់ ទើបរួមរស់ជាមួយគ្នា។ ប៉ុន្តែពួកគេបានសច្ចាថា នឹងរើសរកវេលាល្អ វេលាជ័យដើម្បីរៀបការតាមប្រពៃណីដើម្បីឲ្យពេញមុខពេញមាត់ក្រុមគ្រួសារទាំងសងខាង។

ហើយជាក់ស្ដែង ក្រោយពីតស៊ូជាមួយគ្នាជាង២ឆ្នាំ កាត់ព្យុះកាត់ភ្លៀង ពួកគេបានរើសថ្ងៃជ័យនាថ្ងៃម្សិលមិញត្រូវនឹងថ្ងៃទី ០៨ សីហា ២០១៩។ ពិធីមង្គលពួកគេប្រព្រឹត្តទៅនៅនឹងផ្ទះខាងស្រីនៅក្នុងភូមិសាស្ត្រភូមិដូង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ៕