ឡូយបាត់! ប្រុសសង្ហា នឹងតំណាងកម្ពុជាស្លៀកឈុតនាគរាជទៅប្រកួតនៅភូមា

2019-08-10 04:44:01
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមព័ត៌មាន អតីត Freshie លោក ហ៊ី ប៊ុនថា នឹងតំណាងឱ្យប្រទេសកម្ពុជាចូលរួមព្រឹត្តិការណ៍ Mister Tourism and Culture Universe 2019 នៅប្រទេស មីយ៉ាន់ម៉ា នាពេលខាងមុខនេះ។

កម្មវិធីនឹងចាប់ផ្ដើមនៅថ្ងៃទី ២២ខែសីហា នាប្រទេសមីយ៉ាន់ម៉ា ដោយលោកគ្រោងនឹងបង្ហាញឈុតនាគរាជដែលច្នៃយ៉ាងផ្ចិតផ្ចង់ពីអ្នកច្នៃម៉ូដខ្មែរអស់ទឹកប្រាក់ប្រមាណ ៦ពាន់ដុល្លារ ទៅកាន់ពិភពលោកតាមរយៈព្រឹត្តិការណ៍។

ដូច្នេះហើយ លោកលើកឡើងថា លោកមានមោទកភាពណាស់ជាមួយឱកាសនេះ គឺព្រឹត្តិការណ៍ដ៏ធំមួយដែលមានប្រទេសជាង ៣១ជុំវិញពិភពលោកចូលរួមប្រកួតប្រជែង។ ”វាជាក្ដីសមៃរបស់ខ្ញុំយូរមកហើយ ខ្ញុំពិតជាមានភាពរីករាយ និងមោទនភាពសម្រាប់អ្វីដែលខ្ញុំបានប្រឹងប្រែងកន្លងមក”។ ប៊ុនថា ថ្លែង។

ក្រៅតែពីបង្ហាញឈុតសំលៀកបំពាក់នាគរាជច្នៃដោយកូនខ្មែរ អតីត Frshie រូបនេះ ក៏ត្រៀមបង្ហាញក្បាច់គុនល្បុក្កតោរបស់ខ្មែរទៅបង្ហាញព្រឹត្តិការណ៍នេះផងដែរ ដោយបច្ចុប្បន្នលោកបាន និងកំពុងហ្វឹកហាត់យ៉ាងយកចិត្តទុកដាក់ដើម្បីបង្ហាញមុខមាត់សិល្បៈខ្មែរលើឆាកអន្តរជាតិ។

ការប្រកួតកម្មវិធីខាងលើនេះ ប្រមូលផ្ដុំដោយបេក្ខភាពតំណាងប្រទេសរៀងៗខ្លួន ដែលសុទ្ធអ្នកមានសមត្ថភាព និងស្រស់សង្ហារៀងៗខ្លួន។ បែបនេះហើយ ប៊ុនថា បញ្ជាក់ថា មិនទាន់ហ៊ានរំពឹងខ្ពស់ពេកនោះទេ ប៉ុន្តែថា លោក បានប្ដេជ្ញាចិត្តថានឹងប្រឹងប្រែងឱ្យអស់ពីសមត្ថភាពក្នុងព្រឹត្តិការណ៍នេះ ហើយបើទោះជាលទ្ធផលចេញមកបែបណាក៏ដោយ ក៏លោកទទួលយកដែរ។

អតីតហ្វ្រេស៊ី ក៏ស្នើឱ្យទស្សនិកជនជួយគាំទ្រសម្រាប់ការចូលរួមរបស់ខ្លួនក្នុងព្រឹត្តិការណ៍នេះផងដែរ។ Mister Tourism and Culture Universe ជាកម្មវិធីប្រកួតប្រជែងតារាបង្ហាញម៉ូដលំដាប់អន្តរជាតិមួយដ៏ធំ។ កម្មវិធីនេះ គឺមានតារាបង្ហាញម៉ូដមកពីប្រទេសជុំវិញពិភពលោក៕

អត្ថបទ៖ ទារិកា