Jack Ma ៖ "ល្អណាស់ដែលមនុស្សចេះស្លាប់"

2019-08-30 08:26:50
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Jack Ma ស្ថាបនិកក្រុមហ៊ុនលក់ទំនិញអនឡាញ Alibaba និងលោក Elon Musk សហស្ថាបនិកក្រុមហ៊ុនបច្ចេកវិទ្យា Tesla និង SpaceX បានជជែកគ្នាលើឆាកសន្និសីទស្ដីពី AI កាលពីថ្ងៃទី ២៩ សីហាម្សិលមិញនៅទីក្រុងសៀងហៃ។

ក្នុងជំនួបដ៏កម្រនេះ បុគ្គលដែលមានចក្ខុវិស័យវែងឆ្ងាយទាំងពីររូបបានលើកឡើងអំពីប្រធានបទសំខាន់ៗជាច្រើនទាក់ទងនឹង AI (Artificial Intelligence) ដែល AI នេះបានធ្វើឲ្យអ្នកវិទ្យាសាស្ត្រមានការព្រួយបារម្ភ។ ជាពិសេសលោក Stephen Hawking ដែលកាលនៅរស់លោកធ្លាប់ព្រមានថា AI នឹងអាចធ្វើឲ្យមនុស្សជាតិផុតពូជបាន។

លោក Jack Ma ហាក់បានជំទាស់នឹងការព្រួយបារម្ភនេះដោយនិយាយថា ៖ "កុំព្យូទ័រអាចនឹងឆ្លាត ប៉ុន្តែមនុស្សលោកឆ្លាតជាង។ យើងបានបង្កើតកុំព្យូទ័រ ខ្ញុំមិនធ្លាប់ឃើញកុំព្យូទ័របង្កើតមនុស្សនោះទេ។ ខ្ញុំថា AI អាចជួយឲ្យយើងយល់អំពីមនុស្សបានច្បាស់ជាងមុន។ ខ្ញុំមិនគិតថាវាជាការគំរាមកំហែងនោះទេ"។ មួយឃ្លារបស់ Jack Ma បានធ្វើឲ្យលោក Elon Musk តបវិញថា ៖ "ខ្ញុំមិនដឹងទេ វាដូចពាក្យចុងក្រោយល្បីមួយ”។

ក្នុងជំនួបនេះ ម្ចាស់ក្រុមហ៊ុនបច្ចេកវិទ្យាធំទាំងពីរ បានបង្ហាញមតិប្រឆាំងគ្នាជារឿយៗ ប៉ុន្តែគេក៏ចាប់អារម្មណ៍ថាអ្នកទាំងពីរយល់ស្រប ថាវាជារឿងល្អដែលមនុស្សជាតិមិនមានជីវិតអមត ដោយពីជំនាន់មួយទៅជំនាន់មួយ មានការនាំយកគំនិតថ្មីៗដើម្បីដោះស្រាយបញ្ហាប្រឈមពិភពលោកជួបប្រទះ។

លោក Jack Ma បានលើកឡើងថា ៖ "ល្អណាស់ដែលមនុស្សចេះស្លាប់”។ ចំណែកលោក Elon Musk បានបន្ថែមថា ៖ "វាប្រហែលជាអ៊ីចឹងមែនហើយ”៕

ចុចអាន ៖ នាយករដ្ឋមន្ត្រីម៉ាឡេស៊ី សរសើរឡានវៀតណាម ក្រោយសាកកម្លាំងរួច

ប្រភព៖ Channelnewsasia ប្រែសម្រួល៖ សុខហេង