ក្លឹបចាយលើប្រាក់ខែច្រើនបំផុតធៀបចំណូលនៅ EPL មិនមែនក្រុមកំពូលទាំង៦ទេ

2019-08-30 23:36:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Bolton ស្ទើរតែដល់ទីអវសានទៅហើយកាលពីពេលថ្មីៗនេះ ដោយសារបញ្ហាហិរញ្ញវត្ថុ តែសំណាងល្អក្លឹបដែលមានអាយុប្រមាណ១៤៥ឆ្នាំត្រូវបានសង្គ្រោះទាន់ពេល ក្រោយរកឃើញម្ចាស់ថ្មី។

ទាំង Bolton និង ក្លឹប Bury FC (ក្របខ័ណ្ឌបាល់ទាត់លំដាប់ទី៣នៅអង់គ្លេស) មានបញ្ហាហិរញ្ញវត្ថុ ហើយរឿងចម្បងគឺដោយសារតែចំណាយភាគច្រើនត្រូវបានប្រើប្រាស់ទៅលើប្រាក់ខែ។

តាមគោលការណ៍ UEFA មិនលើកទឹកចិត្តឲ្យក្លឹបបាល់ទាត់ចាយលើប្រាក់ខែកីឡាករ និង បុគ្គលិកលើសពី៧០% នៃចំណូលរបស់ក្លឹបឡើយ។

ប៉ុន្តែកាលពីរដូវកាល ២០១៧/១៨ រឿងដ៏គួរឲ្យភ្ញាក់ផ្អើលនោះគឺក្លឹបមិនសូវមានលុយចំនួន៨នៅ Premier Leauge បានចាយលើប្រាក់ខែលើសពី៧០%នៃខ្ទង់ចំណូល ហើយផ្ទុយទៅវិញ ក្លឹបកំពូលទាំង៦ ចំណាយលើប្រាក់ខែកីឡាករនិងបុគ្គលិករបស់ពួកគេមិនលើសពី៦០%ឡើយ។

បើតាមរបាយការណ៍មួយចេញផ្សាយដោយ Fourfourtwo បានឲ្យដឹងថា Crystal Palace ចាយខ្ជះខ្ជាយជាងគេលើប្រាក់ខែ ពោលគឺ ៧៨% នៃចំណូលសរុប Everton(៧៧%) Bournemouth(៧៦%) Leicester(៧៥%) Southampton(៧៤%) Stoke(៧៤%) West Brom(៧៤%) និង Swansea(៧៤%) គឺជាក្លឹបទាំង៨ចាយសឹងហួសមាឌ។

របាយការណ៍ដដែលបង្ហាញថា Spurs ចេះចាយបានត្បិតត្បៀតជាងគេលើប្រាក់ខែ ដោយប្រើលុយត្រឹម ៣៩% នៃចំណូលសរុបប៉ុណ្ណោះ Man Utd(៥០%) Man City(៥២%) Chelsea(៥៥%) Liverpool(៥៨%) និងArsenal(៦០%)។

ប៉ុន្តែគេមិនអាចបន្ទោសថាក្លឹបតូចៗចាយច្រើនលើប្រាក់ខែបើធៀបនឹងចំណូលរបស់ពួកគេបានទេ ពីព្រោះ ក្លឹបធំៗអាចលក់សិទ្ធផ្សាយបានថ្លៃ មានអ្នកឧបត្ថម្ភច្រើន និង ប្រភពចំណូលក៏ច្រើនផ្នែកជាង បើធៀបនឹងក្លឹបតូចៗ។

ទាំងនេះហើយជាមូលហេតុដែលធ្វើឲ្យក្លឹបដែលទើបឡើងមកលេងនៅ Premier League ត្រូវបង្ខំចិត្តទិញកីឡាករល្អៗ ដែលមានប្រាក់ខែខ្ពស់ៗ យកមកពង្រឹងក្លឹប ដែលពេលខ្លះចំណាយលើប្រាក់ខែតែមួយមុខស្ទើរតែស្មើនឹងចំណូលសរុបរបស់ពួកគេក៏មាន៕

ប្រភព៖ Four Four Two ប្រែសម្រួល៖ សុខ លាងហ៊ត