អាណិតជប៉ុនខ្លោចចិត្ត! ចំនួនអ្នកស្លាប់កើនឡើងដល់១០ ខណៈភ្លៀងធ្លាក់ខ្លាំងនៅប្រទេសជប៉ុន

2019-10-27 01:53:49
ចំនួនមតិ 0 | ចំនួនចែករំលែក 0

ចន្លោះមិនឃើញ

សារព័ត៌មានNHK បានរាយការណ៍ថា ចំនួនអ្នកស្លាប់ដោយសារភ្លៀងធ្លាក់ខ្លាំងដែលបណ្តាលឱ្យមានទឹកជំនន់និងបំណាក់ដីនៅភាគខាងកើតនៃប្រទេសជប៉ុនបានកើនឡើងដល់១០ នាក់នៅថ្ងៃសៅរ៍ទី២៦ខែតុលា ដោយមានមនុស្ស៣ នាក់ទៀតកំពុងបាត់ខ្លួន គឺ២សប្តាហ៍បន្ទាប់តំបន់នេះ បានទទួលរងខ្យល់ព្យុះដ៏ខ្លាំង។

បំណាក់ដីបានកើតឡើងនៅតំបន់ដែលមានទឹកលិច នៅទីក្រុងជីបា និងទីក្រុងហ្វ៊ុយគូស៊ីម៉ា នៅភាគខាងកើតនិងភាគឦសាននៃប្រទេសជប៉ុន ដែលត្រូវបានជន់លិចដោយព្យុះភ្លៀងទី៣ ក្នុងរយៈពេល ៦ សប្តាហ៍មកនេះ។ នៅកន្លែងខ្លះទឹកភ្លៀងធ្លាក់ត្រឹមតែរយៈពេលកន្លះថ្ងៃស្មើនឹងទឹកភ្លៀងធ្លាក់ធម្មតារយៈពេលមួយខែ ដោយសារប្រព័ន្ធសម្ពាធទាប។ ការបញ្ជាជម្លៀសមនុស្សនិងការណែនាំនានាត្រូវបានធ្វើឡើងសម្រាប់តំបន់ភាគខាងជើងដែលរងការវាយប្រហាររួចហើយដោយខ្យល់ព្យុះចំនួន២ចាប់តាំងពីខែមុនមក។

សារព័ត៌មានNHK បានរាយការណ៍ថា មានការបញ្ជាជម្លៀសមនុស្សជាង ៣៩០.០០០ នាក់នៅតំបន់ហ្វុយគូស៊ីម៉ានិងអ្នកស្រុក ៥.០០០ នាក់នៅជីបា។ ភ្នាក់ងារឧតុនិយមជប៉ុនបានចេញការព្រមានអំពីភ្លៀងធ្លាក់ខ្លាំង បំណាក់ដីនិងទឹកជំនន់នៅតំបន់ជាច្រើន ដោយរាប់បញ្ចូលទាំងតំបន់នៅភាគខាងកើតនិងភាគកណ្តាលនៃប្រទេសជប៉ុន។

ជប៉ុន បានទទួលរងខ្យល់ព្យុះហាជីប៊ី ដ៏បំផ្លិចបំផ្លាញកាលពីជិត២សប្តាហ៍កន្លងទៅនេះដោយវាបានសម្លាប់មនុស្ស៧៧នាក់។កាលពីថ្ងៃសុក្រ ភ្លៀងខ្លាំងបានបង្កទឹកជំនន់និងការបាក់ដីនៅកន្លែងជាច្រើនរួមមានទីក្រុងណារីតា ខាងកើតក្រុងតូក្យូ៕