ការរកលុយដោយមិនពឹងលើ Ads របស់ Google កាន់តែល្អទៅហើយ

2019-11-04 07:01:53
ចំនួនមតិ 0 | ចំនួនចែករំលែក 0

ចន្លោះមិនឃើញ

Google នាពេលបច្ចុប្បន្ននេះក្ដោបក្ដាប់ទីផ្សារផ្ទាំងពាណិជ្ជកម្ម (Ads) លើអ៊ីនធឺណិតជាង ៧០% ឯណោះ។ ប៉ុន្តែចំណូលខាងផ្នែកនេះឃើញថាមានការថមថយសន្ទុះនៃកំណើន ដោយសារមានការប្រកួតប្រជែងពី Amazon និងបណ្ដាញសង្គម។

យ៉ាងណាក៏ដោយអាណាចក្ររបស់ Google នឹងមិនងាយដួលនោះឡើយ។ ចំណូលប្រចាំត្រីមាសទី ៣ របស់ Alphabet ដែលជាក្រុមហ៊ុនមេរបស់ Google គឺមានចំនួន ៤០,៥ ពាន់លានដុល្លារ ដែលកើនឡើង ២០% ធៀបនឹងឆ្នាំមុន។

គួរដឹងថាក្រៅពីការផ្សាយពាណិជ្ជកម្ម ក្រុមហ៊ុន Alphabet ក៏មានលក់នូវ Hardware និងសេវាកម្មជាច្រើន ដែលចំណូលផ្នែកនេះត្រូវដាក់បញ្ចូលក្នុង "Other Revenue Sources"។ ចំណូល "Other Revenue Sources"នៅត្រីមាសទី ៣ នេះមានរហូតដល់ ៦,៤៣ ពាន់លានដុល្លារ ដែលស្មើនឹង ១៦% នៃចំណូលសរុប។ ឆ្នាំមុននៅផ្នែកនេះរកចំណូលបាន ៤,៦៤ ពាន់លានដុល្លារ។

នាយកប្រតិបត្តិក្រុមហ៊ុន Google លោក Sundar Pichai និងនាយកផ្នែកហិរញ្ញវត្ថុរបស់ Alphabet អ្នកស្រី Ruth Porat បានលើកឡើងថាចំណូលធំបំផុតនៅក្នុងផ្នែក "Other Revenue Sources" គឺបានមកពីសេវាកម្ម Cloud ផ្ទាល់តែម្ដង៕

ប្រភព៖ VNReview ប្រែសម្រួល៖ សុខហេង