Honor ប្រកាសចេញទូរសព្ទ 5G តម្លៃ ៤៧០ដុល្លារ ប៉ុន្តែមិនច្បាស់រឿងមួយ

2019-11-27 02:07:04
ចំនួនមតិ 0 | ចំនួនចែករំលែក 0

ចន្លោះមិនឃើញ

Honor ដែលជាក្រុមហ៊ុនសាខារបស់ Huawei បានប្រកាសចេញស្មាតហ្វូន V30 និង V30 Pro ជាប្រភេទស្មាតហ្វូនកម្រិតកណ្ដាល ប៉ុន្តែមានលក្ខណៈសម្បត្តិខ្លាំងបំផុត។

V30 និង V30 Pro មានបំពាក់នូវអេក្រង់ LCD ទំហំ ៦,៥៧ អ៊ីញ ដែលអាចបង្ហាញរូបភាពក្នុងកម្រិត Full HD+។ ទ្រនាប់ស្កេនម្រាមដៃគឺនៅផ្នែកចំហៀងដូចជាម៉ូដែល Honor 20 និង Honor 20 Pro ដែរ។ ចំណែកផ្នែកខាងក្រោយមានបំពាក់កាមេរ៉ានៅផ្នែកលើខាងឆ្វេង ដែលផ្ទុកកាមេរ៉ាចំនួន ៣ គ្រាប់។

Honor V30 ទាំងពីរមានបំពាក់នូវកាមេរ៉ាមេកម្រិត ៤០ MP ជា Sensor Sony IMX600 ដែលមានមុខងារ Dual OIS និង Laser AF។ ប៉ុន្តែប្រភេទ Pro មានឡេន F/1.6 ធៀបនឹងប្រភេទធម្មតាមានឡេន F/1.8។ កាមេរ៉ាបន្ទាប់គឺប្រភេទ Telephoto ដែលមានកម្រិត ៨MP អាចធ្វើការ Zoom បែប Optical បានបីដង, មាន Aperture f/2.4 និងមុខងារទប់លំនឹង OIS។

ចំណុចខុសប្លែកធំជាងគេគឺនៅត្រង់កាមេរ៉ា Ultrawide ដែល V30 Pro មានកម្រិត ១២ MP មាន Aperutre f/2.2 ហើយ V30 មានកម្រិត ៨ MP និង Aperture f/2.4។

នៅផ្នែកខាងមុខមានការចោះរន្ធអេក្រង់ដាក់កាមេរ៉ា Selfie ពីរគ្រាប់ដែលកាមេរ៉ាមេមានកម្រិត ៣២ MP មាននូវមុខងារ Super Night សម្រាប់ថតរូបទីងងឹត និងមួយទៀតជា Ultrawide កម្រិត ៨MP អាចថតរូបទំហំ ១០៥ ដឺក្រេ។

ស្មាតហ្វូនទាំងពីរគឺមានបំពាក់នូវឈីប Kirin 990 ដែលទ្រាំទ្រសេវា 5G ដូចគ្នា។ ប្រព័ន្ធប្រតិបត្តិការគឺដើរដោយ Android 10 និង Magic UI 3.0.1 ប៉ុន្តែមិនច្បាស់ថាមាន Google Mobile Service ឬយ៉ាងណានោះទេ។

V30 ទាំងពីរទ្រាំទ្រនឹងការសាកថ្មល្បឿនលឿន Ultrafast កម្លាំង ៤០ វ៉ាត់ ប៉ុន្តែសម្រាប់ V30 Pro មានបច្ចេកវិទ្យាសាកថ្មឥតខ្សែកម្លាំង ២៧ វ៉ាត់។ ទំហំថ្មក៏ខុសគ្នាដែរ ដោយ V30 មានថ្ម ៤២០០ mAh និងប្រភេទ Pro មានថ្ម ៤១០០ mAh។

នៅទីផ្សារប្រទេសចិនកាមេរ៉ាកុម្ម៉ង់ទិញស្មាតហ្វូនទាំងពីរនឹងបើកនៅថ្ងៃទី ៥ ខែធ្នូ ដែលវាមានតម្លៃចាប់ពីប្រមាណ ៤៧០ ដុល្លារសម្រាប់ V30 RAM 6GB/ROM128GB និងប្រភេទ RAM8GB/ROM128GB មានតម្លៃប្រមាណ ៥២៥ ដុល្លារ។ ដោយឡែក V30 Pro RAM 8GB/ROM128GB មានតម្លៃប្រមាណ ៥៥៥ ដុល្លារ និង RAM8GB/ROM256GB តម្លៃប្រមាណ ៦០០ ដុល្លារ៕

ចុចអាន ៖ Huawei Nova 6SE ខ្នងកាត់ iPhone មុខកាត់ Samsung ត្រៀមប្រកាសសប្ដាហ៍ក្រោយ

ប្រភព៖ GSMarena ប្រែសម្រួល៖ សុខហេង