អ្នកជំនាញបកស្រាយហេតុផលដែលការប្រកួតរវាង Ford F-150 និង Cybertruck មិនស្មើភាព

2019-11-28 03:56:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតសមត្ថភាពអូសទាញរវាងភីកអាប់ Ford F-150 និងភីកអាប់អគ្គិសនី Cybertruck របស់ Tesla ត្រូវបានមនុស្សមួយចំនួនយល់ថាវាជាការប្រកួតមិនស្មើភាព។ នៅពេលនេះ Jason Fenske ដែលជាអ្នកជំនាញម្នាក់ខាងផ្នែកយានយន្ត បានបកស្រាយថាការបង្ហាញសមត្ថភាពរបស់ Tesla មិនបានបញ្ជាក់អំពីសមត្ថភាពរបស់ Cybertruck នោះឡើយ។

Jason បានបកស្រាយថាទម្ងន់ស្រាលជាងគឺជាចំណុចខ្សោយរបស់រថយន្តនៅពេលប្រកួតការអូសទាញ។ ជាក់ស្ដែងរថយន្ត F-150 ដំណើរការដោយប្រេងឥន្ធនៈ មានតួខ្លួនផលិតពីអាលុយមីញ៉ូម ហើយវាត្រូវប្រកួតនឹងរថយន្តភីកអាប់អគ្គិសនីមានបំពាក់អាគុយ និងតួខ្លួនធ្វើពីដែកអ៊ីណុក។ គេមិនទាន់ដឹងអំពីទម្ងន់ជាក់លាក់របស់ Cybertruck នៅឡើយទេ ប៉ុន្តែអាចសន្និដ្ឋានបានថាវាមានទម្ងន់ធ្ងន់ជាង Ford F-150។

ត្បិតថាទម្ងន់ដូចគ្នាមែន ប៉ុន្តែច្បាស់ណាស់គឺ Tesla លេងខូច។ រថយន្ត F-150 គេសង្កេតឃើញថាវាអាចវិលតែកង់ក្រោយប៉ុណ្ណោះ ដោយកង់ខាងមុខវិលបញ្ច្រាសទិស ដែលសន្និដ្ឋានថាវាមិនមែនជា Ford F-150 ដែលវិលកង់បួននោះឡើយ។

ដោយគ្មានប្រព័ន្ធបើកបរវិលកង់ទាំងបួន Fenske បញ្ជាក់ថា F-150 កាន់តែថយកម្លាំងថែមទៀត បន្ថែមពីលើការមានទម្ងន់ស្រាល។ មួយទៀតគេឃើញថា Ford F-150 ត្រូវបានអូសឡើងចំណោត ដែលវាជាចំណុចខ្សោយមួយទៀត ដោយសារទម្ងន់របស់ F-150 គឺទ្រាំទ្រដោយកង់ខាងក្រោយ។

ដូចនេះ ការប្រកួតនេះមិនបានបញ្ជាក់អំពីសមត្ថភាពរបស់ Cybertruck នោះទេ ហើយអ្វីដែល Tesla បានបញ្ជាក់គឺថារថយន្តភីកអាប់របស់ខ្លួនមានទម្ងន់ធ្ងន់តែប៉ុណ្ណោះ៕

ប្រភព៖ MSN ប្រែសម្រួល៖ សុខហេង