រឿងពិតគ្រប់រសជាតិពី Hyoyeon សមាជិកក្រមិចក្រមើមជាងគេប្រចាំ SNSD
- 2019-12-11 03:33:57
- ចំនួនមតិ 0 | ចំនួនចែករំលែក 0
រឿងពិតគ្រប់រសជាតិពី Hyoyeon សមាជិកក្រមិចក្រមើមជាងគេប្រចាំ SNSD
ចន្លោះមិនឃើញ
Hyoyeon គឺជាតារាចម្រៀងប្រចាំក្រុមចម្រៀងដ៏ល្បី Girls' Generation ដែលបានចូលក្នុងពិភពសិល្បៈតាំងពីឆ្នាំ ២០០៧។
ប្រឡូកចូលក្នុង K-Pop ជាច្រើនឆ្នាំ Hyoyeon បានសាងស្នាដៃជាច្រើនមិនថារួមជាមួយក្រុម និងការងារទោលឡើយ។ ងាកមកជីវិតឯកជនវិញ តារាស្រីរូបនេះត្រូវបានអ្នកគាំទ្រស្គាល់ច្បាស់ថាជា សមាជិកដែលពូកែរាំជាងគេក្នុងក្រុម ហើយនិយាយពីចរិតវិញ នាងជាមនុស្សរួសរាយ ពូកែលេងសើច និងមើលថែបងប្អូនរួមក្រុមណាស់។ ជាក់ស្ដែងនៅថ្ងៃទី ១៤ ខែធ្នូ ឆ្នាំ ២០១៩នេះនាងនឹងត្រូវមកសម្ដែងនៅប្រទេសកម្ពុជា ប៉ុន្តែក្នុងនាមជា DJ។ ដូចនេះមុនការមកដល់ Sabay សូមបង្ហាញរឿងរ៉ាវពិតមួយចំនួន ពីតារាស្រីរូបនេះ៖
១. Hyoyeon មានឈ្មោះពេញ Kim Hyoyeon កើតនៅថ្ងៃទី ២២ ខែកញ្ញា ឆ្នាំ ១៩៨៩ នៅទីក្រុង Incheon ប្រទេសកូរ៉េខាងត្បូង។ ក្នុងគ្រួសារនាងមានបងប្អូន ២នាក់ នាងជាកូនច្បង និងមានប្អូនប្រុសម្នាក់ឈ្មោះ Kim Min Gu។
២. Hyoyeon ចាប់ផ្ដើមចូលហាត់សិល្បៈនៅក្នុងផលិតកម្ម SM តាំងពីអាយុ ១១ឆ្នាំ។ បើតាមអ្វីដែលនាងធ្លាប់បាននិយាយ តាមពិតទៅពេលនោះម្ដាយនាងនាំកូនទៅក្រុមហ៊ុន SM ក៏ដើម្បីតែជួបក្រុមចម្រៀង H.O.T ប៉ុណ្ណោះ។
៣. Hyoyeon មានក្រវិលចោះចំនួន ១៤កន្លែង ក្នុងនោះមានទាំងនៅលើអណ្ដាតផងដែរ។
៤. សមត្ថភាពរបស់នាងដែលអស្ចារ្យដាច់គេប្រចាំក្រុមគឺ រាំ។ សូម្បីតែមើលវីដេអូរាំប្លែក តែ១ដង ទៅ២ដង ក៏នាងអាចចាំ និងរាំតាមបានត្រូវគ្រប់ចង្វាក់ដែរ។
៥. ពេលមានបញ្ហាផ្ទាល់ខ្លួន នាងតែងលាក់ទុកតែខ្លួនឯង មិនហ៊ាននិយាយប្រាប់អ្នកណាទេ ព្រោះបារម្ភខ្លាចរំខានអារម្មណ៍គេឯង ដូចនេះនាងតែងជំនួសវិញដោយការនិយាយលេងជារឿងកំប្លែង។
៦. ផ្អែកតាមសមាជិករួមក្រុមទាំងអស់ Hyoyeon ត្រូវបានគេលើកថាជាអ្នកដែលពូកែលេងសើចជាងគេ ទីណាមាន Hyoyeon ទីនោះប្រាកដជាមានសំឡេងផ្ទុះសំណើច។
៧. Hyoyeon ជាមនុស្សពូកែពុលឡាន អ៊ីចឹងហើយទើបពេលដែលត្រូវ ជិះឡានរួមគ្នាពេលទៅណាមកណា នាងតែទៅ អង្គុយបាំងមុខ ជាមួយតៃកុងឡាន ដើម្បីចៀសវាងពុលក្អួត។ ៨. Hyoyeon ជាសមាជិក SNSD ដំបូងគេដែលចេញសៀវភៅ Style មានឈ្មោះថា "Hyo Style” ដែលក្នុងសៀវភៅនេះមានបង្ហាញតាំងពីគន្លឹះក្នុងការជ្រើសម៉ូដស្លៀកពាក់ វិធីថែរក្សាសម្រស់ និងបែបបទរស់នៅផ្សេងៗ។
៩. បុរសក្នុងក្ដីស្រម៉ៃរបស់ Hyoyeon គឺជាមនុស្សប្រុសដែលមានត្របកភ្នែក ២ជាន់ មានស្នាមញញឹមចុងមាត់ដ៏ទាក់ទាញ ពិសេសម្នាក់នោះត្រូវតែមានការគិតដូចគ្នានឹងនាង។
១០. បើសិននាងជាប្រុស សមាជិក SNSD ដែលនាងចង់ទាក់ទងគឺ Tiffany, Sunny និងនាងខ្លួនឯង៕