អង្គការសុខភាពពិភពលោក ព្រមានឲ្យប្រុងប្រយ័ត្នខ្ពស់ពីវីរុសឆ្លងកូរ៉ូណាដ៏កាចសាហាវ

2020-01-30 03:19:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានកម្មវិធីបន្ទាន់ផ្នែកសុខភាពរបស់អង្គការសុខភាពពិភពលោក បានប្រកាសឲ្យពិភពលោកទាំងមូលប្រុងប្រយ័ត្នខ្ពស់ដើម្បីទប់ទល់នឹងវីរុសឆ្លងកូរ៉ូណាដែលផ្ទុះឡើងក្នុងទីក្រុង Wuhan ប្រទេសចិនកាលពីពេលថ្មីៗនេះ។

យោងតាមលោក Mike Ryan ឲ្យដឹងថាអង្គការសុខភាពពិភពលោក នឹងបើកកិច្ចប្រជុំនៅថ្ងៃព្រហស្បតិ៍ដើម្បីពិភាក្សាថាតើវីរុសនេះ បង្កើតជាគ្រោះអាសន្នសម្រាប់សុខភាពទូទាំងពិភពលោកឬយ៉ាងណា។ យ៉ាងណាមិញ លោក Mike បានធ្វើការសរសើររដ្ឋាភិបាលចិនដែលបានឆ្លើយតបនឹងការប្រយុទ្ធប្រឆាំងនឹងជំងឺឆ្លង ដោយលើកឡើងថាបញ្ហាប្រឈមពិតជាធំធេងណាស់ ប៉ុន្តែការឆ្លើយតបរបស់ចិនពិតជាសមស្រប។ លើសពីនេះ លោកបានបន្ថែមថាក្រុមអ្នកជំនាញអន្ដរជាតិ កំពុងតែរៀបចំធ្វើដំណើរទៅកាន់ប្រទេសចិនដើម្បីធ្វើការជាមួយអ្នកជំនាញនៅទីនោះ ដើម្បីសិក្សាបន្ថែមពីរបៀបដែលជំងឺនេះឆ្លងពីមនុស្សម្នាក់ទៅម្នាក់ទៀត។

គួរឲ្យដឹងថា ចំនួនអ្នកស្លាប់ដោយសារជំងឺរលាកសួតប្រភេទថ្មី បង្កដោយវីរុសកូរ៉ូណា បានកើនឡើងដល់ ១៧០នាក់ ខណៈអ្នកឆ្លងកើនឡើងជាង ១៧០០ករណីបន្ថែមទៀត ដែលសរុបទៅ គឺមានចំនួន ៧៨១០ ករណីគិតត្រឹមថ្ងៃទី៣០ ខែមករានេះ៕