Peugeot បង្ហាញរូបរាងឡានភីកអាប់ដំបូងរបស់ខ្លួន

2020-02-21 03:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនរថយន្តបារាំង Peugeot បានបង្ហាញចេញរថយន្តភីកអាប់ដំបូងរបស់ខ្លួនជាម៉ូដែល landtrek ដែលនឹងចេញលក់មុនគេនៅអាមេរិកឡាទីន និងអាហ្វ្រិក មុនទៅដល់ទីផ្សារដទៃទៀត។

រថយន្តនេះមានប្រើប្រាស់ការឌីហ្សាញដូចជារថយន្តដទៃទៀតរបស់ Peugeot ដែរ ដោយមានផ្ទាំងប៉ាណាធំនៅផ្នែកខាងមុខ មានឡូហ្គោរូបតោនៅពីលើ មានអំពូលមុខធំ និងជាអំពូលប្រភេទ LED។

រថយន្តភីកអាប់របស់ Peugeot មានជម្រើសជាប្រភេទ ៦ កៅអី (កៅអីបីខាងមុខ និងបីខាងក្រោយ) និងមានជាប្រភេទកៅអី ៥ (២ កៅអីខាងមុខ និង ៣ កៅអីខាងក្រោយ)។ ផ្នែកខាងក្នុងមានចង្កូតរចនាពីរពណ៌, មានអេក្រង់កម្សាន្តទំហំ ១០ អ៊ីញ, មាន Apple CarPlay/Android Auto, មាន Bluetooth, មានរន្ធ USB, មាន Hard Drive ទំហំ ១០GB, ម៉ាស៊ីនត្រជាក់ពីរតំបន់ និងចំណុចពិសេសជាច្រើនទៀត។

សម្រាប់ផ្នែកសុវត្ថិភាពវិញ រថយន្ត Peugeot Landtrek គឺមានមុខងារ Lane Departure Warning, កាមេរ៉ាអាចមើលជុំវិញ ៣៦០ ដឺក្រេ, មុខងារ Hill Descent Control, មានមុខងារ ASR និងមុខងារ Trailer Swing Control ផងដែរ។

ជម្រើសម៉ាស៊ីនមានពីរគឺម៉ាស៊ីនម៉ាស៊ូតចំណុះ ១,៩ លីត្រ អាចបង្កើតកម្លាំងបាន ១៤៨ សេះ ភ្ជាប់នឹងប្រអប់លេខដៃ ៦ វគ្គ ដែលមានកម្រិតស៊ីប្រេង ៧,៨ លីត្រ ក្នុង ១០០ គ.ម។ មួយទៀតគឺម៉ាស៊ីនសាំង ២,៤ លីត្រ ប្រភេទ Turbocharged ដែលមានកម្លាំង ២០៧ សេះ ភ្ជាប់នឹងប្រអប់លេខដៃ ៦ វគ្គ ឬលេខស្វ័យប្រវត្តិ ៦ វគ្គ ដោយមិនទាន់ដឹងអំពីកម្រិតស៊ីប្រេងនៅឡើយ។