Samsung ត្រូវបង្ខំចិត្តបិទរោងចក្រផលិតទូរសព្ទតម្លៃថ្លៃ ព្រោះវីរុសកូរ៉ូណា

2020-02-24 01:45:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ការផ្ទុះនៃវីរុសកូរ៉ូណា (COVID-19) បានឆក់យកជីវិតមនុស្សជាង ២ ពាន់នាក់នៅជុំវិញពិភពលោក ហើយវាក៏បានប៉ះពាល់ដល់ឧស្សាហកម្មបច្ចេកវិទ្យាយ៉ាងធ្ងន់ផងដែរ។ ជាក់ស្ដែងកម្មវិធីសមាជទូរសព្ទធំជាងគេប្រចាំឆ្នាំ Mobile World Congress ដែលត្រូវចាប់ផ្ដើមនាថ្ងៃទី ២៤ ខែកុម្ភៈនេះត្រូវបានរំសាយចោល ហើយសង្វាក់ផលិតកម្មផ្គត់ផ្គង់ស្មាតហ្វូននៅប្រទេសចិនក៏នឹងត្រូវប៉ះពាល់ដែរ។

ពេលនេះដំណឹងចេញពីប្រទេសកូរ៉េខាងត្បូង បានប្រាប់ថា Samsung បានបិទរោងចក្រផលិតស្មាតហ្វូននៅ Gumi បន្ទាប់ពីមានបុគ្គលិកម្នាក់ឆ្លងវីរុសកូរ៉ូណា។ រោងចក្រនេះ គឺជាកន្លែងដែល Samsung ផលិត Galaxy Fold និង Galaxy Z Flip ដែលនឹងបន្តបិទរហូតដល់ថ្ងៃទី ២៤ ខែកុម្ភៈ ហើយនៅជាន់ដែលបុគ្គលិកឆ្លងរោគ ធ្វើការនឹងត្រូវបិទរហូតដល់ថ្ងៃទី ២៥ ខែកុម្ភៈ។

ក្នុងព័ត៌មានដែលបញ្ចេញដោយ Samsung បាននិយាយថាបុគ្គលិករបស់ខ្លួនដែលមានទំនាក់ទំនងជាមួយបុគ្គលិកឆ្លងរោគនឹងត្រូវនៅដាច់ដោយឡែក ហើយត្រូវធ្វើតេស្តរកមើលថាមានឆ្លងវីរុស COVID-19 ឬអត់។

ការបិទរោងចក្រ Gumi នេះ ទំនងជាមិនប៉ះពាល់ធ្ងន់ដល់ Samsung នោះទេ ដោយសាររោងចក្រនេះមានចំណែកភាគរយតិចសម្រាប់ចំនួនផលិតស្មាតហ្វូនសរុបរបស់ Samsung៕

ប្រភព៖ GSMarena ប្រែសម្រួល៖ សុខហេង