សម្ដេចតេជោ៖ កម្ពុជាលើកទឹកចិត្តឲ្យលក់ផលិតផលអនឡាញ តែស្នើឲ្យស្លៀកពាក់សមរម្យ
- 2020-02-24 04:38:46
- ចំនួនមតិ 0 | ចំនួនចែករំលែក 0
សម្ដេចតេជោ៖ កម្ពុជាលើកទឹកចិត្តឲ្យលក់ផលិតផលអនឡាញ តែស្នើឲ្យស្លៀកពាក់សមរម្យ
ចន្លោះមិនឃើញ
«យើងចង់ឲ្យពលរដ្ឋចេះរកស៊ី ហើយលើកទឹកចិត្តឲ្យមានការលក់ផលិតផលអនឡាញ ប៉ុន្ដែបញ្ហាភាពសិចស៊ី បង្ហាញចេញមក វាមិនមែនជាបញ្ហាលក់ផលិតផលនោះទេ»។ នេះជាការលើកឡើងរបស់សម្ដេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅវិមានសន្ដិភាព កាលពីព្រឹកថ្ងៃទី ២៤ ខែកុម្ភៈ ២០២០។
សំណួរជុំវិញការលក់អនឡាញ ស្លៀកពាក់សិចស៊ី ដែលបានចោទសួរ ដោយលោក មាស រិទ្ធី អគ្គនាយករងស្ថានីយទូរទស្សន៍ហង្សមាស សម្ដេចតេជោ ហ៊ុន សែន បានឆ្លើយតបថា យើងចង់ឲ្យពលរដ្ឋចេះរកស៊ី E-commerce ឬ E-Goverment ប៉ុន្ដែការផ្សព្វផ្សាយលក់ផលិតផលស្លៀកពាក់សិចស៊ី វាមិនមែនជាបញ្ហាលក់ផលិតផលនោះទេ។
កាលពីសប្ដាហ៍មុន សម្ដេចតេជោ ហ៊ុន សែន បានបញ្ជាឲ្យចាត់វិធានការអ្នកបញ្ចេញកេរខ្មាសលក់អនឡាញ ដែលសកម្មភាពទាំងនោះបានធ្វើឲ្យប៉ះពាល់ដល់កិត្តិយសស្ត្រីខ្មែរ។
ប៉ុន្ដែបទបញ្ជានេះត្រូវបាន ក្រុមអង្គការសង្គមស៊ីវិលធ្វើការងារលើកស្ទួយសិទ្ធិស្ត្រី និងសមភាពយេនឌ័រចាត់ទុកសាររបស់ សម្ដេចតេជោ ហ៊ុន សែន នេះថា ធ្វើឱ្យប៉ះពាល់ដល់សិទ្ធិស្វ័យសម្រេច សិទ្ធិសម្ដែងមតិ អារម្មណ៍ និងជម្រើសរាងកាយរបស់ស្ត្រី។
ឆ្លើយតបនឹងក្រុមប្រតិកម្មនេះដែរ សម្ដេចតេជោ ហ៊ុន សែន បានបញ្ជាក់អំពីបទបញ្ជារបស់សម្ដេចថា ចំណាត់ការនេះ គឺធ្វើឡើងតាមសំណើរបស់ ក្រុមប្រឹក្សាជាតិដើម្បីស្រ្តី ដែលជាតួអង្គការពារឲ្យស្រ្តី ហើយបញ្ជានេះ គឺដើម្បីការពារតម្លៃឲ្យស្រ្តីខ្មែរ។
ក្រោយដាក់ចេញនូវបទបញ្ជារបស់សម្ដេចតេជោ ហ៊ុន សែន អ្នកលក់ផលិតផលអនឡាញតាមបណ្តាញសង្គម បញ្ចេញសាច់ និងកន្លែងកេរ្តិ៍ខ្មាស ដែលមានឈ្មោះ វ៉ែន រចនា ហៅ ថៃ ស្រីនាង ត្រូវបានតំណាងអយ្យការសម្រេចចោទប្រកាន់ តាមមាត្រា៣៨ មាត្រា៣៩ កថាខណ្ឌទី៣ នៃច្បាប់ស្តីពីការធ្វើអាជីវកម្មផ្លូវភេទ។ តាមច្បាប់នេះ អាចនឹងប្រឈមជាប់ទោសចាប់ពី ១ខែ ដល់ ១ឆ្នាំ និងមាត្រា ២៤៩ នៃក្រមព្រហ្មទណ្ឌ និងបានបញ្ជូនទៅចៅក្រមស៊ើបសួរដើម្បីចាត់ការបន្តតាមនីតិវិធី៕ ព័ត៌មានលម្អិតចុចអាន ត្រង់នេះ