គិតត្រឹមពេលនេះក្រុមហ៊ុនរថយន្តធំៗចំនួន ១៣ សម្រេចបិទរោងចក្រផលិត

2020-03-19 02:37:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលដែលកូវីដ១៩ បន្តរីករាលដាលពាសពេញពិភពលោក ក្រុមហ៊ុនផលិតរថយន្តជាច្រើនបានបិទរោងចក្រផលិតរបស់ខ្លួន ដើម្បីកាត់បន្ថយការចម្លងកូវីដ១៩នេះ។ គិតត្រឹមពេលនេះ មានក្រុមហ៊ុនផលិតរថយន្តចំនួន ១៣ បានសម្រេចបិទរោងចក្ររបស់ខ្លួន ដែលភាគច្រើនស្ថិតនៅតំបន់អឺរ៉ុប ៖

១. Ford

Ford បានសម្រេចចិត្តបិទរោងចក្រនាថ្ងៃទី ១៨ ខែមីនា សម្រាប់រោងចក្រនៅទ្វីបអាមេរិកខាងជើង ដែលនឹងបិទរហូតដល់ថ្ងៃទី ៣០ ខែមីនា។ ចំណែករោងចក្រនៅទ្វីបអឺរ៉ុបនឹងត្រូវបិទជាបណ្ដោះអាសន្នចាប់ពីថ្ងៃទី ១៩ ខែមីនា ដែលរំពឹងថានឹងបិទជាច្រើនសប្ដាហ៍។

២. General Motors

GM ក៏នឹងនឹងចាប់ផ្ដើមផ្អាកប្រតិបត្តិការផលិតរបស់ខ្លួនទាំងអស់នៅទ្វីបអាមេរិកខាងជើងចាប់ពីថ្ងៃទី ១៩ ខែមីនា រហូតដល់ ៣០ ខែមីនា ហើយការចាប់ផ្ដើមផលិតឡើងវិញនឹងត្រូវត្រួតពិនិត្យយ៉ាងដិតដល់។

៣. Honda

ក្រុមហ៊ុនជប៉ុននេះ គឺជាក្រុមហ៊ុនដំបូងនៅអាមេរិកដែលប្រកាសពីការផ្អាកផលិតកម្មទ្រង់ទ្រាយធំ។ ចាប់ពីថ្ងៃទី ១៨ ខែមីនា រោងចក្រនៅអាមេរិកខាងជើងទាំងអស់នឹងផ្អាកដំណើរការរយៈពេល ៦ ថ្ងៃ។ អំឡុងពេល ៦ ថ្ងៃនេះ Honda គ្រោងធ្វើការសម្អាតនៅគ្រប់ទីតាំងទាំងអស់ ហើយបានប្រកាសពីការផ្ដល់ប្រាក់កម្រៃពេញលេញដល់បុគ្គលិក ទោះមានការផ្អាកប្រតិបត្តិការក្ដី។

៤. Daimler

ក្រុមហ៊ុនអាល្លឺម៉ង់ដែលកាន់កាប់ម៉ាក Mercedes-Benz មួយនេះ បាននិយាយកាលពីថ្ងៃអង្គារថានឹងបញ្ឈប់ផលិតកម្មទាំងអស់នៅអឺរ៉ុប ក្នុងរយៈពេលយ៉ាងតិច ២ សប្ដាហ៍។ ហេតុផលគឺដោយសារមានបញ្ហាទាក់ទងនឹងសង្វាក់ផលិតកម្មផ្គត់ផ្គង់ និងដើម្បីការពារបុគ្គលិកពីការចម្លងវីរុសផងដែរ។

៥. Porsche

នៅថ្ងៃទី ១៨ ខែមីនា Porsche បានប្រកាសថារោងចក្រនៅអាល្លឺម៉ង់នឹងត្រូវបិទរយៈពេលយ៉ាងតិច ២ សប្ដាហ៍ដូចជា Daimler ដែរ។ Porsche និយាយថាបញ្ហាសង្វាក់ផលិតកម្មផ្គត់ផ្គង់ធ្វើឲ្យខ្លួនមិនអាចបន្តការផលិតបានដូចធម្មតា។

៦. Rolls-Royce

ក្រុមហ៊ុនផលិតរថយន្តប្រណីតរបស់អង់គ្លេស បាននិយាយនាថ្ងៃទី ១៨ ខែមីនា ថាអាចនឹងផ្អាកផលិតកម្មនៅរោងចក្រនៅចក្រភពអង់គ្លេសរយៈពេល ២ សប្ដាហ៍ ចាប់ពីថ្ងៃទី ២៣ មីនា។

៧. PSA Group

ក្រុមហ៊ុនដែលកាន់កាប់ម៉ាក Peugeot, Citron, DS, Opel និង Vauxhall នេះ បានប្រកាសថារោងចក្រទាំងអស់របស់ខ្លួននៅទូទាំងអឺរ៉ុបនឹងត្រូវបិទជាដំណាក់កាល ដែលគ្រោងនឹងបើកដំណើរការឡើងវិញនាថ្ងៃទី ២៧ ខែមីនាទាំងអស់។

៨. Volkswagen

នៅថ្ងៃទី ១៧ ខែមីនា សម្ព័ន្ធ Volkswagen ប្រកាសថានឹងផ្អាកផលិតកម្មនៅរោងចក្រជាច្រើនទូទាំងអឺរ៉ុប រួមមាននៅប្រទេសស្លូវ៉ាគី ព័រទុយហ្គាល់ និងអេស្ប៉ាញ។ បច្ចុប្បន្ននេះ VW រំពឹងថាការផ្អាកនឹងមានរយៈពេល ២ សប្ដាហ៍។

៩. Renault

ម៉ាករថយន្តបារាំងបាននិយាយថានឹងផ្អាកផលិតកម្មរហូតដល់មានការបញ្ជាក់ជាថ្មីម្ដងទៀត នៅរោងចក្រចំនួន ១២ កន្លែងនៅទូទាំងប្រទេសបារាំង។

១០. Toyota

ក្រុមហ៊ុនរថយន្តជប៉ុននេះបានបញ្ឈប់ការផលិតនៅរោងចក្រក្នុងប្រទេសព័រទុយហ្គាល់ កាលពីថ្ងៃចន្ទ។ ក្រុមហ៊ុនក៏បានផ្អាកការផលិតនៅប្រទេសបារាំងចាប់ពីថ្ងៃទី ១៨ ខែមីនា ហើយនឹងដំណើរការឡើងវិញនៅចុងខែមីនា។ បន្ថែមពីនេះរោងចក្រនៅហ្វីលីពីននឹងត្រូវបិទចាប់ពីពេលនេះរហូតដល់អំឡុងខែមេសា ដើម្បីទក់ស្កាត់ការរាលដាលនៃកូវីដ១៩។

១១. Fait Chrysler Automobiles

កាលពីសប្ដាហ៍មុន ក្រុមហ៊ុននេះបាននិយាយនឹងបិទរោងចក្រចំនួនបួននៅអ៊ីតាលី ក្នុងសប្ដាហ៍នេះជាបណ្ដោះអាសន្ន។ រោងចក្រនៅទីនោះមានផលិតរថយន្ត Jeep Renegrade និង Compass រួចជាមួយរថយន្ត Fiat 500X និង Panda ផងដែរ។

១២. Ferrari

កាលពីថ្ងៃចន្ទ ក្រុមហ៊ុនផលិតរថយន្តរបស់អ៊ីតាលី បានប្រកាសថារោងចក្រទាំងនៅតំបន់ Maranello និង Modena នៃប្រទេសអ៊ីតាលី ត្រូវបិទរហូតដល់ថ្ងៃទី ២៧ ខែមីនា។

១៣. Lamborghini

កាលពីថ្ងៃសុក្រសប្ដាហ៍កន្លងទៅ ក្រុមហ៊ុនបានប្រកាសថានឹងផ្អាកការផលិតនៅរោងចក្រ Sant’Agata Bolognese ដែលគ្រោងនឹងបើកដំណើរការឡើងវិញនាថ្ងៃទី ២៥ ខែមីនា៕

ប្រភព៖ Cnet ប្រែសម្រួល៖ សុខហេង