Huawei ចង់ឲ្យកម្មវិធី Google មានក្នុង AppGallery របស់ខ្លួន ដូច App Store របស់ Apple

2020-04-02 02:50:38
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Eric Xu ដែលបច្ចុប្បន្នជាប្រធានមានកាលកំណត់ប្រចាំ Huawei បានប្រាប់ដល់សារព័ត៌មាន CNBC នាពេលថ្មីៗនេះថាក្រុមហ៊ុនរបស់ខ្លួនសង្ឃឹមថាកម្មវិធី Google អាចនឹងមាននៅលើ AppGallery Store របស់ Huawei។

លោកបានប្រៀបធៀបវាទៅនឹងករណីនៃ App Store របស់ Apple ដែល Google ដាក់សំណើនៃកម្មវិធីរបស់ខ្លួនដើម្បីបានការអនុញ្ញាតពី Apple។ ប្រសិនបើ Google ដាក់សំណើកម្មវិធីរបស់ខ្លួនទៅលើ AppGallery នោះអាចឲ្យកម្មវិធី Google មានសម្រាប់ទាញយកនៅលើស្មាតហ្វូន Huawei។

ត្បិតថាអវត្តមាននៃកម្មវិធី Google នៅលើទូរសព្ទ Huawei មិនជាបញ្ហាសម្រាប់ Huawei នៅទីផ្សារប្រទេសចិន ដោយសារតែ Google ត្រូវបានហាមឃាត់នៅប្រទេសចិន ប៉ុន្តែវាអាចជាបញ្ហាសម្រាប់អតិថិជនលើទីផ្សារអន្តរជាតិ។ លោក Eric Xu បាននិយាយថាការមានឈ្មោះក្នុងបញ្ជីខ្មៅអាមេរិក ធ្វើឲ្យ Huawei បាត់បង់ប្រាក់ចំណេញ ១០ ពាន់លានដុល្លារសម្រាប់ឆ្នាំ ២០១៩។

គួរដឹងថាកាលពីខែមុន Google បានដាក់ពាក្យស្នើសុំជាពិសេស នូវការអនុញ្ញាតពីរដ្ឋាភិបាលអាមេរិក ដើម្បីអាចបន្តរកស៊ីជាមួយ Huawei ប៉ុន្តែវាអាចនឹងចំណាយពេលយូរដើម្បីឲ្យនីតិវិធីសម្រេចរួចរាល់៕

ប្រភព៖ PhoneArena ប្រែសម្រួល៖ សុខហេង