វិធីឆែកមើលវដ្ដជីវិតថ្ម iPhone ឲ្យច្បាស់ៗ

2020-04-14 03:13:46
ចំនួនមតិ 0 | ចំនួនចែករំលែក 0

ចន្លោះមិនឃើញ

Battery Cycle Count គឺជាចំនួនវដ្ដជីវិតនៃថ្មទូរសព្ទ ហើយតាមតួលេខនេះយើងអាចដឹងបានថាថ្មទូរសព្ទដែលអ្នកកំពុងប្រើមានសុខភាពល្អ ឬមិនល្អដែលត្រូវដល់ពេលប្ដូរចេញ។

នៅពេលដែលអ្នកសាកថ្មទូរសព្ទពេញដល់ ១០០% រួចប្រើមកសល់ត្រឹម ០% គឺរាប់ចូលជា ១វដ្ដជីវិតនៃថ្ម។ មួយទៀតប្រសិនបើថ្ងៃទីមួយអ្នកប្រើប្រាស់ថាមពលថ្មអស់ត្រឹម ៦០% ហើយថ្ងៃបន្ទាប់ប្រើអស់ ៤០% ទៀត ក៏រាប់ចូលជា ១វដ្ដជីវិតដែរ។ និយាយឲ្យស្រួលយល់ពេលប្រើប្រាស់ថាមពលអស់ ១០០% គឺរាប់មួយវដ្ដជីវិត។

នៅលើ iOS ជំនាន់ចុងក្រោយគឺមានមុខងារមួយសម្រាប់ត្រួតពិនិត្យមើលសុខភាពនៃថ្ម iPhone ដែលអាចឲ្យអ្នកប្រើបានដឹងថាពេលណាត្រូវប្ដូរថ្មថ្មី។ ប៉ុន្តែប្រសិនបើអ្នកចង់ដឹងតួលេខច្បាស់អំពីវដ្ដជីវិតនៃថ្ម iPhone អាចសាកល្បងតាមវិធីខាងក្រោម ៖

ចូលទៅកាន់ Settings → Privacy

បន្ទាប់មកអូសចុះក្រោម និងស្វែងរកពាក្យ Analytics & Improvements

រួចចុចលើ Analytics Data

បន្ទាប់មកត្រូវស្វែងរកឃ្លាដែលមានពាក្យ "log- aggregated” យកឃ្លាដែលស្ថិតនៅចុងក្រោយគេបង្អស់

បន្ទាប់មកទៀតធ្វើការ Copy ពាក្យទាំងអស់

រួច Paste វាចូលកម្មវិធី Note ហើយចុច "Done”

រួចហើយចុចលើប៊ូតុង Share នៅផ្នែកលើខាងស្ដាំនៃកម្មវិធី Note
បន្តមកទៀតចុចយកពាក្យ "Find in Note” និងសរសេរថា "Battery Cycle Count”

នៅពីក្រោម Battery Cycle Count អ្នកនឹងឃើញលេខដែលបង្ហាញអំពីវដ្ដជីវិតនៃថ្ម iPhone របស់អ្នក

បើតាមការបញ្ជាក់របស់ Apple បានឲ្យដឹងថាថ្មទូរសព្ទធម្មតា ផលិតឡើងដោយអាចរក្សាទំហំដើមរបស់វាបានរហូតដល់ ៨០% នៅពេលមានវដ្ដជីវិតដល់ ៥០០ ដង សម្រាប់ការប្រើប្រាស់ក្នុងលក្ខខណ្ឌធម្មតាមួយ៕

អត្ថបទ៖ សុខហេង