ខាត់ សុឃីម កំពុងបណ្ដុះកូនប្រុសនាយ ឡោស៊ី ឲ្យស្នងឪពុក

2014-11-20 17:33:58
ចំនួនមតិ 0 | ចំនួនចែករំលែក 0

ចន្លោះមិនឃើញ

កូនប្រុសរបស់តារាកំប្លែង ឡោស៊ី ត្រៀមស្នងឪពុករបស់ខ្លួន ដោយបច្ចុប្បន្នកំពុងរស់នៅ និងរៀនសូត្រជំនាញសិល្បៈក្នុងគ្រួសាររបស់អ្នកនាង ខាត់ សុឃីម រយៈពេលជាង៥ខែមកហើយ និងមានឈ្មោះសម្រាប់ប្រើក្នុងអាជីពកំប្លែងថា នាយ ម៉ាឡេត។ នេះបើតាមអ្នកនាង ខាត់ សុឃីម។

នាយ ម៉ាឡេត កូនប្រុសនាយ ឡោស៊ី(រូបពីក្រោយខាងឆ្វេងអ្នកនាង ខាត់ សុឃីម)

ខាត់ សុឃីម៖ “ខ្ញុំមានការសោកស្ដាយមែនទែន ព្រោះពេលដែលបង ឡោស៊ី ធ្លាក់កូដមិនទាន់បានជួយគាត់ផង ស្រាប់តែជួបរឿងអាក្រក់បាត់បង់ជីវិតទៅ"។

អ្នកនាងចាត់ទុកថា នេះជាការតបស្នងសងគុណចំពោះវិញ្ញាណក្ខន្ធរបស់នាយ ឡោស៊ី។ ម្យ៉ាងទៀតនាងមានចិត្តអាណិតអាសូរចំពោះក្មេងប្រុសខាងលើ ដែលកំពុងជួបការលំបាក ក្រោយពីឪពុករបស់គេទទួលអនិច្ចកម្មទៅ។ ខាត់ សុឃីម រំលឹកថា នាយ ឡោស៊ី ជាអ្នកមានគុណម្នាក់ ធ្លាប់ជួយយឹតយោងនាង និងប្អូនប្រុស ខាត់ ចំរើន ឲ្យមានឱកាសបានសម្ដែង ដើម្បីរកកម្រៃផ្គត់ផ្គង់ជីវភាពគ្រួសារអំឡុងជាង១០ឆ្នាំមុន កាលក្រលំបាក។

គណៈកម្មការកម្មវិធី Cambodia's Got Talent រូបនេះសម្រេចចិត្ត នាំកូនប្រុសរបស់តារាកំប្លែង ឡោស៊ី មករស់នៅក្នុងគ្រួសារ ហើយចាត់ទុកដូចជាប្អូនបង្កើត ដោយបង្ហាត់បង្រៀនជំនាញភ្លេងខ្មែរ និងបច្ចេកទេសកំប្លែងទៀតផង។ អ្នកនាងបង្ហើបថា នឹងបញ្ចូលឈ្មោះក្មេងប្រុសខាងលើ ជាសមាជិកថ្មីនៃគ្រួសារម្នាក់ទៀត ខណៈឪពុករបស់នាងយល់ព្រមទៅហើយ។

នាយ ម៉ាឡេត

អ្នកនាងបន្ថែមថា បច្ចុប្បន្ននេះ ម៉ាឡេត អាចច្រៀង, កំប្លែង និងលេងភ្លេងបានខ្លះហើយ ព្រោះរូបគេក៏មានទេពកោសល្យសិល្បៈ មិនខុសពីឪពុករបស់គេប៉ុន្មានដែរ។ ប៉ុន្តែទោះបីជាយ៉ាងណា នៅត្រូវការពេលវេលាយូរទៀត ក្នុងការបង្ហាត់បង្រៀនក្មេងប្រុសនេះ ឲ្យស្គាល់ពីបែបបទសម្ដែង ធ្វើយ៉ាងណាបំពេញចិត្តទស្សនិកជន។

បើយោងតាមតារាស្រីរូបនេះ ដំណក់ឈាមរបស់អតីតតារាកំប្លែងនាយ ឡោស៊ី នឹងមានឱកាសសម្ដែងតាមកញ្ចក់ទូរទស្សន៍ ដរាបណារូបគេមានការខិតខំប្រឹងប្រែង ស្វែងយល់ពីអាជីពនេះ ឲ្យបានច្បាស់លាស់បន្ថែមទៀត។ អ្នកនាងអះអាងថា គ្រួសារត្រកូល"ខាត់" នៅតែជាអ្នកជួយជ្រោមជ្រែងក្មេងប្រុសម្នាក់នេះបន្តទៀត៕

ស្ដាប់៩បទ របស់ ប៊ុត សីហា ប្រលងThe Voice Cambodia

អត្ថបទផ្សេងទៀតពាក់ព័ន្ធអ្នកនាង ខាត់ សុឃីម នៅទីនេះ!!!

អត្ថបទ៖ សំ ជំនាញ