អាថ៌កំបាំង ៥ យ៉ាង ធ្វើឲ្យក្រុម ពែកមី ល្បីដល់ឥឡូវ!

2014-09-25 22:15:44
ចំនួនមតិ 0 | ចំនួនចែករំលែក 0

ចន្លោះមិនឃើញ

បើនិយាយពីក្រុមកំប្លែងរបស់ទូរទស្សន៍ CTN ឬក្រុមនាយ ពែកមី ប្រាកដជាធ្វើឲ្យទស្សនិកជននឹកឃើញពីសកម្មភាព នៃការសម្ដែងនានា នាំឲ្យទប់សំណើចមិនបាន។ ប៉ុន្តែទស្សនិកជន ហាក់មើលរំលង លោក សុវណ្ណរិទ្ធី ហៅតាវ៉ិចទ័រ ដែលជាផលិតករល្បីឈ្មោះ និង ជាបុគ្គលនៅពីក្រោយភាពល្បីល្បាញនៃក្រុមកំប្លែងខាងលើ ដែលបានដឹកនាំក្រុមតាំងពីចំណុចចាប់ផ្ដើមរហូតបច្ចុប្បន្ន។

សូមចុចអាន៖ សុខ សីឡាលីន ច្រៀងបទអង់គ្លេសបានល្អទស្សនិកជនមានដឹងថា រៀនដល់ណាអត់?

តាមរយៈបទសម្ភាសនាពេលកន្លងមកជាមួយ Sabay បុរសមិនសូវចេញមុខរូបនេះ បានទម្លាយចេញនូវអាថ៌កំបាំង ៥ ចំណុច សំខាន់របស់ក្រុមដូចខាងក្រោម។ តើចំណុចទាំងនោះមានអ្វីខ្លះ?

១. កំណត់ប្រធានបទ ឬចំណងជើង៖ តើមនុស្សបច្ចុប្បន្នចូលចិត្តអ្វី? ហើយគួរដាក់ចំណងជើងរឿងបែបណា? ជាសំណួរដែលលោក វ៉ិចទ័រ តែងសួរខ្លួនឯង នៅពេលដែលចាប់ផ្ដើមសរសេររឿង។ "ឧទាហរណ៍ថា មនុស្សបច្ចុប្បន្នចូលចិត្តលេងFacebook។ ពូកគេប្រាកដជាស្គាល់អ្វីទៅពាក្យ like, comment, confirmជាដើម"។ ដូច្នេះលោកអាចដាក់ចំណងជើងរឿងកំប្លែងថា"Confirm តែមិនព្រមLike” អញ្ចឹងទៅ។

២. រៀបចំសាច់រឿង៖ "ខ្ញុំសួរខ្លួនឯងថា តើរឿងត្រូវបញ្ចប់យ៉ាងដូចម្ដេច? និងគួររៀបចំដំណើររឿងបែបណាល្អ?”។ ពេលវេលាមិនច្រើននោះទេសម្រាប់ការសម្ដែងលើឆាករបស់ក្រុម ហើយត្រូវលៃពេលវេលាយ៉ាងណាឲ្យគោរពតាមពេលវេលា និងទស្សនិកជនអាចយល់ពីខ្លឹមសារនៃរឿងចង់និយាយ ក្រៅពីសំណើចរបស់ពូកគាត់។

៣. ឆ្លងយោបល់៖ ភាពយន្តទូទៅ តួសម្ដែងគ្រាន់តែធ្វើតាមអ្នកនិពន្ធ ឬដឹកនាំរឿងប៉ុណ្ណោះតាមអ្វីដែលរៀបចំរួចស្រេច ដោយមិនបាច់ខ្វល់ខ្វាយអ្វីទាំងអស់។ ប៉ុន្តែចំពោះរឿងកំប្លែងវិញ ក្រោយពីការរៀបចំជាឆ្អឹងរឿងរួចរាល់ហើយនោះ លោកត្រូវយកសាច់រឿងឆ្លងយោបល់សមាជិកក្រុម។

៤. កំណត់តួសម្ដែង៖ នរណាគួរសម្ដែងជាតួអ្វី ដែលត្រូវសាច់រឿងបំផុត? តួសម្ដែងជាផ្នែកមួយរបស់រឿងមិនអាចខ្វះបាន ប្រសិនបើជ្រើសរើសតួបានត្រឹមត្រូវនោះក៏ជាផ្នែកមួយនៃការផ្ទុះសំណើចរបស់ទស្សនិកជនដែរ។

៥. តួសម្ដែង៖ ក្រៅអំពីការប្រែប្រឹងរបស់អ្នកដឹកនាំរឿងហើយនោះ តួសម្ដែងម្នាក់ៗគួរព្យាយាមបង្កើតអ្វីដែលថ្មីឲ្យអស់ពីលទ្ធភាពរៀងខ្លួន ដូចជាពាក្យពេចន៍កំប្លែងជាដើម។ សមាជិកក្រុមទាំងអស់ត្រូវហាត់សមការសម្ដែងឲ្យស្ទាត់មុនពេលដែលបង្ហាញលើឆាក អាចនិយាយបានថា ស្ទើរដល់នាទីចុងក្រោយនៃការឡើងសម្ដែងក៏នៅតែហាត់ដែរ៕

អត្ថបទ៖ សំ ជំនាញ