ឯម រៀម គូររូបជនរងគ្រោះទូលស្លែង ដាក់លក់១ផ្ទាំង២០០០ដុល្លារ

2014-11-22 17:12:37
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ឌិតច្នៃម៉ូដ លោក ឯម រៀម យប់មិញនេះ បានសម្ពោធស្នាដៃគំនូររបស់ខ្លួន ដោយលោកបានគូររូបចម្លងចេញពីរូបថត ជនរងគ្រោះក្នុងសារមន្ទីរប្រល័យពូជសាសន៍ ទួលស្លែង ហើយបានដាក់លក់ក្នុងមួយផ្ទាំ២០០០ដុល្លារ។

គំនូរនោះមានទាំងអស់១៥ផ្ទាំង ដោយលោកបានប្រើពេលជាង១ឆ្នាំក្នុងការគូរ។ បណ្ឌិតច្នៃម៉ូដល្បីឈ្មោះ លោក ឯម រៀម បានប្រាប់ Sabay ថា ប្រធានបទដែលលោកចង់បង្ហាញនៅក្នុងរូបភាព មានឈ្មោះថា "លេខដែលត្រូវរស់"។ លោកបានពន្យល់ថា មូលហេតុដែលនាំឲ្យលោក យកប្រធានបទនេះ មកតាំងបង្ហាញ ក៏ព្រោះតែរាល់ជនរងគ្រោះជាប់ឃុំឃាំងក្នុងសារមន្ទីរប្រល័យពូជសាសន៍ ទួលស្លែង ក៏ដូចជាប្រជាជនខ្មែរទូទាំងប្រទេស ដែលធ្លាប់ឆ្លងកាត់របបខ្មែរក្រហម មានអ្នកខ្លះត្រូវស្លាប់ មានអ្នកខ្លះទៀតបានជួយផុតពីសេចក្ដីស្លាប់។

លោកបានបន្តថា របបខ្មែរក្រហម គឺជារឿងពិតដែលប្រជាជនខ្មែរគ្រប់រូប មិនអាចបំភ្លេចបានឡើយ។ ពិព័រណ៍គំនូររបស់លោក ក៏ជាសារមួយដើម្បីរួមចំណែកធ្វើឲ្យមានការចងចាំនៃរបបខ្មៅងងឹតនោះផងដែរ។

ចំពោះផ្ទាំងសំពត់សម្រាប់គូរូបភាព បណ្ឌិតរូបនេះបានយកបាវធ្វើពីក្រចៅដែលប្រជាជនខ្មែរសម័យដើមតែងប្រើប្រាស់ ហើយបច្ចុប្បន្នមិនសូវមានឡើយ។ ចំណុចនេះលោកចង់ប្រាប់ថា ជាគំនិតមួយ ដើម្បីអភិរក្សផងដែរ ដើម្បីឲ្យក្មេងជំនាន់ក្រោយបានដឹង។

ការលើកឡើងទាំងប៉ុន្មានខាងលើមិនអាចបរិយាយពីអត្ថន័យនៃផ្ទាំងគំនូរបានឡើយ ព្រោះ ឯម រៀម ប្រាប់ថាគ្រប់ផ្ទាំងគំនូររបស់លោកបង្កប់ដោយអត្ថន័យច្រើន ដូច្នេះហើយគឺត្រូវការពេលវេលាច្រើនដើម្បីពន្យល់។

ផ្ទាំងគំនូរដែលបានតាំងបង្ហាញនៅយប់មិញនេះ នៅភោជនីយដ្ឋាន Chinese House តាមបណ្ដោយផ្លូវព្រះស៊ីសុវត្ថិ ជិតកំពង់ផែភ្នំពេញ មិនមែនជាស្នាដៃទី១របស់លោកឡើយ បណ្ឌិតច្នៃម៉ូដម្នាក់នេះ ធ្លាប់បានបង្ហាញស្នាដៃជាច្រើនមកហើយ ដែលបាន និងកំពុងដាក់លក់នៅតាមសណ្ឋាគារធំក្នុងប្រទេសកម្ពុជា ក្នុងនោះដែរ លោកក៏ធ្លាប់យកស្នាដៃ ទៅចូលរួមតាំងពិព័រណ៍នៅក្រៅប្រទេសជាច្រើនមកហើយ៕

អានអត្ថបទ៖ តារាស្រីរាងស្អាតខ្មែរម្នាក់ទៀត បញ្ចេញឈុតគ្រឿងក្នុងនៅក្រៅប្រទេស អានអត្ថបទ៖ ពេជ្រ សុវណ្ណវិជ្ជរ៉ា ប្រឡូកសិល្បៈស៊ុបវិញ ក្រោយស្ងប់ស្ងាត់មួយរយៈធំ!

អត្ថបទ៖ ខុត សីហា