NeverCare ប៊ិះខ្ចប់ក្រោមថ្វីដៃអ្នកលេងឆ្លងខេត្ត StandarD

2014-11-23 20:45:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងល្បីពេញប្រទេសកម្ពុជាក្រុម NeverCare ប៊ិះខ្ចប់ក្រោមថ្វីដៃប្រយុទ្ធរបស់ក្រុមជើងឯករងប្រចាំខេត្តព្រះសីហនុ StandarD ក្នុងជំនួបនៅវគ្គ ៨ ក្រុមចុងក្រោយប្រចាំព្រឹត្តិការណ៍ CCC Final អម្បាញ់មិញនេះ។

សម្រាប់ ៣ ប្រកួតដំបូង ម្ចាស់ជយលាភីជើងឯក AK ប្រចាំខេត្តបាត់ដំបង ២ ឆ្នាំជាប់គ្នា បានយកឈ្នះយ៉ាងងាយលើក្រុម StandarD។ បន្ទាប់ពីត្រូវបានក្រុម NeverCare នាំពិន្ទុ ៣ មុនហើយ អ្នកក្លាហានវ័យក្មេងចិត្តខ្លាំងប្រចាំខេត្តព្រះសីហនុ បានដាក់សម្ពាធទៅលើក្រុម NeverCare យ៉ាងខ្លាំងរហូតតាមទាន់ពិន្ទុក្រុម NeverCare ៣ ទល់នឹង ៣។

មហិច្ឆតារបស់ក្រុម StandarD មិនមែនត្រឹមតែតាមទាន់ពិន្ទុក្រុម NeverCare ដោយព្យាយាមដាក់សម្ពាធបន្តទៀតទៅលើក្រុម NeverCare ធ្វើសមាជិកក្រុម NeverCare ទាំងមូល ក៏ដូចជាអ្នកគាំទ្រ Clan The Murderer ទទួលបានភាពរន្ធត់ និងបារម្ភយ៉ាងខ្លាំង។ យ៉ាងណាមិញ ក្រុម StandarD នៅតែមិនអាចយកឈ្នះលើជើងខ្លាំងចំណាត់ថ្នាក់លេខ ២ ក្នុងព្រឹត្តិការណ៍ប្រកួតអន្តរជាតិ MATIC ក្រុម NeverCare ដដែល ដោយត្រូវក្រុម NeverCare យកឈ្នះទាំងប្រផុតប្រផើយក្នុងលទ្ធផល ៥ ទល់នឹង ៤។

ថ្វីដៃប្រយុទ្ធរបស់ក្រុមប្រកួតនីមួយៗឆ្នាំនេះ ពិតជាកើតឡើងគួរឲ្យកត់សម្គាល់មែន ព្រោះពួកគេសុទ្ធតែអាចធ្វើឲ្យក្រុមខ្លាំងៗឆ្នាំមុនប្រហោងពោះមិនស្ទើរឡើយពេលប្រកួត! ទាំងនេះបញ្ជាក់ឲ្យឃើញថា ជ័យជម្នះមិនដែលរត់ចេញពីអ្នកព្យាយាមហ្វឹកហាត់ឡើយ៕

អត្ថបទ៖ ភីឆាយ