Mourinho ឌឺ Sergio Ramos ថាមិនមែនជាគ្រូពេទ្យទេ

2014-11-24 23:10:39
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការក្លិបតោខៀវ Chelsea លោក Jose Mourinho បាននិយាយថាខ្សែការពារ Sergio Ramos មិនមែនជាគ្រូពេទ្យដែលអាចដឹងថានរណាឈឺ នរណាជា អាចចូលបានឬអត់នោះទេ។ ពាក្យសម្ដីនេះកើតឡើងពេលដែល Ramos បាននិយាយថា Diego Costa និង Cesc Fabregas មិនគួរចូលលេងនោះទេ ពេល Chelsea ប៉ះ West Brom ចុងសប្ដាហ៍កន្លងទៅ ព្រោះពួកគេកំពុងមានរបួសស្រាប់មិនអាចលេងឱ្យជម្រើសជាតិអេស្ប៉ាញបានផង។

ក្នុងបទសម្ភាសន៍ជាមួយ Mirror លោក Mourinho បាននិយាយថា៖ “តាំងពីខ្ញុំស្គាល់ Ramos មក ខ្ញុំមិនដែលដឹងថាគេធ្លាប់បានរៀនពេទ្យនោះទេ រូបគេគ្រាន់តែជាខ្សែការពារល្អម្នាក់ប៉ុណ្ណោះ។ ដូច្នេះគេមិនអាចសម្រេចថានរណាអាចលេងបានឬអត់នោះទេ មានតែក្រុមគ្រូពេទ្យទេដែលអាចដឹងពីរឿងនេះ។ Costa និង Fabregas មិនបានលេងនៅជម្រើសជាតិ ប៉ុន្តែគេអាចលេងបាននៅក្លិបអាជីព។ ដូច Kompany អីចឹង គេមិនលេងក្នុងជម្រើសជាតិបែលហ្សិក ប៉ុន្តែគេអាចលេងនៅ Man City បាន”។

លើសពីនេះទៅទៀត បុរសវ័យ៥១ឆ្នាំខាងលើក៏បានបាញ់ខាងជម្រើសជាតិអេស្ប៉ាញផងដែរថា៖ “ខ្ញុំជឿជាក់លើគ្រូពេទ្យរបស់ខ្ញុំ១០០% ប្រសិនបើលោក Del Bosque មិនជឿលើគ្រូពេទ្យគេទេ នោះមិនមែនជារឿងរបស់ខ្ញុំឡើយ។ មុនប្រកួត ខ្ញុំក៏បានសួរពួកគេ (ពេទ្យ Chelsea) ដែរថា Costa អាចលេងបានឬអត់ ហើយគេក៏ប្រាប់ខ្ញុំថា អាចលេងបានគ្មានបញ្ហាអ្វីនោះទេ ដូច្នេះគ្មានហេតុផលណាខ្ញុំមិនដាក់គាត់លេងនោះទេ”។

នៅចាំបានថា កាល Chelsea ប៉ះ West Brom នាថ្ងៃសៅរ៍សប្ដាហ៍មុននេះ លោក Mourinho បានដាក់ទាំង Costa និង Fabregas លេងទាំងអស់ ហើយមិនត្រឹមតែពីរនាក់នេះលេងបាននោះទេ Diego Costa ថែមទាំងអាចរកគ្រាប់បាល់បានទៀតផងត្រឹមនាទីទី១១៕

ចុចអាន៖ ដឹងអត់ សំបុត្រចូលមើលបាល់អង់គ្លេស ក្រុមណាថ្លៃជាងគេ?

ប្រែសម្រួល៖ មុន្នី រម្យ ប្រភព៖insidespanishfootball