កម្ពុជាស្ថិតក្នុងចំណោមប្រទេស៦ ដែលអាចដើរលេងសប្បាយ ហើយចំណាយតិចបំផុត

2014-09-26 21:27:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្ញៀវទេសចរភាគច្រើនតែងស្រមៃដល់ការចំណាយប្រាក់សន្ធឹកសន្ធាប់សម្រាប់ការធ្វើដំណើរកម្សាន្តនៅប្រទេសជុំវិញពិភពលោក។ មិនដូច្នោះទេ គោលដៅទេសចរណ៍ក្នុងប្រទេសមួយចំនួនអាចធ្វើឲ្យអ្នកនឹកស្មានមិនដល់ ព្រោះតែភាពស្រស់ស្អាត និងចាយវាយអស់តិចតួចបំផុត។

គេហទំព័រ Huffington Post បានចុះផ្សាយមានប្រទេស៦ ដែលភ្ញៀវទេសចរអាចដើរកម្សាន្ត និងរីករាយជាមួយមនុស្សជាទីស្រឡាញ់របស់ខ្លួនបាន ដោយគ្រាន់តែចំណាយត្រឹមតែ៥០ដុល្លារក្នុងមួយថ្ងៃ ដែលក្នុងនោះក៏មានប្រទេសកម្ពុជាយើងដែរ។

១. ហ្វីជី៖

បើប្រៀបធៀបជាមួយប្រទេសដែនកោះដែលប្រហាក់ប្រហែលគ្នា ហ្វីជីគឺជាប្រទេសដែលអ្វីៗមានតម្លៃថោកជាងគេ។ វាមានរមណីយដ្ឋានពេលរាត្រីជាច្រើនដែលមានតម្លៃដល់ ១ម៉ឺនដុល្លារក្នុងមួយយប់ តែវាក៏មានបន្ទប់ស្នាក់នៅធម្មតា សណ្ឋាគារ និងផ្ទះសំណាក់ក្នុងស្រុកសាមញ្ញៗដែលចំណាយត្រឹមតែ២៥ដុល្លារប៉ុណ្ណោះក្នុងមួយយប់។ ការធ្វើដំណើរជុំវិញកោះក៏មិនថ្លៃដែរ ឯការចូលលេងលើឆ្នេរខ្សាច់ក៏មិនត្រូវបានគិតប្រាក់ រួមជាមួយអាហារសមុទ្រដ៏ឆ្ងាញ់ពិសា និងប្រជាជនដែលភាពរួសរាយរាក់ទាក់។

២. កម្ពុជា៖

ខណៈពេលដែលអ្នកអាចនឹកឃើញដល់ប្រទេសផ្សេងទៀតនៅតំបន់អាស៊ីអាគ្នេយ៍ កម្ពុជាគឺជាប្រទេសដែលល្អបំផុតក្នុងចំណោមប្រទេសដែលរបស់របរមានតម្លៃថោកជាងគេក្នុងតំបន់។ អ្វីៗគ្រប់យ៉ាងពិតជាមានតម្លៃថោកអាចទទួលយកបាន។ សម្រាប់បន្ទប់សណ្ឋាគារបំពាក់ដោយម៉ាស៊ីនត្រជាក់ អ្នកអាចចំណាយត្រឹមតែ២០ដុល្លារប៉ុណ្ណោះ។ អាហារក្នុងស្រុកមានតម្លៃត្រឹមតែ២ដុល្លារ ឯអាហារលោកខាងលិចមានតម្លៃតែ៧ដុល្លារទេ។ បន្ថែមពីលើតម្លៃ កម្ពុជាថែមទាំងជាប្រទេសដែលមានប្រជាជនរួសរាយរាក់ទាក់ មានឆ្នេរសមុទ្រស្រស់ស្អាតជាច្រើន មានប្រាសាទបុរាណ និងព្រៃឈើពណ៌បៃតងដ៏ស្រស់បំព្រង។

៣. ព័រទុយហ្គាល់៖

ក្នុងចំណោមប្រទេសដែលចាយលុយអឺរ៉ូ ព័រទុយហ្គាល់ជាប្រទេសដែលភ្ញៀវទេសចរចំណាយលុយអស់តិចជាងគេ។ អ្នកអាចទៅលេងឆ្នេរស្អាតៗ កន្លែងផលិតស្រា ជ្រលងល្អប្រណិត និងទីក្រុងប្រវត្តិសាស្ត្រក្នុងតម្លៃដែលអាចតបាន។ ទេសចរជាច្រើនតែងតែរំលងទៅលេងដល់អ៊ីតាលី ខណៈដែលពួកគេមិនទាន់បានដឹងច្បាស់ពីភាពសប្បាយក្នុងប្រទេសព័រទុយហ្គាល់ និងការចំណាយលុយអស់តិចតួចនេះនៅឡើយទេ។

៤. ប៉េរូ៖

មនុស្សភាគច្រើនដែលមកលេងប្រទេសនេះ អាចជិះទូកទៅលេងព្រៃអាម៉ាហ្សូន វាលខ្សាច់ និងគោលដៅទេសចរណ៍ច្រើនទៀត។ បើគិតពីតម្លៃអាហារវិញគឺកម្រមានលើសពី៥ដុល្លារណាស់ ផ្ទះសំណាក់ឯកជនថ្លៃត្រឹមតែ២៥ដុល្លារ ហើយអ្នកក៏អាចដើរកម្សាន្តទៅកន្លែងផ្សេងទៀតក្នុងប្រទេសនេះដោយចំណាយតិចជាង៣០ដុល្លារផងដែរ។

៥. ចិន៖

មិនខុសពីប្រទេសទាំង៤ខាងលើ ប្រទេសចិនអាចឲ្យអ្នកចំណាយតិចហើយលំហែបានយ៉ាងមានក្ដីសុខ។ បន្ទប់ស្នាក់នៅតម្លៃថោកជាង២០ដុល្លារក្នុងមួយថ្ងៃ អាហារតម្លៃពី ២ទៅ៥ដុល្លារប៉ុណ្ណោះ ឯការធ្វើដំណើរក្នុងទីក្រុងនានាចំណាយមិនដល់១ដុល្លារផង។

៦. កូរ៉េខាងត្បូង៖

មិនត្រឹមតែទេសភាពដ៏ស្រស់បំព្រង និងប្រជាជនគួរឲ្យស្រលាញ់ កូរ៉េខាងត្បូងគឺជាពិភពកម្សាន្តដ៏ល្អបំផុតរបស់ភ្ញៀវទេសចរដែលចង់មកលំហែនៅអាស៊ីបូព៌ា។ ១ដុល្លារអាចដូរបាន ១១១៣ វ៉ុន ហើយការចំណាយលើរបស់ភាគច្រើនមានតម្លៃត្រឹមតែប៉ុន្មានពាន់វ៉ុនប៉ុណ្ណោះ។ អ្នកអាចទៅញ៉ាំសាច់អាំងរបស់កូរ៉េដោយមានភេសជ្ជៈ ហើយចំណាយត្រឹមតែ៨ដុល្លារក្នុងម្នាក់ប៉ុណ្ណោះ។ ក្រៅពីនេះ អ្នកនៅអាចរកបានរបស់និងសេវាកម្មថោកៗផ្សេងទៀតដើម្បីបំពេញពេលវេលាលំហែរបស់អ្នកបាន៕

ចុចអាន៖ ស្ប៉តកន្លះនាទីបាចសាចទេសចរណ៍ខ្មែរទៅពិភពលោកតាម CNN ចំណាយជិតលានដុល្លារ

ប្រែសម្រួល៖ សរ សុគន្ធី

ប្រភព៖ huffingtonpost