គេថាយុវវ័យខ្មែរកាន់តែស្រវឹងទៅៗ?

2014-09-27 17:14:50
ចំនួនមតិ 0 | ចំនួនចែករំលែក 0

ចន្លោះមិនឃើញ

តើអ្នកយល់យ៉ាងណាចំពោះយុវវ័យសេពគ្រឿងស្រវឹងនៅកម្ពុជា? សំណួរនេះ មានមតិមួយចំនួនបានលើកឡើងថា យុវវ័យបច្ចុប្បន្នកំពុងលង់លក់នៅក្នុងគ្រឿងស្រវឹង ដែលបង្កើតឲ្យមានអំពើហិង្សាផ្សេងៗ ក៏ប៉ុន្តែ មួយចំនួនបានច្រានចោលចំពោះការលើកឡើងខាងលើនេះ។

ការលើកឡើងនេះ ធ្វើឡើងបន្ទាប់ពីបណ្ដាញសារព័ត៌មានបានរាយការណ៍អំពីយុវវ័យសេពគ្រឿងស្រវឹងជោកជាំហើយបណ្ដាលឲ្យកើតមានគ្រោះថ្នាក់ចរាចរណ៍ និង អំពើហិង្សានានា ដូចជា វាយតប់គ្នានៅក្នុងពិធីរាំរែក (ក្រុមបងតូច-ក្រុមបងធំ) និង អំពើហិង្សាក្នុងគ្រួសារជាដើម។

សូមចុចអាន៖ អីចឹងតើបានទាំងប្រុសទាំងស្រីកើតស្រែងកន្លែងសម្ងាត់

លោកស្រី គាង ហ៊ុច គ្រូបង្រៀនភាសាចិននៅសាលាឯកជនមួយលើកឡើងថា យុវជនខ្មែរចាប់ផ្ដើមនិយមសុរា និង គ្រឿងស្រវឹងដទៃទៀតច្រើនឡើងៗពីមួយថ្ងៃទៅមួយថ្ងៃ។

“ពីមុន គេឃើញតែប្រុសដែលមានវ័យច្រើន មានប្រពន្ធមានកូន មានភាពស្មុគស្មាញ រឺ ហត់នឿយការរកស៊ីមុខរបរអីគេនាំគ្នាផឹក តែឥឡូវក្មេងៗសិស្សសាលាមិនទាន់ចេះរកលុយក៏ចេះញៀនស្រា ក្មេងកំលោះៗអត់មានប្រពន្ធក៏ផឹកគ្រប់កន្លែង ផឹកសេរីតាមផ្លូវ។ ឥឡូវដល់ស្រីទៀតស្រីៗក៏ផឹកដែរ ខ្លះស្រវឹងអត់ដឹងអីយប់កណ្ដាលអាធ្រាត្រស្រែកឈ្លោះគ្នាឡូឡាពេញផ្លូវ"។ លោកស្រីបន្ទោសថា ភាពសេរី និង ការផ្សព្វផ្សាយដោយចំហពីគ្រឿងស្រវឹងតាមកញ្ចក់ទូរទស្សន៍ តាមការប្រគំតន្ត្រីនានា ជាកត្តាលើកទឹកចិត្តដ៏សំខាន់ចំពោះយុវវ័យអោយសាកល្បងគ្រឿងស្រវឹង។

ក៏ប៉ុន្តែយុវជន ហួត ស៊ីថុល បានបដិសេធចំពោះការលើកឡើងខាងលើ។ គេបានអះអាងថា គ្រឿងស្រវឹងមិនមែនជាដើមហេតុនៃអំពើហិង្សាគ្រោះថ្នាក់ចរាចរណ៍ រឺ អសីលធម៌នានាទេអាស្រ័យ លើចរិតមនុស្ស។

“គេគួរចែកការសេពគ្រឿងស្រវឹងជាពីរផ្នែកមុន និង និយាយដាក់បន្ទុក។ តាមពិតវាជាភេសជ្ជៈដែលពិភពលោកគេអនុញ្ញាតអោយហូបស្របច្បាប់។ សំខាន់នៅស្រុកណាក៏ដោយ លើអាយុ ១៨ ឆ្នាំ គេអាចផឹកហើយ។ តែវាមានកម្រិតរបស់វាក្នុងការផឹក។ បើគ្រាន់តែគេឃើញផឹកមួយកែវពីរតាមផ្លូវបន្ទាប់ពីធ្វើការហត់ មានអីត្រូវរិះគន់ទៅកុំតែផឹកព្រឹកទល់ល្ងាច ច័ន្ទ ដល់ អាទិត្យអាហ្នឹងបានមានបញ្ហា។ ពិសេសអ្នកផឹកត្រូវដឹងដែរខ្លួនទៅរួចប៉ុណ្ណា ផឹកហ្នឹងទៅផ្ទះរួចអត់ ផឹកហ្នឹងក្រោកទៅធ្វើការរួចអត់។ ចំណែកនិយាយថា យុវជនមិនបានមានប្រពន្ធកូនស្មុគស្មាញអីហ្នឹង គាត់និយាយពីជំនាន់គាត់ភ្លេចថាជំនាន់នេះយុវជនគេមានសកម្មភាពសំខាន់ច្រើនណាស់ក្នុងសង្គម គេទទួលបន្ទុករកប្រាក់ជួយគ្រួសារជាច្រើនមិនមែនដូចពីសង្គមចាស់ទៀតទេ។ មួយទៀតរឿងវាយហិង្សាអីហ្នឹងខ្ញុំគិតថា មនុស្សហ្នឹងវាមនុស្សហិង្សាហ្មង គឺមនុស្សហ្នឹងមានចេតនាចង់ធ្វើអញ្ចឹង តែវាយកស្រាធ្វើលេសទេ។”

យ៉ាងណាមិញ កញ្ញា ស្រីមុំ ម្ចាស់ហាងសាច់ក្លែមមួយក្នុងរាជធានីភ្នំពេញ បានបញ្ចេញទស្សនៈដែរថា ហាងនាងបើកលក់ជាង ១០ ឆ្នាំ ហើយ មិនដែលមានបញ្ហាអ្វីកើតឡើងទេ។ នាងទទួលស្គាល់ថា មានយុវវ័យកាន់តែច្រើនដែលចេះហូបស្រា។

“តែគាត់មកហូបច្រើនហូបប៊ីយ៊ែ ហើយមិនហូបដល់ស្រវឹងខ្លាំងទេពូ គឺហូបល្មមៗ ម្នាក់ពីរបីដបអីហ្នឹង ហើយច្រើនតែថ្ងៃពួកគាត់បើកប្រាក់ខែ គឺខ្ញុំលក់ដាច់ ។”

ចុះអ្នកអានហូបគ្រឿងស្រវឹងដែរ? ចាប់អារម្មណ៍យ៉ាងណាដែរចំពោះមតិយោបល់ទាំងអស់ខាងលើ?

អត្ថបទ៖ ប៊ិន ប៊ុណ្ណា