ប្រធានសហព័ន្ធប្រដាល់ថា វង្ស ណយ រមិលគុណ រីឯគ្រូបង្វឹកសុំយកតែរួចខ្លួន

2014-09-29 14:30:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះកូននាគ វង្ស ណយ លេខមុខលើបដាផ្សព្វផ្សាយរបស់កម្មវិធីប្រដាល់ Max Muay Thai នៅប្រទេសថៃ ប៉ុន្តែដំណឹងនេះទាំងគ្រូបង្វឹករបស់វង្ស ណយ និងប្រធានសហព័ន្ធកីឡាប្រដាល់កម្ពុជាសុទ្ធតែមិនទទួលខុសត្រូវ។

លោក ឈិត សារឹម ដែលជាគ្រូបង្វឹកនៅក្លិបកងពលធំអន្តរាគមន៍លេខ៣១បានលើកឡើងថា៖ «អត់បានដឹងពីរឿងនេះទេ ខ្ញុំអត់ទទួលខុសត្រូវទេ ហើយខ្ញុំនឹងរាយការណ៍ជូនទៅសហព័ន្ធ ដើម្បីកុំឲ្យមានការស្ដីបន្ទោស ឬទម្លាក់កំហុសលើខ្ញុំ»។

លោកគ្រូបន្តថា វង្ស ណយ នាពេលនេះអត់ស្ដាប់បង្គាប់ទេ ហើយធ្វើឫកធ្វើពារសំបើមណាស់ ទាមទារតម្លៃខ្លួនខ្ពស់ហួសហេតុ។ លោកបញ្ជាក់ថា នេះជារឿងបុគ្គល ដូច្នេះបុគ្គលជាអ្នកទទួលខុសត្រូវដោយផ្ទាល់។

ស្រដៀងគ្នានេះដែរ លោក តែម ម៉ឺន ប្រធានសហព័ន្ធកីឡាប្រដាល់កម្ពុជាបានបញ្ជាក់ដែរថា កីឡាករ វង្ស ណយ មិនបានមានផ្ដល់ដំណឹងអីមកសហព័ន្ធទេ ហើយកំពុងឲ្យក្រុមការងារពិនិត្យមើលព័ត៌មាន និងរៀបចំឯកសារ ដើម្បីទុកសម្រេចយ៉ាងណា ជាមួយស្ថាប័នពាក់ព័ន្ធនៅពេលក្រោយ។

លោកសង្កត់ធ្ងន់ថា ៖ «ក្មេងហ្នឹងខ្ញុំជួយបណ្ដុះ និងជ្រោមជ្រែងតាំងពីតូច តាំងពីមិនទាន់ចេះវ៉ៃ ប៉ុន្តែដល់ឥឡូវគេចេះច្រើន គេស្គាល់ច្រើន បែរជាមានបាតុភាពផ្សេងៗទៅវិញ និយាយឲ្យសាមញ្ញទៅគឺរមិលគុណ»។

ប្រធានសហព័ន្ធខាងលើបន្ថែមថា បើទោះបីជាចេញទៅលក្ខណៈបុគ្គលក៏ត្រូវសុំការអនុញ្ញាតពីសហព័ន្ធដែរ លុះត្រាតែទៅធ្វើអ្វីផ្សេងក្រៅពីប្រដាល់ ទើបមិនបាច់សុំសហព័ន្ធ។

ដោយឡែក ខាងសាមីខ្លួនកីឡាករ វង្ស ណយ មិនអាចធ្វើការទាក់ទងដើម្បីធ្វើការបំភ្លឺជុំវិញការលើកឡើងខាងលើនេះនោះទេ ពីព្រោះទូរស័ព្ទមិនអាចទាក់ទងបាន។

នៅលើគេហទំព័ររបស់ថៃមួយបានបង្ហាញពីកីឡាករជាច្រើនរូប ដែលនឹងត្រូវប្រកួតក្នុងកម្មវិធីMax Muay Thai នៅផាត់តាយ៉ា ប្រទេសថៃ នាថ្ងៃទី០៥ ខែតុលា ឆ្នាំ២០១៤ ហើយក្នុងនោះក៏មានកីឡាករ វង្ស ណយ ម្នាក់ដែរដែលនឹងត្រូវចូលរួមប្រកួត ខណៈដែលរូបគេធ្លាប់បានប្រកាសថាលាឈប់ពីវិស័យកីឡាប្រដាល់ទៅហើយនោះ។

កន្លងមកក៏មានកីឡាករប្រដាល់មួយចំនួន បានចេញទៅប្រកួតដោយពុំមានផ្ដល់ដំណឹង ឬទទួលបានការអនុញ្ញាតពីសហព័ន្ធដែរ ប៉ុន្តែក្រោយទទួលការអប់រំ ណែនាំរួចមក ពួកគេបានគោរពតាមច្បាប់ទម្លាប់របស់សហព័ន្ធឡើងវិញ៕