កក្រើកមួយរាត្រី សមាជិកគ្រួសារជនសង្ស័យ១៤នាក់ត្រូវឃាត់ខ្លួន

2014-12-04 17:58:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ឧកញ៉ា ថោង សារ៉ាត់ សម្ងំនៅភ្នំពេញនៅឡើយ, ឆែកផ្ទះរកឃើញអាវុធ៨ដើម, សមត្ថកិច្ចត្រៀមធ្វើសន្និសីទសារព័ត៌មាន, ឧត្ដមសេនីយ៍ល្បីៗបដិសេធមិនអត្ថាធិប្បាយ, ឪពុកម្ដាយថាកូនប្រុសរត់គេចសិន ឯគាត់មិនទៅណាទាំងអស់, ពលរដ្ឋសាទរប្រតិបត្តិការរបស់ប៉ូលិស

ករណីឧកញ៉ា ថោង សារ៉ាត់ ក្លាយជាព្រឹត្តិការណ៍រសើបថ្មីមួយ ហើយការព័ទ្ធឃាត់ខ្លួនឪពុកម្ដាយឧកញ៉ារូបនេះកាលពីរាត្រីថ្ងៃពុធម្សិលមិញ បានក្លាយជាប្រធានបទជជែកថ្មីល្បីពេញប្រទេស។

សមត្ថកិច្ចត្រៀមធ្វើសន្និសីទសារព័ត៌មាន ឧត្ដមសេនីយ៍ល្បីៗបដិសេធមិនអត្ថាធិប្បាយ

អ្នកនាំពាក្យអគ្គស្នងការនគរបាលជាតិ ឧត្ដមសេនីយ៍ គៀត ច័ន្ទថារិទ្ធ ប្រាប់ Sabay នៅប៉ុន្មាននាទីមុននេះថា សមត្ថកិច្ចកំពុងប្រមូលឯកសារឲ្យបានគ្រប់គ្រាន់ រួចហើយនឹងធ្វើសន្និសីទកាសែត។ «ការតាមប្រមាញ់ចាប់ខ្លួនលោកឧកញ៉ា ថោង សារ៉ាត់ កំពុងប្រព្រឹត្តិទៅ ប៉ុន្តែសមត្ថកិច្ចនៅមិនទាន់ដឹងពីថាឧកញ៉ារូបនេះនៅទីណានៅឡើយ។ ខ្ញុំសុំមិនទាន់ផ្ដល់ព័ត៌មានលម្អិតទេ សុំរង់ចាំធ្វើសន្និសីទកាសែតតែម្តងទៅប្អូន!»។

ជាមួយគ្នានោះឧត្ដមសេនីយ៍ឯក ម៉ក់ ជីតូ ប្រធាននាយកដ្ឋានកណ្ដាលយុត្តិធម៌នៃក្រសួងមហាផ្ទៃដែលមានបទពិសោធន៍ចាស់ទុំលើសំណុំរឿងធំៗជាច្រើនបានប្រាប់ Sabay នៅម៉ោង៩ព្រឹកនេះ ថា លោកមិនបានលូកដៃក្នុងសំណុំរឿងនេះទេ ហើយថា លោកមិនទាន់មានយោបល់ជាឯកជន ឬទស្សនៈណាមួយលើការវិវឌ្ឍថ្មីនេះនៅឡើយ។ «យើងជូនទៅខាងក្រុងឲ្យគាត់ធ្វើការនៅឡើយប្អូន!»

ឆែកឆេររកឃើញអាវុធ៨ដើម

គេហទំព័រសាលារាជធានីអះអាងថា សមត្ថកិច្ចរកឃើញអាវុធ៣ដើមនៅផ្ទះឧកញ៉ា ថោង សារ៉ាត់ នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញក្នុងប្រតិបត្តិការឆែកឆេរម៉ោង ២២ និង៤០នាទីយប់ថ្ងៃពុធម្សិលមិញ ដែលនាំទៅដល់ការចាប់ឃាត់ខ្លួនអង្គរក្ស៤នាក់ និងឪពុកម្ដាយឧកញ៉ា ថោង សារ៉ាត់ ព្រមទាំងសមាជិកគ្រួសារដទៃទៀតសរុប១៤នាក់។

អាវុធ៣ដើមផ្សេងទៀតបានរុករកឃើញនៅគេហដ្ឋានទីពីររបស់គ្រួសារនេះ ហើយ២ដើមចុងក្រោយរកឃើញក្នុងរថយន្ត ធ្វើឲ្យចំនួនអាវុធសរុបឡើងដល់៨ដើម។

«យើងឃាត់ខ្លួនឪពុកម្ដាយគាត់ពីបទសមគំនិតលាក់បាំងឃាតក និងអ្នកពាក់ព័ន្ធ» ឧត្តមសេនីយ៍ គៀត ច័ន្ទថារិទ្ធ បន្ថែម។

ប្រភពសង្ស័យ ថាឧកញ៉ា ថោង សារ៉ាត់ សម្ងំនៅភ្នំពេញនៅឡើយ

ប្រភពមិនផ្លូវការពីក្រសួងមហាផ្ទៃប្រាប់ Sabay នៅមុននេះបន្តិចថា ជនសង្ស័យគឺលោកឧកញ៉ា ថោង សារ៉ាត់ ទំនងជាត្រូវបានឃាត់ខ្លួនម្ដងរួចមកហើយដំណាលជាមួយក្រុមអង្គរក្សរបស់លោក ប៉ុន្តែត្រូវដោះលែងវិញដោយសារថាសមត្ថកិច្ចមិនទាន់មានភស្តុតាងគ្រប់គ្រាន់។

មន្ត្រីប៉ូលិសច្រកទ្វារអន្តរជាតិភ្នំពេញម្នាក់ទៀតក៏ បញ្ចេញយោបល់ផ្ទាល់មកកាន់ Sabay នៅព្រឹកនេះ ថាករណីគេចខ្លួនរបស់ឧកញ៉ា ថោង សារ៉ាត់ ទំនងជាពិបាកចាកចេញផុតពីប្រទេសណាស់ ព្រោះថាចាប់តាំងពីជនរងគ្រោះត្រូវបានសម្លាប់ភ្លាមៗប៉ូលិសមានតម្រុយជាច្រើនទៅហើយ គ្រាន់តែមិនអាចបញ្ចេញឲ្យសាធារណជនដឹង។ «បើគាត់ទៅតាមច្រករបៀង ប្រហែលជាអាចថាទៅរួច អញ្ចឹងបើថាវៀតណាម ថៃអីប្រហែលជាអាចតែខ្ញុំយល់ថា គាត់ទៅណាមិនទាន់ឆ្ងាយទេ! អាចនៅភ្នំពេញនេះ!»

ប្រភពមួយផ្សេងប្រាប់ Sabay ថា ការចាប់ខ្លួនឧកញ៉ា ថោង សារ៉ាត់ ត្រូវគេរំពឹងថានឹងបានសម្រេចក្នុង២៤ម៉ោងថ្ងៃព្រហស្បតិ៍នេះ។ «ប៉ូលិសកំពុងប្រតិបត្តិការ! អាចនិយាយថា គេមានទីកន្លែងនិងតម្រុយហើយ!»

ឪពុកម្ដាយថាកូនប្រុសរត់គេចសិន ឯគាត់មិនទៅណាទាំងអស់

នៅមុនពេលដែលឪពុកម្ដាយក្រុមគ្រួសារឧកញ៉ា ថោង សារ៉ាត់ ១៤នាក់សរុបទាំងឈ្នួលបម្រើសុទ្ធតែត្រូវបានឃាត់ខ្លួនសាកសួរនៅស្នងការ អ្នកស្រី កែវ សារី ដែលអះអាងថាត្រូវជាម្តាយ និង លោក ថោង ចំរើន ត្រូវជាឪពុក បានចេញមុខមកការពារជំនួសកូនដោយប្រើសន្និសីទសារព័ត៌មានមួយកាលពីរសៀលម្សិលមិញ។

អ្នកទាំងពីរលើកឡើងថា ការចាប់ខ្លួនអង្គរក្សរបស់គ្រួសារនេះគឺមិនត្រឹមត្រូវទៅតាមនីតិវិធីដោយមិនមានដីកាបង្គាប់ពីតុលាការ ហើយថាសកម្មភាពនេះធ្វើឲ្យប៉ះពាល់យ៉ាងដំណំដល់កិត្តិយស និងមុខរបរគ្រួសារ។ «ការរកស៊ីរបស់ខ្ញុំគឺមិនដែលមានទំនាក់ទំនងអីនឹងឧកញ៉ា អ៊ឹង ម៉េងជឺ ទាល់តែសោះ ហេតុអ្វីនគរបាលចាប់អង្គរក្ស និងឧកញ៉ា ថោង សារ៉ាត់? យើងខ្ញុំនឹងប្តឹងលោកស្នងការ ជួន សុវណ្ណ ទៅតុលាការទាំង៣ថ្នាក់ ទៅក្រសួងមហាផ្ទៃ ព្រឹទ្ធសភា រដ្ឋសភា និងខុទ្ទកាល័យសម្ដេចនាយករដ្ឋមន្ត្រី»។

គាត់ថាកូនប្រុសរបស់គាត់បានគេចខ្លួនមួយរយៈដើម្បីការពារសន្តិសុខផ្ទាល់ខ្លួន ហើយថាបើតុលាការកោះអញ្ជើញស្របទៅតាមនីតិវិធីច្បាប់ កូនប្រុសរបស់គាត់នឹងបង្ហាញខ្លួន ដោយមានមេធាវីទៅជាមួយ។ ប៉ុន្តែព័ត៌មានចុងក្រោយដែល Sabay បានទទួលនៅម៉ោង៩និង៤០នាទីព្រឹកនេះ គឺគ្រួសារឧកញ៉ា ថោង សារ៉ាត់ ១៤នាក់រួមទាំងឈ្នួលបម្រើផង ត្រូវបានឃាត់ខ្លួនសាកសួរនៅស្នងការមិនទាន់ចេញរួចនៅឡើយ។

កាលពីយប់មិញលោក អ៊ិន បូរ៉ា ប្រធាននាយកដ្ឋានព្រហ្មទណ្ឌក្រសួងមហាផ្ទៃ ត្រូវបានស្រង់សម្ដីដោយ VOA មកថា សមត្ថកិច្ចបានរកឃើញចម្លើយវិជ្ជមានមួយចំនួននៅក្នុងការសាកសួរជនសង្ស័យ។ លោកថា ពិតជាមានការសារភាពពីករណីជាប់ពាក់ព័ន្ធនឹងការបាញ់សម្លាប់លោកឧកញ៉ា អ៊ឹង ម៉េងជឺ ហើយថាការសាកសួរកំពុងបន្តប្រព្រឹត្តទៅ។

ទិដ្ឋភាពច្បាប់

ក្រមព្រហ្មទណ្ឌថ្មីរបស់ប្រទេសកម្ពុជា បានកំណត់បទឃាតកម្មគិតទុកជាមុនថាជាបទឧក្រិដ្ឋដែលអាចផ្ដន្ទាទោសដាក់ពន្ធនាគារលើសពី៥ឆ្នាំ ឬដាក់ពន្ធនាគារអស់មួយជីវិត។

ត្រូវចាត់ទុកជាអ្នកផ្តើមគំនិតក្នុងបទឧក្រិដ្ឋ ឬបទមជ្ឈិម ចំពោះបុគ្គលណាដែល ១-ជំរុញឲ្យប្រព្រឹត្តិបទឧក្រិដ្ឋ ឬបទមជ្ឈិមនោះ តាមការណែនាំ ឬ ការបញ្ជា។ ២-បង្កឲ្យមានបទឧក្រិដ្ឋ ឬ បទមជ្ឈិមនោះ ដោយផ្តល់អំណោយ ដោយការសន្យា ឬ ការគំរាមកំហែង ការញុះញង់ ការលួងលោម ឬក៏ដោយការរំលោភអាជ្ញា ឬអំណាចរបស់ខ្លួន។ អ្នកផ្ដើមគំនិតនឹងអាចត្រូវផ្ដន្ទាទោសបានលុះត្រាតែបទឧក្រិដ្ឋ ឬបទមជ្ឈិមត្រូវបានសម្រេច ឬបានប៉ុនប៉ង។

ត្រូវចាត់ទុកជាអ្នកសមគំនិតក្នុងបទឧក្រិដ្ឋ ឬបទមជ្ឈិម ចំពោះបុគ្គលណាដែលជួយសម្រួលដោយចេតនាដល់ការប៉ុនប៉ង ឬការសម្រេចបទឧក្រិដ្ឋ ឬបទមជ្ឈិមនោះដោយផ្តល់ជំនួយ ឬការឧបត្ថម្ភរបស់ខ្លួន។ អ្នកសមគំនិតនឹងអាចត្រូវផ្ដន្ទាទោសបានលុះត្រាតែបទឧក្រិដ្ឋ ឬបទមជ្ឈិមត្រូវបានសម្រេច ឬបានប៉ុនប៉ង។ អ្នកសមគំនិតនៃបទឧក្រិដ្ឋ ឬបទមជ្ឈិម ត្រូវផ្ដន្ទាទោសដូចគ្នានឹងចារីដែរ។

ទំនាស់ក្ដីក្ដាំងទាក់ទងនឹងឧកញ៉ា អ៊ឹង ម៉េងជឺ

ឧកញ៉ា អ៊ឹង ម៉េងជឺ ត្រូវបានគេដឹងថា មុនពេលត្រូវបាញ់ស្លាប់លោកបានទទួលដីកាកោះហៅឲ្យចូលបំភ្លឺលើសំណុំរឿងក្តីព្រហ្មទណ្ឌថ្ងៃទី៨ ខែធ្នូ សប្ដាហ៍ក្រោយនេះដែលដើមបណ្តឹងក៏ជាឧកញ៉ាម្នាក់ដែរ។ នេះជាសំណុំរឿងទំនាស់ដីធ្លីប្រមាណ ១០ ហិចតា នៅតំបន់បឹងបាយ៉ាប សង្កាត់ភ្នំពេញថ្មី ក្នុងតម្លៃរាប់រយលានដុល្លារអាមេរិក។

ជនរងគ្រោះក៏មានពាក់ព័ន្ធនឹងបណ្តឹងច្បាប់មួយចំនួនទៀតដែរ។ នៅថ្ងៃសុក្រសប្ដាហ៍មុន ក្រុមគ្រួសារជនរងគ្រោះត្រូវបានគេបរិយាយពីការភៀសខ្លួនទៅក្រៅប្រទេសដោយហេតុផលសុវត្ថិភាព។

ពលរដ្ឋសាទរប្រតិបត្តិការរបស់ប៉ូលិសហើយបន្តតាមដានដោយចិត្តទុកដាក់

បណ្ដាញសង្គមនៅព្រឹកនេះបង្ហាញជំហរយកចិត្តទុកដាក់ថែមឡើងរបស់ពលរដ្ឋទៅលើប្រតិបត្តិការថ្មីរបស់ប៉ូលិសលើសំណុំរឿងធ្វើឃាតកណ្តាលក្រុងភ្នំពេញនេះ។

«ខ្ញុំយល់ថាប៉ូលិសខ្មែរមានជំនាញជាងមុន ហើយខ្ញុំជឿថាគេមានភស្តុតាងក្នុងដៃច្រើនហើយបានជាហ៊ានប្រាប់យើងថាអ្នកណា ព្រោះខាងជនសង្ស័យក៏មិនមែនតូចដែរ ។ យើងចាំមើលសិនទៅ!» សុខ ករុណា និស្សិតវ័យ២៣ឆ្នាំ ប្រាប់ Sabay។

«នេះជាសំណុំរឿងដែលខ្ញុំយកចិត្តទុកដាក់បំផុត! ខ្ញុំសុំតែយុត្តិធម៌! ហើយកុំឲ្យមានល្បិចស្វាលាបមាត់ពពែ!» អ៊ុំ សុភារិទ្ធ អាយុ២៦ឆ្នំា។

«ខ្ញុំមិនទាន់ជឿអ្វីៗទេរង់ចាំសាលក្រម និងការបញ្ជាក់ពីឫសគល់នៃឃាតកម្ម ទើបខ្ញុំអស់ចិត្ត! គ្រប់យ៉ាងគួរតែមានហេតុ និងមានផលរបស់វា» សេន ទីចិន្តា អាយុ២៥ឆ្នាំ។

ស្នងការរងបញ្ជាក់ប្រាប់ Sabay

លោក ជួន ណារិន ស្នងការរងនគរបាលរាជធានីភ្នំពេញ បានប្រាប់គេហទំព័រ Sabay នៅម៉ោង១០ព្រឹកនេះតាមទូរស័ព្ទថា គ្រប់យ៉ាងគឺជាកិច្ចការជំនាញ ដូច្នេះសមត្ថកិច្ចកំពុងបំពេញភារកិច្ចក្នុងសិទ្ធិលាក់ការណ៍សិន។

«បញ្ចប់ការងារសមត្ថកិច្ច នឹងឆ្លើយតបគ្រប់យ៉ាងប្អូនខាង Sabay» លោកឆ្លើយតបបែបនេះ នៅពេល Sabay បានដាក់ជាសំណួរថា ជាង ១០ ម៉ោង តាំងពីយប់ថ្ងៃទី ៣ ខែ ធ្នូ សមត្ថកិច្ចបានឡោមព័ទ្ធផ្ទះរបស់លោក ឧកញ៉ា ថោង សារ៉ាត់ តើរហូតមកទល់នឹងពេលនេះមានតម្រុយអ្វីខ្លះហើយឬនៅ? ហើយមហាជនជាច្រើនបានដាក់ចម្ងល់ថា តើជម្លោះរវាងឧកញ៉ា អ៊ឹង ម៉េងជឺ និង ឧកញ៉ា ថោង សារ៉ាត់ ធ្ងន់ធ្ងរកម្រិតណា បានឈានដល់ការបាញ់ប្រហារឆៅៗនៅតាមដងផ្លូវ?

លោកឆ្លើយតបទៀតថា ចំពោះការឃាត់ខ្លួនឪពុកម្ដាយ និងសន្តិសុខនៅបុរី ៩៩៩ គឺសមត្ថកិច្ចបានឃាត់ខ្លួនមែន ការឃាត់ខ្លួននេះ ដោយសារតែកាលពីម្សិលមិញសមត្ថកិច្ចឆែកឆេរបានរកឃើញកាំភ្លើង និងហៅសន្តិសុខមកសាកសួរជុំវិញករណីនេះ បន្ទាប់ពីការសាកសួរចប់ សមត្ថកិច្ចនឹងដោះលែងវិញហើយ។

សារព័ត៌មានក្នុងស្រុករាយការណ៍ម្សិលមិញដោយស្រង់សម្ដីស្នងការរងរាជធានីភ្នំពេញ លោក ជួន ណារិន មកថា ឧកញ៉ា ថោង សារ៉ាត់ ប្រធានក្រុមហ៊ុនបូរី៩៩៩ និង ជាថៅកែសាច់ប៉ាតេមានជ័យ៩៩៩ ស្ថិតនៅពីក្រោយឃាតកម្មលើឧកញ៉ា អ៊ឹង ម៉េងជឺ។ ប្រភពផ្សេងទៀតអះអាងថា អង្គរក្សឧកញ៉ា ថោង សារ៉ាត់ ចំនួន ២នាក់ ក្នុងចំណោម៣នាក់ដែលត្រូវបានឃាត់សាកសួរបានផ្ដិតមេដៃសារភាព៕

អត្ថបទ៖ Sabay