បាត់មុខយូរ តេង សាម៉ៅ ត្រឡប់មកវិញជាមួយនឹងការឲ្យលុយធីប

2014-12-06 16:50:40
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងវេទមន្តតាមដងផ្លូវ (Street Magic) របស់ខ្មែរលោក តេង សាម៉ៅ បានត្រឡប់មកវិញហើយ បន្ទាប់ពីខកខានបញ្ចេញឃ្លិបវីដេអូសប្បាយៗតាមដងផ្លូវជាមួយប្រជាពលរដ្ឋជាយូរមក។ មកលើកនេះ កាន់តែប្លែក លោកបានផ្លាស់ពីរបៀបលេងជាមួយសន្លឹកបៀរ នឹងលេងពីរបៀបផ្ដល់លុយធីប។

តាមរយៈវីដេអូជាង២នាទី គេឃើញលោក តេង សាម៉ៅ បានដើរចូលហាងកាហ្វេទំនើបមួយកន្លែង។ លោកបានទទួលចំណីអាហារខ្លះៗនៅទីនោះ ហើយបន្ទាប់ពីគិតលុយ សាម៉ៅ ទាររកវិក្កយបត្ររបស់លោក។ តាមពិត គឺអ្នកលេងវេទមន្តរូបនេះ ចង់ជូនប្រាក់ធីបដល់បុគ្គលិករបស់ហាងកាហ្វេ ប៉ុន្តែរបៀបនៃការជូនរបស់លោក ខុសប្លែកពីគេ ពោលគឺលោកបានប្រើទេពកោសល្យរបស់លោកប្រែក្លាយក្រដាសវិក្កយបត្រមួយសន្លឹកនោះទៅជាក្រដាសប្រាក់ដុល្លារសហរដ្ឋអាមេរិក។

លោក ថ្លែងថា "ធម្មជាតិជាមនុស្ស យើងគួរតែរៀនឲ្យប្រសើរជាងរៀនសុំពីគេ ពីព្រោះវាជាសន្ដានចិត្តនៃការចែករំលែក"។ ប្រិយមិត្តជាច្រើន បានចូលរួមផ្ញើសារគាំទ្រសកម្មភាពរបស់លោក សាម៉ៅ។ ប៉ុន្តែពួកគេនៅមានចម្ងល់មួយថា តើក្រដាសប្រាក់ធីបដែលលោកបានផ្ដល់ជូនទៅបុគ្គលិកហាងកាហ្វេ និងសន្តិសុខនោះ ពិតឬយ៉ាងណា?

លោក បានប្រាប់ Sabay យ៉ាងខ្លីថា "ពិត"។ "អាចទៅសួរអ្នកទទួលប្រាក់ពីខ្ញុំបាន...ថាពិត ឬក្លែងកា្លយ ហើយចាយបានឬអត់!”។ លោក សាម៉ៅ បន្ថែមជាមួយសំណើចសើចក្អាកក្អាយ។

អ្នកលេងវេទមន្តថ្ពិនភ្នែកមកពីខេត្តបាត់ដំបងរូបនេះ ប្រាប់ទៀតថា លោកនៅមានសកម្មភាពសប្បាយប្លែកៗមួយចំនួនទៀត ត្រៀមផ្ដល់ជនប្រិយមិត្ត ក៏ដូចជាអ្នកគាំទ្រទាំងអស់គ្នា។

ដូច្នេះ...រង់ចាំតាមដានទាំងអស់គ្នា...តែឥឡូវមើលពីរបៀបជូនលុយធីបសិន !!!

Post by Prince Samao.

អត្ថបទ៖ ទារិកា