Mazda ប្រមូលរថយន្តជាង ៨ម៉ឺនគ្រឿងព្រោះបញ្ហាពោងសុវត្ថិភាព

2014-12-06 17:09:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនផលិតរថយន្ត Mazda និងក្រុមហ៊ុនផលិតពោងសុវត្ថិភាពបំពាក់លើរថយន្ត Mazda ឈ្មោះ Takata ត្រូវអាមេរិកបង្ខំឲ្យប្រមូលរថយន្តជាច្រើនម៉ឺនគ្រឿងពីរដ្ឋជាច្រើននៅអាមេរិកដោយសារមានបញ្ហាពោងសុវត្ថិភាព។

ក្រុមហ៊ុនទាំងពីរត្រូវនាយកដ្ឋានរដ្ឋបាលគ្រប់គ្រងសុវត្ថិភាពផ្នែកចរាចរផ្លូវគោករបស់អាមេរិក (NHTSA) បង្ខំឲ្យប្រមូលរថយន្តប្រមាណ ៨៧០០០គ្រឿងត្រឡប់ទៅវិញ ដោយសំអាងថាមានអ្នកមនុស្សស្លាប់ចំនួន ៥នាក់ដោយសារបញ្ហាពោងសុវត្ថិភាពក្នុងរថយន្ត Mazda ។ បើតាម NHTSA បានឲ្យដឹងថា ពោងសុវត្ថិភាពដែលបំពាក់ក្នុងរថយន្ត Mazda ដែលមានបញ្ហាអាចផ្ទុះ និងខ្ទាតអំបែងដែកចូលខាងក្នុងរថយន្ត ជាហេតុបង្កឲ្យមានអ្នកស្លាប់កើនឡើងដល់ទៅ ៥នាក់។

Mazdaspeed6 ស៊េរី ២០០៦ ដែលស្ថិតក្នុងបញ្ជីប្រមូលទៅវិញរបស់ Mazda

ក្រុមហ៊ុនផលិតរថយន្ត Mazda បានធ្វើតាមការកោះហៅរបស់ NHTSA ចំពោះការប្រមូលរថយន្តប្រមាណជាង ៨ម៉ឺនគ្រឿង។ រដ្ឋនិងតំបន់ជាច្រើននៅអាមេរិកដែលតម្រូវឲ្យ Mazda និង Takata រួមគ្នាប្រមូលរថយន្ត Mazda យកទៅវិញនោះរួមមាន Florida, Puerto Rico, Hawaii, Texas, Louisiana, Mississippi, Alabama, Georgia, Guam, Saipan និងSamoa។

ដោយឡែកចំពោះក្រុមហ៊ុន Takata បានបដិសេធចំពោះការកោះហៅនេះដោយសំអាងថាខ្លួនគ្រាន់តែអ្នកផ្គត់ផ្គង់សម្ភារៈសម្រាប់រថយន្តប៉ុណ្ណោះ ហើយថាអាចនឹងមានបញ្ហាអ្វីនៅពីក្រោយហេតុការណ៍ដែលបានកើតឡើងធ្វើឲ្យមានអ្នកស្លាប់រហូតដល់ ៥នាក់នោះ។ ម៉ូដែលដែល Mazda ប្រមូលមកវិញនោះរួមមាន Mazda 6 (២០០៣-២០០៧), RX-8 (២០០៤-២០០៨), Mazdaspeed6 (២០០៦-២០០៧), MPV (២០០៤-២០០៥) និងរថយន្តដឹកទំនិញ B-Series (ស៊េរី ២០០៤)។

ឆ្លើយតបនឹងការបដិសេធនេះ នាយកដ្ឋាន NHTSA បានពិន័យក្រុមហ៊ុន Takata ក្នុងទឹកប្រាក់ចំនួន ៧ពាន់ដុល្លារក្នុងមួយថ្ងៃចំពោះការយឺតយ៉ាវប្រមូលរថយន្ត។ ក្រុមហ៊ុនផលិតពោងសុវត្ថិភាពក្នុងរថយន្ត Takata បានប្រមូលរថយន្តសរុបទូទាំងពិភពលោកដល់ទៅ ១៤ លានគ្រឿងហើយ។ ក្រៅពី Mazda កន្លងមកក្រុមហ៊ុន BMW, Chrysler, Ford, Honda, Nissan, Toyota, និង Subaru ក៏ធ្លាប់ប្រមូលរថយន្តដែលផ្គត់ផ្គង់បច្ចេកវិទ្យាពោងសុវត្ថិភាពដោយក្រុមហ៊ុនមួយនេះដែរ៕

អានព័ត៌មានពីរថយន្តទំនើបៗចុចត្រង់នេះ

ប្រែសម្រួល៖ ប៉ែត ផាន់និត ប្រភព៖ bbc