ថោង សារ៉ាត់ នៅបាត់ខ្លួន ឪពុក-ម្តាយបន្ទន់ជំហរ

2014-12-08 02:56:50
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រួសារជនសង្ស័យអាចមានទ្រព្យដល់ទៅ ៨០ លានដុល្លារអាមេរិក, តុលាការចេញដីកាឃុំឪពុក-ម្តាយ, ប៉ូលិសរាយកម្លាំងឃ្លាំនៅច្រកភ្នំដិន និង ព្រែកចាក , ការផ្សាយព័ត៌មានមិនពិតលើការចាប់បានជនសង្ស័យ អាចត្រូវចាត់ថារារាំងកិច្ចការសមត្ថកិច្ច , ប៉ូលិស និង កងរាជអាវុធហត្ថអះអាងថា មិនទាន់រកឃើញជនសង្ស័យនៅឡើយ....

នៅក្នុងការវិវឌ្ឍចុងក្រោយនៃសំណុំរឿងបាញ់សម្លាប់ឧកញ៉ា អ៊ឹង ម៉េងជឺ ដែលមហាជនបាននឹងកំពុងតាមដានដោយយកចិត្តទុកដាក់នោះ សាលាដំបូងបានសម្រេចឃុំខ្លួន ម្ដាយ និង ឪពុក ជនជាប់សង្ស័យ ថោង សារ៉ាត់ ដែលរហូតមកដល់ពេលនេះជនសង្ស័យជាកូននៅរត់គេចខ្លួននៅឡើយ។

ប្រភពនៅសាលាដំបូងប្រាប់ Sabay នៅល្ងាចមិញនេះថា ដោយជាប់ចោទពីបទ លាក់អាវុធខុសច្បាប់ និង ព្យាយាមរារាំងការងារសមត្ថកិច្ច លោក ថោង ចំរើន ជាឪពុក និង អ្នកស្រីកែវ សារី ត្រូវជាម្តាយត្រូវបញ្ជូនទៅកាន់ពន្ធនាគារព្រៃសរង់ចាំការជំនុំជម្រះក្ដីថ្ងៃក្រោយ។ ទោះបីយ៉ាងណា ប្អូនប្រុស និង ភរិយា របស់ជនសង្ស័យ ថោង សារ៉ាត់ ត្រូវបានដោះលែងវិញ នាព្រឹកថ្ងៃទី ៧ ខែ ធ្នូ នេះ បន្ទាប់ពីបានឃាត់ខ្លួនសាកសួរ។

មន្ត្រីសាលាដំបូងរាជធានីភ្នំពេញបានឲ្យដឹងថា ចៅក្រម ស្វាយ តុច បានចេញដីកា ឃុំខ្លួន លោក ថោង ចំរើន និង អ្នកស្រី កែវ សារី បន្ទាប់ពីបានសាកសួរពេញមួយព្រឹកកាលពីថ្ងៃអាទិត្យនេះ។

ឳពុកម្តាយសូមទោសស្នងការក្រុង

នៅចំពោះមុខបណ្តាញព័ត៌មាន មុនត្រូវបញ្ជូនទៅកាន់ពន្ធនាគារព្រៃ ស អ្នកស្រី កែវ សារី និង លោក ថោង ចំរើន ដែល បានថ្លែងសូមទោសឧត្ដមសេនីយ៍ឯក ជួន សុវណ្ណ ស្នងការនគរបាលរាជធានីភ្នំពេញ ដែលអ្នកទាំងពីរ បានប្រើពាក្យសម្ដីមិនគប្បី ដោយព្រមានប្តឹងផ្តល់កាលពីពេលធ្វើសន្និសីទកាសែតដំបូង។

អ្នកទាំងពីរបាននិយាយប្រាប់ក្រុមអ្នកសារព័ត៌មានថា “ខ្ញុំសូមទោសទៅកាន់ឯកឧត្ដម ជួន សុវណ្ណ ខ្ញុំដឹងខុស ខ្ញុំសូមទោស ហើយដោះលែងមិនដោះលែងអាស្រ័យលើលោក”។

http://youtu.be/rgj-oLVaNfE?list=UUY70LlkxiaPm2VEOvN_cmaQ

អ្នកច្បាប់បញ្ចេញយោបល់

លោក មេធាវី សុក សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា បានបញ្ចេញយោបល់មកកាន់ Sabay ថា ការសូមទោស មិនអាចធ្វើឲ្យអ្នកទាំងពីររួចទោសបានទេ ប្រសិនបើការជំនុំជម្រះរកឃើញថា ពួកគាត់មានកំហុសមែន។

« ការបន្ទន់ឥរិយាបថបែបនេះ អាចជាស្ពានឆ្ពោះទៅរកស្ថានសម្រាលទោស ប៉ុន្តែ ខ្ញុំបញ្ជាក់មិនអាចរួចទោសបាននោះទេ!» លោកបន្ថែម។

ប្រសិនបើតុលាការរកឃើញកំហុសដូចការចោទប្រកាន់ ឪពុក-ម្ដាយ ជនជាប់សង្ស័យ អាចជាប់ពន្ធនាគារពី ៦ ខែ ទៅ ៣ ឆ្នាំ និង ពិន័យជាប្រាក់ពី ១ លានរៀលទៅ ៦ លានរៀលតាមក្រមព្រហ្មទណ្ឌមាត្រា ៤៩០ ពីបទលាក់ទុក និង ប្រើប្រាស់អាវុធខុសច្បាប់។

លោកមេធាវី សុក សំអឿន ក៏បានលើកបន្ថែមនូវមាត្រា ៩០៦ ស្ដីពីបទជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ ដែលបើកផ្លូវដល់ការផ្ដន្ទាទោសពី ១ ឆ្នាំ ទៅ ៣ ឆ្នាំ និង ពិន័យជាប្រាក់ពី ពីរលានរៀល ទៅ ប្រាំមួយលានរៀល។

បណ្តាញព័ត៌មាន ស្ថិតក្នុងការតាមដានរបស់សមត្ថកិច្ចលើការផ្សាយព័ត៌មានមិនពិតជុំវិញការ ចាប់បានជនសង្ស័យ

ថ្ងៃសៅរ៍ចុងសប្ដាហ៍មុននេះ ពាក្យចចាមអារ៉ាមបានសាបព្រោះពេញទំហឹងថា សមត្ថកិច្ចឆ្មក់ចូលតំបន់មួយក្បែរ ព្រំដែនកម្ពុជា-វៀតណាម ដើម្បីចាប់ចង លោក ថោង សារ៉ាត់ ។ ខ្លះថាចាប់បាននៅវៀតណាម ហើយខ្លះថា ចាប់បាននៅច្រកព្រំដែនកម្ពុជា-វៀតណាម ព្រែកចាក។

ឧត្តមសេនីយ៍មួយរូបប្រាប់ Sabay ក្នុងលក្ខខ័ណ្ឌមិនបញ្ចេញឈ្មោះថា ការបង្កើតរឿងមិនពិតលើសំណុំរឿងកំពុងរសើប ពិសេសការបំភន្ត័មតិមហាជនថាសមត្ថកិច្ចរកឃើញជនសង្ស័យ គឺស្មើនឹង ការអុកឡុកការងារប៉ូលិសហើយថា បណ្ដាញផ្សព្វផ្សាយដែលចេញការពណ៌នាដោយគ្មានប្រភព និង គ្មានការទទួលខុសត្រូវដើម្បីតែប្រយោជន៍បុគ្គល រឺ ស្ថាប័នខ្លួនកំពុងទទួលការឃ្លាំមើល។

លោក ជួន ណារិន្ទ ស្នងការរងនគរបាលរាជធានីភ្នំពេញ បានបញ្ជាក់ប្រាប់ Sabay ថា រហូតមកទល់នឹងពេលនេះ សមត្ថកិច្ចនៅមិនទាន់ចាប់បានជនសង្ស័យ ដែលជាមេខ្លោង នៅឡើយទេ។“ខ្ញុំអត់ដឹងព័ត៌មាននេះទេ មានគេទូរសព្ទសួរខ្ញុំដែរ! សមត្ថកិច្ចកំពុងបន្តធ្វើការ ដូច្នេះសុំទុកអោយប៉ូលិសធ្វើការ! »

លោក ឆៃ ស៊ីណារិទ្ធិ ប្រធាននាយកដ្ឋានសន្តិសុខផ្ទៃក្នុងនៅក្រសួងមហាផ្ទៃបានបញ្ជាក់ដែរថា សមត្ថកិច្ចនៅមិនទាន់ចាប់បាន លោក ថោង សារ៉ាត់ បាននៅឡើយ ប៉ុន្តែថា សមត្ថកិច្ចកំពុងដុតដៃដុតជើងលើករណីនេះហើយ។

លោក អ៊ុក សំណាង ស្នងការនគរបាលខេត្តតាកែវ អះអាងភ្លាមៗប្រាប់ Sabay ពេលមានព័ត៌មានថា មានការចាប់ខ្លួនជនជាប់សង្ស័យនៅក្នុងមូលដ្ឋានរបស់លោកនោះថា កម្លាំងសមត្ថកិច្ចបានបិទច្រករបៀងតូច-ធំ រួមទាំងច្រកទ្វារអន្តរជាតិភ្នំដិនហើយថា គេនៅមិនទាន់មានតម្រុយទីតាំងដែលជនសង្ស័យអាចនឹងជ្រកកោនទេ។

មន្ត្រីនាំពាក្យកងរាជអាវុធហត្ថ លោក ខេង ទីតូ ក៏បាននិយាយប្រាប់ Sabay កាលពីរសៀលថ្ងៃអាទិត្យនេះដែរថា រហូតមកទល់នឹងពេលនេះ សមត្ថកិច្ច រួមទាំងកម្លាំងរាជអាវុធហត្ថពុំទាន់ចាប់ជនសង្ស័យ លោក ឧកញ៉ា ថោង សារ៉ាត់ នៅឡើយ។ លោកចាត់ទុកថា ព័ត៌មានថា ចាប់បានជនសង្ស័យ គឺគ្រាន់តែជាពាក្យចចាមអារ៉ាមប៉ុណ្ណោះ។

លោកបានបញ្ជាក់ថា សមត្ថកិច្ចបានរាយកម្លាំងគ្រប់ទីកន្លែង គ្រប់ច្រកព្រំដែន ហើយលោកជឿថា លោក ថោង សារ៉ាត់ នៅពួនក្នុងប្រទេសកម្ពុជានៅឡើយ ដែលសមត្ថកិច្ចនឹងព្យាយាមរកឲ្យឃើញ ។ “វាមិនស្រួលទេប្អូនគេព្យាយាមលាក់ខ្លួន ឯយើងតាមចាប់ តែខ្ញុំជឿថា សមត្ថកិច្ចនឹងរកឃើញមិនខាន”។

ករណីឃាត់ខ្លួនសាកសួរភរិយា និង ប្អូនប្រុស ជនសង្ស័យ

ករណីឃាត់ខ្លួនសាកសួរភរិយា និង ប្អូនប្រុស ជនសង្ស័យសាលាដំបូងរាជធានីបានសម្រេចដោះលែង លោក ថោង បូណា ដែលត្រូវជាប្អូនប្រុសបង្កើត និង អ្នកស្រី ទាវ ធីតា ភរិយាទី២ របស់លោក ថោង សារ៉ាត់ ឲ្យមានសេរីភាព កាលពីព្រឹកមិញនេះ បន្ទាប់ពីរកឃើញថា មិនបានជាប់ពាក់ព័ន្ធក្នុងសំណុំរឿងសម្លាប់ ឧកញ៉ា អ៊ឹង ម៉េងជឺ។ នេះបើយោងតាមបណ្ដាញសារព័ត៌មាននានារាយការណ៍នៅថ្ងៃអាទិត្យ។

គ្រួសារជនសង្ស័យមានទ្រព្យប្រមាណជា៨០លានដុល្លារ ប្រភពមិនផ្លូវការមកពីក្រុមវាយតម្លៃអចលនៈវត្ថុ និង ទំហំពាណិជ្ជកម្មអះអាងប្រាប់ Sabay ថា គ្រួសារលោក ថោងសារ៉ាត់ មានដីធ្លី មុខរបរអាហារ និង សំណង់ដែលមានប្រាក់សរុបលើការប៉ាន់ស្មានមិនក្រោម ៨០ លាន ដុល្លាអាមេរិកឡើយ។ ការប៉ាន់ប្រមាណនេះមិនរាប់បញ្ចូលនូវកម្មសិទ្ធិដីរួមគ្នាជាមួយអ្នកដទៃ និង ភាគហ៊ុននៅឯក្រុមហ៊ុនផ្សេងៗដែលមិនបានបញ្ចេញអោយដឹងជាសាធារណៈនោះផង។ ចំណូលសំខាន់របស់គ្រួសារនេះ គឺប៉ាតេ ៩៩៩ ដែលចរាចរណ៍ទូទំាងប្រទេស និង បានទទួលជោគជ័យជាខ្លាំង។ អ្នកស្រីកែវសារីជាអ្នកដើរតួនាទីយ៉ាងសំខាន់ និង សកម្មបំផុតលើមុខរបរនេះ។

វាសនាអង្គរក្សទាំង ៤

សាលាដំបូងកាលថ្ងៃសុក្រសប្ដាហ៍ បានសម្រេចចោទប្រកាន់ជនសង្ស័យទាំង ៤ នាក់ ជាអង្គរក្ស ឧកញ៉ា ថោង សារ៉ាត់ ពីបទមនុស្សឃាតគិតទុកជាមុនលើឧកញ៉ា អ៊ឹង ម៉េងជឺ និង បញ្ជូនទៅឃុំខ្លួនក្នុងពន្ធនាគារ។ ជនសង្ស័យទាំង ៤ នាក់ រួមមាន ឈ្មោះ សៀង វាសនា ជាឃាតកដៃដល់ ឈ្មោះ លី សៅ ជាអ្នកបើកម៉ូតូឌុបឃាតក ឈ្មោះ កុយ ច័ន្ទថុល និង មាស សម្បត្តិ ជាអ្នកជិះម៉ូតូតាមពីក្រោយ។

នៅក្រៅសាលាដំបូងមេធាវីការពារជនរងគ្រោះអះអាងថា កូនក្តីលោកបានសារភាពហើយ៕