ឡូយហ្មង...ក្រោយធ្លាក់ពី The Voice Cambodia ចំរើន សុភ័ក្ត្រ រឹតតែឡើង!!!

2014-12-13 16:34:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្ដើមពីនិស្សិតសាកលវិទ្យាល័យភូមិន្ទវិចិត្រសិល្បៈ និងជាអ្នកចម្រៀងបុរាណម្នាក់ កញ្ញា ចំរើន សុភ័ក្ដ្រ បានធ្វើឲ្យមានការចាប់អារម្មណ៍កាន់តែច្រើន ក្រោយធ្លាក់ពី The Voice Cambodia ក្នុងនោះ ថែមទាំងមានហាងឆេងខ្ពស់ទៀត។

"ច្រៀងមង្គលការ គឺធម្មតាទៅហើយ តាំងពីមុនប្រឡង The Voice Cambodia ទៀត តែសម័យទើបទទួលបានឥឡូវទេបង"។ កញ្ញា ចំរើន សុភ័ក្ដ្រ បានប្រាប់ Sabay ទៀតថា នាងទទួលបានការហៅឲ្យច្រៀងក្នុងកម្មវិធីធំៗមួយចំនួន តាំងពីចប់ The Voice Cambodia មក ក្នុងនោះមានកម្មវិធីរបស់ធនាគារ ANZ Royal ភេសជ្ជៈ បាកាស និងក្រុមហ៊ុន Nestle ជាដើម។

មិនត្រឹមប៉ុណ្ណឹង ផលិតកម្មមួយចំនួនក៏ចាប់អារម្មណ៍លើកញ្ញាដែរ។ "ចំណែកផលិតកម្មវិញ ក៏មានខ្លះដែរបង តែមិនទាន់សំរេច!”។ កញ្ញា សុភ័ក្ដ្រ បន្ថែម។

ចំរើន សុភ័ក្ត្រ គឺជានិស្សិតសាកលវិទ្យាល័យភូមិន្ទវិចិត្រសិល្បៈជំនាញចម្រៀងបុរាណ ឆ្នាំទី ៤។ កញ្ញាថ្លែងថា តាំងពីដឹងក្ដីមក គឺនាងស្រឡាញ់សិល្បៈមួយនេះ(ចម្រៀងបុរាណ)រហូតមក។ ប៉ុន្តែក្រោយពីប្រឡងកម្មវិធី The Voice Cambodia មក អ្វីៗបានផ្លាស់ប្ដូរមក៥០%ម្នាក់ រវាងបុរាណ និងសម័យ។ យ៉ាងណាកញ្ញា អះអាងថា គ្មានថ្ងៃនាងទម្លាក់បុរាណស្រវាយកតែសម័យនោះទេ។

សុភ័ក្ដ្រ បានត្រឹមឈានដល់វគ្គផ្ដាច់ព្រ័ត្រក្នុងកម្មវិធី The Voice Cambodia ឆ្នាំទី១ ជាមួយបេក្ខជន៣រូបផ្សេងទៀតរួមមាន ឃុន វុត្ថា មកពីខេត្តព្រៃវែង សយ រតនៈ មកពីខេត្តកំពង់ឆ្នាំង និងបេក្ខជន ប៊ុត សីហា មកពីខេត្តកំពង់ស្ពឺ ប៉ុន្តែកញ្ញាមិនបានជយលាភីទេ។ បើទោះមិនទទួលជយលាភី ប៉ុន្តែកញ្ញាអះអាងថា មិនបាក់ទឹកចិត្តទេ។ "ធម្មតាប្រឡងមិនថាយើង មិនថាគេ ចេះតែចង់ឈ្នះហើយ ប៉ុន្តែខ្ញុំក៏អត់បាក់ទឹកចិត្តអីដែរបង ខ្ញុំមិនរំពឹងថា នឹងបានមកដល់វគ្គហ្នឹងផង!”។

ក្រៅពីទទួលបានការងារសិល្បៈមួយចំនួនដូចខាង កញ្ញា ចំរើន សុភ័ក្ដ្រ ត្រៀមនឹងបង្ហាញខ្លួនក្នុងកម្មវិធីរបស់ Sky Club ជាមួយបេក្ខជនវគ្គចុងក្រោយរបស់ The Voice Cambodia ៣នាក់ទៀតនៅយប់នេះ។ ដោយឡែកនៅថ្ងៃអាទិត្យស្អែកវិញ កញ្ញា នឹងឡើងកម្មវិធី "តន្ត្រីពិសេស" របស់ទូរទស្សន៍ហង្សមាសទៀត។

កញ្ញា ចំរើន សុភ័ក្ដ្រ មានវ័យ ២៤ឆ្នាំ កើតនៅរាជធានីភ្នំពេញ។ ឪពុករបស់កញ្ញា ឈ្មោះ ហ៊ល ចំរើន អតីតសិល្បករសៀក ឯម្ដាយឈ្មោះ ឡាច រ៉ានី ជាមេផ្ទះ។ សុភ័ក្ដ្រ មានបងប្អូនចំនួន៣នាក់(ស្រី២ ប្រុស១) កញ្ញាជាកូនទី២។ បងប្អូនពីរនាក់ទៀត សុទ្ធជាអ្នកសិល្បៈទាំងអស់៕