ស្ទើរស្រក់ទឹកភ្នែក ព្រោះស្ពានចំណាស់ខ្មែរស្អាតតែបាត់បង់

2014-12-16 22:04:30
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងទំព័រផ្លូវការរបស់សាលារាជធានីភ្នំពេញ រូបភាពស្ពានខាងលើនេះ មានឈ្មោះថា ស្ពានដុល្លា សម្រាប់ឆ្លងព្រែកមួយ តែគួរឲ្យស្ដាយវាត្រូវបានគេលុបចោលទៅហើយ។ ព្រែកនោះលុបតាំងពីសម័យបារាំងមកម្ល៉េះ ហើយទីតាំងស្ពាននេះ បើគិតមកដល់សព្វថ្ងៃស្ថិតនៅម្ដុំផ្សាររាត្រីបច្ចុប្បន្ន។

ទាក់ទងនឹងរូបភាពស្ពាននេះ លោក សាស្ត្រាចារ្យ សំបូរ មាណ្ណារ៉ា បង្រៀនមុខវិជ្ជាប្រវត្តិសាស្ត្រនៅសាកលវិទ្យាល័យបញ្ញាសាស្ត្រកម្ពុជា បានរៀបរាប់ប្រាប់ Sabay ថា ស្ពានដែលមានតាំងពីសម័យបារាំង បើគិតមកដល់បច្ចុប្បន្ន ស្ពាននេះ អាចមានអាយុកាលជាង ៧០-៨០ ឆ្នាំហើយ ដូច្នេះវាអាចមានភាពចាស់សឹករិចរិល។

ការបាត់បង់ស្ពានអាចមកពីកត្តាជាច្រើន ដូចជា អាចមកពីការអភិវឌ្ឍន៍ ព្រោះគេត្រូវការដឹកជញ្ជួនធ្ងន់ៗឆ្លងកាត់ស្ពាន តែស្ពានមានភាពពុកផុយមិនអាចទ្រទម្ងន់បាន ម្យ៉ាងគេអភិវឌ្ឍន៍ពីផ្លូវទឹកមកផ្លូវគោក។ ដូច្នេះការបាត់បង់ អាចជារឿងមួយដ៏ត្រឹមត្រូវ។ បើមិនចង់បាត់បង់ស្ពាន ទាល់តែដូរផ្លូវចេញ ឧទាហរណ៍ ដូចជា ស្ពានកំពង់ក្ដី ដែលជាស្ពានបុរាណ បើសិនជារដ្ឋាភិបាលលោកមិនដូរផ្លូវចេញទេ មានតែ កម្ទេចស្ពានកំពង់ក្តីចោល ប៉ុន្តែបើគេចង់ទុកមានតែដូរផ្លូវចេញ។ នេះជាវិធីមួយដែលអាចរក្សាទុកស្ពានបាន ប៉ុន្តែក៏មានស្ពានសល់ពីសម័យបារាំងជាច្រើនទៀតដែលនៅសេសសល់ ជាស្ពានបុរាណដែលគេទុកវាឲ្យនៅដដែល មិនប្រើប្រាស់ហើយទុកជានិមិត្តរូប។

លោកបន្តថា ការបាត់បង់ស្ពានពេលខ្លះមិនអាចបន្ទោសអ្នកណាបានទេ ព្រោះរាជរដ្ឋាភិបាលលោកក៏ចង់បានដែរនូវការអភិរក្ស តែការអភិវឌ្ឍក៏ត្រូវតែមាន។ យើងទាំងអស់គ្នាគួរគិតថាអ្វីក៏ដោយមិនអមតៈឡើយ នៅថ្ងៃណាមួយវានឹងបាត់បង់។

ប៉ុន្ដែ សម្រាប់អ្នកប្រើប្រាស់បណ្ដាញសង្គម Facebook បានបញ្ចេញយោបល់ថា ការបាត់បង់ស្ពានដូចរូបខាងលើគឺជារឿងស្ដាយ ព្រោះរចនាបថដ៏ស្រស់ស្អាតនៃស្ពាន។ នៅក្នុងការបញ្ចេញយោបល់របស់ពួកគេ បានលើកឡើងទៀតថា បើស្ពាននេះបានបន្សល់ដល់សព្វថ្ងៃមិនដឹងល្អយ៉ាងណាទេ។ នេះបើតាមការលើកឡើងពីអ្នកប្រើប្រាស់បណ្ដាញសង្គម Faccebook។