សុខាភិបាលបាត់ដំបង ឆ្លើយតបករណីស្ទើរមួយភូមិឆ្លងជំងឺអេដស៍

2014-12-16 20:13:03
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបងបានប្រាប់ Sabay ថា ករណីដែលមានការផ្សព្វផ្សាយថា អ្នកភូមិមួយនៅបាត់ដំបង មានឆ្លងមេរោគអេដស៍រហូតដល់ ៣០០ នាក់ មិនមែនជាការពិតនោះទេ។ លោកថា ការធ្វើតេស្តឈាម មានអ្នកផ្ទុកមេរោគអេដស៍ប្រាកដមែន។ ប៉ុន្តែមិនច្រើនរហូតដល់ ៣០០ នាក់ ឬស្ទើរ ១០០% នៃប្រជាជនរស់នៅក្នុងភូមិនោះឡើយ។

កាលពីម្សិលមិញមានការផ្សព្វផ្សាយថា អ្នកភូមិរកា ឃុំរកា ស្រុកសង្កែ ក្នុងខេត្តបាត់ដំបងប្រមាណ ៣០០ នាក់មានផ្ទុកមេរោគអេដស៍ បន្ទាប់ពីធ្វើតេស្តឈាម។

“យើងបានធ្វើតេស្តឈាម ចាប់តាំងពីថ្ងៃទី ៨ ដល់១៥ ខែធ្នូ លើប្រជាជន៤០០ នាក់ ហើយរបាយការណ៍បឋមមានអ្នកផ្ទុកមេរោគអេដស៍ ១០% ប៉ុណ្ណោះគិតត្រឹមម៉ោង៥ ល្ងាចម្សិលមិញ។ នេះគឺជាតួលេខខ្ពស់ និងគួរឲ្យសោកស្តាយបំផុត។ ចំពោះមូលហេតុ នៃការឆ្លងយើងត្រូវរង់ចាំលទ្ធផលផ្លូវការសិនថា តើបណ្តាលមកពីការចាក់ថ្នាំ ឬការប្រើប្រាស់គ្រឿងញៀន”។ លោក វឿង ប៊ុនរ៉េត បន្ថែម។

ជុំវិញបញ្ហានេះដែរ លោកវេជ្ជបណ្ឌិត មាន ឈីវ៉ុន ប្រធានមជ្ឈមណ្ឌលជាតិប្រយុទ្ធជំងឺអេដស៍ សើស្បែក និងកាមរោគ នៃក្រសួងសុខាភិបាលបានប្រាប់ Sabay មុននេះថា អាជ្ញាធរជាតិកំពុងធ្វើការសិក្សាឲ្យលំអិតជុំវិញបញ្ហានេះ។ លោកថា អត្រាឆ្លងរីករាលដាលនៃជំងឺអេសដ៍ពីមួយឆ្នាំទៅមួយឆ្នាំ មានការថយចុះជាលំដាប់ រហូតដល់ឆ្នាំ២០១៤ នេះយើងអាចទស្សន៍ទាយបានថា មួយថ្ងៃមានអ្នកឆ្លងជំងឺអេសដ៍ចន្លោះពីពីរនាក់ ឬប្រមាណ ៨៨៩ នាក់ប៉ុណ្ណោះ ក្នុងមួយឆ្នាំ៕

អត្ថបទ៖មៃ សុខលីម