សួន ពិសិដ្ឋ ត្រៀមចេញ MV មេឡូឌី ថ្មីសុទ្ធមួយអាល់ប៊ុមជាមួយ ឱក សុគន្ធកញ្ញា!

2014-12-17 18:06:16
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សួន ពិសិដ្ឋ ត្រៀមនឹងចេញអាល់ប៊ុមចម្រៀងជាមេឡូឌីថ្មីសុទ្ធលើកដំបូង ចំនួន ១១ បទ ជាមួយតារាចម្រៀង កញ្ញា ឱក សុគន្ធកញ្ញា ក្នុងឱកាសចូលឆ្នាំសកលខាងមុខ។

ការត្រៀមចេញ MV ក៏ដូចជាការបោះជំហានទៅកាន់អាជីពជាអ្នកចម្រៀង ខណៈលោកទទួលការគាំទ្រ និង មានឈ្មោះល្បីល្បាញនាពេលកន្លងមកលើការនិពន្ធបទភ្លេងថ្មី។

អ្នកនិពន្ធបទភ្លេង និង ជាតារាចម្រៀង លោក សួន ពិសិដ្ឋ និយាយថា៖ "បទចម្រៀងរបស់ខ្ញុំលើកដំបូងជាមួយ សុគន្ធកញ្ញា នឹងចេញដើមឆ្នាំនេះ។ "មិនដឹងជាយ៉ាងណាទេអូន អាស្រ័យលើបងប្អូនយើងដែរ អារឿងលេចធ្លោហ្នឹង ព្រោះយើងធ្វើតែបទថ្មីសុទ្ធមិនចម្លងពីនរណាម្នាក់ឡើយ"។

សួន ពិសិដ្ឋ ថតជាមួយ ឱក សុគន្ធកញ្ញា ក្នុងបន្ទាប់ Studio

លោកបន្តថា បទចម្រៀងមួយវ៉ុលសុទ្ធជាមួយតារាចម្រៀងស្រីល្បីឈ្មោះខាងលើ បានចេញជា CD លក់លើទីផ្សាររួចមកហើយ នាពេលកន្លងមក។ ដោយឡែក សម្រាប់ MV នឹងត្រៀមចេញក្នុងពេលបន្ទាប់ ដែលជាស្នាដៃនិពន្ធថ្មីសុទ្ធសាធរបស់ខ្លួន។

លោក សួន ពិសិដ្ឋ ជាអ្នកនិពន្ធបទភ្លេងថ្មីល្បីឈ្មោះទទួលការគាំទ្រជាខ្លាំងពីទស្សនិកជនអំឡុងធ្វើជាអ្នកនិពន្ធក្នុងផលិតកម្ម Rock។ ភាពល្បីឈ្មោះនេះ បានធ្វើឱ្យលោកឈ្នះពានពីរឆ្នាំជាប់គ្នាគឺឆ្នាំ ២០១២ និង ឆ្នាំ២០១៣ កន្លងទៅ ក្នុងកម្មវិធីអាណាចក្រតារា។

តារាចម្រៀង និង ជាអ្នកនិពន្ធរូបនេះបន្ថែមទៀតថា ដោយមើលឃើញថាអាជីពជាអ្នកនិពន្ធទទួលបានផ្លែផ្កាគួរឱ្យកត់សម្គាល់ហើយ លោកក៏ចាប់ផ្ដើមប្រឡូកចូលអាជីពជាអ្នកចម្រៀងមួយទៀតកាលពីពេលថ្មីៗ ដោយត្រៀមចេញ MV ជាមួយតារាចម្រៀងស្រីល្បីឈ្មោះ ឱក សុគន្ធកញ្ញា ទៀតផង។

ក្រៅតែពីការចាប់ដៃជាមួយ ឱក សុគន្ធកញ្ញា លោក សួន ពិសិដ្ឋ ត្រៀមនឹងចាប់ដៃគូនឹងតារាចម្រៀងស្រីជាច្រើនទៀតនៅក្នុងផលិតកម្ម ហង្សមាស ដោយលោកត្រៀមបទចម្រៀងថ្មីសុទ្ធច្រើនបទជាការនិពន្ធផ្ទាល់តែម្ដង។

សកម្មភាពថតបទចម្រៀង សួន ពិសិដ្ឋ កាលពីពេលកន្លងទៅ

“ខ្ញុំគិតរួចហើយ ថៅកែខ្ញុំក៏គាត់អនុញ្ញាតដែរ ក្រៅតែពីដៃគូជាមួយ សុគន្ធកញ្ញា ខ្ញុំនឹងមានដៃគូជាច្រើនទៀតត្រូវច្រៀងជាមួយខ្ញុំនាពេលខាងមុខ"។ លោក សួន ពិសិដ្ឋ បន្ថែម។

លោក សួន ពិសិដ្ឋ ជាអ្នកនិពន្ធល្បីឈ្មោះបានបញ្ចប់ការសិក្សាមកពីប្រទេស កាណាដា និងត្រូវគេចារឈ្មោះជាអ្នកនិពន្ធឆ្នើមនៅទីនោះទៀតផង។ ការវិលត្រឡប់មកកម្ពុជា ដោយធ្វើជាអ្នកនិពន្ធបទភ្លេងថ្មីឱ្យផលិតកម្ម Rock ទទួលការគាំទ្រជាខ្លាំងពីសំណាក់ប្រជាជនខ្មែរ។

លោកធ្លាប់ឈ្នះពានជាអ្នកនិពន្ធឆ្នើមពីរឆ្នាំជាប់គ្នាពីកម្មវិធីអាណាចក្រតារាក្នុងឆ្នាំ២០១២ និងឆ្នាំ២០១៣។ ក្រៅតែពីមានអាជីពជាអ្នកនិពន្ធ និង អ្នកចម្រៀង លោកក៏ចង់ក្លាយជាអ្នកដឹកនាំសម្ដែងល្បីឈ្មោះម្នាក់ផងដែរនាពេលខាងមុខ៕

អានអត្ថបទបន្ត៖ Maddox មកសម្ពោធរឿងថ្មីជាមួយប៉ាប៉ា Brad Pitt ពេលម៉ាក់កើតអុតស្វាយ

អានអត្ថបទបន្ត៖ ថាម៉េច ព្រះនាងចៀវវៃរៀបការជាមួយស្រីដូចគ្នា? (វីដេអូ)

អានអត្ថបទបន្ត៖ ឈុតលេបផ្លែឡាមរបស់បងប្អូនទាំង៣នាក់ មកពីខេត្តបាត់ដំបងយ៉ាងម៉េចដែរ?

អត្ថបទ៖ អ៊ីង សុឡា

រូបថត៖ Facebook សួន ពិសិដ្ឋ