ស្រីស្អាត ប៊ី សុធារី ជាប់ពាន ២ នៅប្រទេសថៃ

2014-12-17 21:42:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ប៊ី សុធារី ដែលបានទៅចូលរួមប្រកួតកម្មវិធី "Miss Southeast Asian Beauty Pageant 2014 “នៅឯប្រទេសថៃ កាលពីដើមខែ ធ្នូ ឆ្នាំ ២០១៤ កន្លងទៅ ពេលនេះបានចេញលទ្ធផលហើយ ដោយទទួលពានរហូតដល់ទៅ ២ ឯណោះ។

បើតាមការឲ្យដឹងពី លោក ម៉ែន និមលរតន៍ ប្រធានក្រុមបង្ហាញម៉ូដ Sun Super Model Cambodia បានឲ្យដឹងថា ការប្រកួតកម្មវិធី"Miss Southeast Asian Beauty Pageant 2014 “ នៅឯប្រទេសថៃ បានបញ្ចប់ហើយបន្ទាប់ពីកម្មវិធីបានផ្ដើមពីថ្ងៃទី ៧ ដល់ថ្ងៃ ១៤ ខែ ធ្នូ ឆ្នាំ ២០១៤ កន្លងមក។ មានប្រទេស ៨ ក្នុងតំបន់អាស៊ាន ចូលរួមក្នុងកម្មវិធីនេះ ហើយប្រទេសកម្ពុជា បានបញ្ជូនតារាម៉ូដែលតែម្នាក់ប៉ុណ្ណោះទៅចូលរួម គឺ កញ្ញា ប៊ី សុធារី ដោយការចេញទៅប្រកួតនេះ ឧបត្ថម្ភដោយ Hamsa Entertainment Cambodia ។

លោក និមលរតន៍ បានឲ្យដឹងថា ជាលទ្ធផល ប្រទេសវៀតណាមបានជាប់លេខ ១ ប្រទេសហ្វីលីពីនលេខ ២ និង ប្រទេសថៃលេខ ៣ ចំណែកប្រទេសកម្ពុជាជាប់ចំណាត់ថ្នាក់លេខ ៤ ដោយទទួលបានពានរហូតដល់ទៅ ២ ក្នុងនោះទី ១ ជាពានសម្រស់ប្រណិត ឬMiss Elegance Award និង ទី២ ជាពានសំលៀកបំពាក់រាត្រីស្រមោលស ស្រស់ជាងគេ ឬ Best Evening Wear ។

ប្រធានក្រុមម៉ូដែលល្បីឈ្មោះម្នាក់នេះ បានលើកឡើងថា នេះជាមោនភាពថ្មីមួយទៀតរបស់ កញ្ញា ប៊ី សុធារី ក៏ដូចជា ក្រុមម៉ូដែលរបស់លោក ដែលទទួលបានពានពីកម្មវិធីប្រកួតនេះ។ កន្លងមកស្រីស្អាតលេខ ១ Asia New Star Model Contest - Cambodia Region 2013 ធ្លាប់បានចេញទៅ ប្រកួតនៅក្រៅប្រទេសជាច្រើនមកហើយ ក្នុងនោះ មានប្រទេស កូរ៉េ តែមិនទទួលបានពានទេ ចំណែកនៅប្រទេស វៀតណាម ធ្លាប់ទទួលបានពាន ១ ផងដែរ គឺ Appreciate Award ៕