វៀតណាមគ្រោងដំឡើងថ្លៃអគ្គិសនីចាប់ពីខែនេះទៅ

2014-12-17 22:02:29
ចំនួនមតិ 0 | ចំនួនចែករំលែក 0

ចន្លោះមិនឃើញ

សារព័ត៌មាន Viet Nam News បានចុះផ្សាយកាលពីព្រឹកមិញនេះថា ក្រុមហ៊ុនអគ្គិសនីវៀតណាម (EVN) មានគម្រោងដំឡើងថ្លៃអគ្គិសនី ៩,៥ភាគរយលើតម្លៃដើម ចាប់ពីខែនេះទៅ។

ប្រភពរូបភាព៖ Vinacomin

នេះមានន័យថា តម្លៃអគ្គិសនីនឹងកើនឡើងពី ១៥០៨,៨៥ដុង (ប្រហែល ២៨៥រៀល) ក្នុងមួយគីឡូវ៉ាត់ម៉ោង ទៅ ១៦៥២,១៩ដុង (ប្រហែល ៣១២រៀល) ក្នុងមួយគីឡូវ៉ាត់ម៉ោង។ ការដំឡើងថ្លៃនេះ នឹងធ្វើឲ្យចំណូលកើនឡើងដល់ ៧០០ពាន់លានដុង (ជាង ១៣២ពាន់លានរៀល) ដែលក្រុមហ៊ុននេះនឹងយកទៅបម្រើឲ្យសង្វាក់ផលិតកម្មថាមពលអគ្គិសនី និងសកម្មភាពជំនួញនានា។

សារព័ត៌មានដដែលបានបញ្ជាក់ទៀតថា គម្រោងនេះ នឹងនាំឲ្យតម្លៃអគ្គិសនីវៀតណាម ស្មើអត្រាតម្លៃអគ្គិសនីនៃប្រទេសជិតខាងក្នុងតំបន់ និងរកចំណូលបានកាន់តែច្រើនពីវិនិយោគិននានា។ បើតាមសេចក្ដីសម្រេចថ្មីនេះ អគ្គិសនីនឹងត្រូវលក់ក្នុងតម្លៃជាមធ្យមចន្លោះពី ១៤៣៧ដុង (ប្រហែល ២៧២រៀល) ទៅ ១៨៣៥ដុង (ប្រហែល ៣៤៧រៀល) ក្នុងមួយគីឡូវ៉ាត់ម៉ោង ដោយមិនទាន់គិតបញ្ចូលពន្ធ។ ទោះយ៉ាងណា មន្ត្រីមួយចំនួន បានសម្ដែងក្ដីបារម្ភ និងបញ្ជាក់ថាការបង្កើនតម្លៃនេះ គួរធ្វើឡើងនៅត្រីមាសទីមួយនៃឆ្នាំក្រោយ។ បទបញ្ជាផ្ទៃក្នុងវៀតណាម បានបញ្ជាក់ថា ការកំណត់តម្លៃអគ្គិសនីថ្មីត្រូវមានគម្លាតគ្នាយ៉ាងតិច ៦ខែ។ តម្លៃអគ្គិសនីបច្ចុប្បន្ន ១៥០៨,៨៥ដុង ក្នុងមួយគីឡូវ៉ាត់ម៉ោងនេះ ត្រូវកំណត់តាំងពីថ្ងៃទី០១ ខែសីហា ឆ្នាំ២០១៣ ដែលរហូតមកដល់ពេលនេះ មានរយៈពេល ១៦ខែហើយ។ ដូចនេះ ការកំណត់តម្លៃអគ្គិសនីសាជាថ្មី គឺអាចធ្វើទៅបាន ដោយមិនខុសនឹងលក្ខន្តិកៈឡើយ។

បញ្ជាក់៖ តម្លៃខាងលើគិតតាមអត្រាប្តូរប្រាក់ថ្ងៃនេះ ១០០០០ដុង=១៨៩០រៀល

ចុចអាន៖ អាជីវករដូរលុយបង្ហើបតិចនិកមើលក្រដាស១០០ដុល្លារក្លែងក្លាយ

ចុចអាន៖ អង្ករខ្មែរ និងថៃ ទទួលជយលាភីអង្ករល្អបំផុតលើពិភពលោក

ប្រែសម្រួល៖ គង់ វិសាល ប្រភព៖ vietnamnews