តារាសម្ដែង ឌី សូនីតា គ្រួសារដឹកចូលពេទ្យភ្លាមៗ

2014-12-18 17:47:03
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងចម្រៀងកញ្ញា ឌី សូនីតា ត្រូវក្រុមគ្រួសារដឹកសង្គ្រោះនៅមន្ទីរពេទ្យភ្លាមៗកាលពីពីរថ្ងៃមុន បន្ទាប់ពីនាងលេចចេញស្ថានភាពឈឺជំងឺចម្លែកនឹកស្មានមិនដល់មួយ។

អ្នកមីងរបស់កញ្ញា ឌី សូនីតា ដែលជាអ្នកលើកទូរសព្ទជំនួស ប្រាប់ថា មកទល់ពេលនេះក្មួយស្រីរបស់គាត់ស្ថិតក្នុងមន្ទីរពេទ្យនៅឡើយ ហើយក្រុមគ្រូពេទ្យកំពុងតាមដានស្ថានភាពជំងឺ។ "ពេទ្យអត់ទាន់កំណត់បានជំងឺអីទេ គ្រាន់តែប្រាប់ថាឈាមសឡើងលើសឈាមក្រហមខ្លាំង និងប្រាប់ទៀតថា វាធ្វើទុក ដោយសារវាធ្វើការច្រើនលើសកំលាំងខ្លាំងពេក"។

នៅក្នុងមន្ទីរពេទ្យព្រឹកនេះ នីតា បានភ្ញាក់ដឹងខ្លួនពីជំងឺ កញ្ញាបានឆ្លើយទូរសព្ទជាមួយក្រុមការងារយើងទាំងសំឡេងខ្សាវៗពីសភាពជំងឺនាងថា "ពីក្បាលព្រលប់មិនអីទេ គឺធម្មតា...លុះជិតភ្លឺ ស្រាប់តែមានអារម្មណ៍កាន់តែមិនស្រួលខ្លាំងឡើងៗ ក៏ចុះទៅដាស់ទ្វារម៉ាក់ឲ្យកោសខ្យល់ឲ្យ លុះព្រឹកឡើងទៅពេទ្យដាក់សេរ៉ូម។ ដោយសារគេងពេទ្យអត់កើត ខ្ញុំក៏មកគេងនៅផ្ទះវិញ"។

តារាស្រីដែលបានចាប់កំណើតលើទឹកដីខេត្តកំពង់ឆ្នាំងរូបនេះ ប្រាប់ទៀតថា នៅយប់ថ្ងៃទីពីរនោះ គឺជំងឺរបស់នាង ចាប់ផ្ដើមធ្វើទុក្ខកាន់តែខ្លាំងជាងមុន។ "មានអារម្មណ៍មិនស្រួលខ្លាំង ខ្ញុំក៏ចុចទូរសព្ទហៅបងប្អូន ម៉ាក់អីឲ្យជួយ ប៉ុន្តែទូរសព្ទអត់សេវា ខ្ញុំក៏បោចស៊ីរ៉ូមដោយខ្លួនឯង បន្តិចក្រោយមក សំណាងបានម៉ាក់ឡើងមកមើលឃើញខ្ញុំកំពុងតែញាក់តែម្នាក់ឯង ក៏ហៅបងប្អូនបីមកពេទ្យតែម្ដង ព្រោះពេទ្យផ្ទះដែរ បន្តពីនោះខ្ញុំលែងដឹងអីហើយ”។

កញ្ញា បន្តថា នាងស្រៀវឆ្អឹងខ្នង និងចង្កេះចង់ដាច់ពីគ្នា ហើយឈឺតាំងក្បាលចុងដល់ជើង រួមទាំងរងាញ័រញាក់ទៀត។ "មកដល់ឥឡូវគ្រូពេទ្យក៏កំណត់ជំងឺមិនទាន់បាន វាដូចជាជំងឺថ្មីម៉េចទេ ព្រោះមានអ្នកជំងឺប្រមាណ៨-៩នាក់ទៀត ឈឺដូចខ្ញុំអីចឹងដែរ គ្រូពេទ្យឆ្ងល់ និងកំពុងតាមដាន"។ សូនីតា បន្ថែម។

ក្រោយដាក់ស៊ីរ៉ូមរយៈពេលពីរបីថ្ងៃមក ស្ថានភាពរបស់កញ្ញា ឌី សូនីតា បានវិលមកភាពល្អប្រសើរច្រើន។ "គ្រូពេទ្យថា ខ្ញុំអាចចេញពីពេទ្យថ្ងៃហ្នឹង តែហាមមិនឲ្យធ្វើការងារអីធ្ងន់ទេ ឲ្យសម្រាកឲ្យបានច្រើន និងញុំាឲ្យទៀងទាត់។ ពេទ្យថា ធ្វើអីចឹងតែមួយរយៈខ្លីនឹងធម្មតាវិញហើយ!”។

អត្ថបទ៖តារាសម្ដែង ឌី សូនីតា ភ្លក្សរសជាតិជីវិតជាអ្នករើសអេតចាយ

តារាចម្រៀង ទើបអភិវឌ្ឍន៍ខ្លួនមកជាតារាសម្ដែងរូបនេះ ប្រាប់ថា មួយរយៈចុងក្រោយនេះ នាងទទួលការងារសិល្បៈច្រើនហួសហេតុពេកទើបនាំសុខភាពទ្រុឌទ្រោមដូច្នេះ ក្នុងនោះមានទាំងកម្មវិធីទូរទស្សន៍ កម្មវិធីច្រៀងក្នុងពិធីផ្សេងៗ និងស្ប៉តពាណិជ្ជកម្មមួយចំនួន។

"ការងារដែលខ្ញុំទទួលគេហើយ ខ្ញុំនឹងព្យាយាមធ្វើ តែម៉ាក់បានសុំគេលុបខ្លះហើយ ខ្ញុំធ្វើតែការងារដែលទទួលហើយទេ ផុតពីហ្នឹងខ្ញុំសម្រាកសិន រហូតដល់ខែ១ខែ២ សុខភាពរឹងមាំ បានទទួលទៀត!”៕

អត្ថបទ៖ ទារិកា