ស្រុកខ្មែរ iPhone 6/6Plus វ៉ៃចេញអស់ប៉ុន្មានគ្រឿងជាងមួយអាទិត្យនេះ?

2014-09-30 17:25:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាងមួយអាទិត្យហើយដែល iPhone 6/6Plus បានចេញវាយលុកទីផ្សារឡើងកក្រើកពិភពលោក។ នៅទីផ្សារប្រទេសកម្ពុជា ទូរសព្ទដ៏មានប្រជាប្រិយនេះ ក៏ទទួលការចាប់អារម្មណ៍ពីអតិថិជនក្នុងស្រុកជាច្រើនដែរ ដោយមានសម្រុកទិញបន្តកន្ទុយគ្នា ទោះបីដាក់លក់ក្នុងតម្លៃថ្លៃខ្ពស់ក៏ដោយ។

ចុះជាងមួយអាទិត្យនេះ iPhone 6/6 Plus លក់ចេញអស់ប៉ុន្មានគ្រឿងហើយសម្រាប់ទីផ្សារប្រទេសខ្មែរ?

បុគ្គលិកលក់នៅហាងគួង អ៊ី ឲ្យដឹងថា ក្នុងរយៈពេលជាងមួយអាទិត្យនេះ ហាងរបស់កញ្ញាបានលក់ចេញ iPhone 6/6 Plus បានពី ១០០ ទៅ ២០០ គ្រឿង។ កញ្ញាថា បរិមាណលក់ចេញនៅតែមានការកើនឡើង ដោយសារអតិថិជនជាច្រើននៅបន្តសម្រុកទិញជាហូរហែ។

ចំណែកលោកពិសិដ្ឋ ម្ចាស់ហាងលក់ទូរសព្ទស្រីអូន ដែលមានពីរសាខានៅម្តុំគិរីរម្យឲ្យដឹងថា គិតតាំងពីថ្ងៃចេញលក់ដំបូងជាងមួយអាទិត្យនេះ ហាងរបស់លោកទាំងពីរសាខាបានលក់ចេញ iPhone 6/6 Plus អស់ចន្លោះពី ៤០ ទៅ ៥០ គ្រឿង។ លោកថា ចំនួននេះបើប្រៀបធៀបកាលចេញលក់ iPhone 5S គឺសន្ទុះលក់មានការគាំទ្រខ្លាំង។

ម្ចាស់ហាងរូបនេះបន្តថា លោកនៅតែមានសុទិដ្ឋិនិយមថា អតិថិជននៅតែបន្តទិញទូរសព្ទ iPhone ស៊េរីថ្មីនេះ បើទោះបីតម្លៃលក់ខ្ពស់ក៏ដោយ។

រីឯម្ចាស់ហាងលក់ទូរសព្ទសុខ លី ក៏ឲ្យដឹងដែរថា ការលក់ iPhone 6/6Plus ឃើញមានសញ្ញាណល្អគិតមកទល់ពេលនេះ។

“អតិថិជននៅតែមានជាហូរហែឥតដាច់ តាំងទូរសព្ទនេះចេញលក់មុននិងក្រោយបុណ្យភ្ជុំបិណ្ឌ"។ យ៉ាងណា លោកមិនបានបញ្ជាក់ពីបរិមាណលក់ចេញរបស់ iPhone ស៊េរីថ្មីនៅហាងរបស់លោកនោះទេ។

ចុចអាន៖១០ចំណុចមើលដឹងថា កុំព្យូទ័រឆ្លងមេរោគឬអត់ និងវិធីងាយៗដើម្បីព្យាបាល….

ចុចអាន៖ ជាង ១០ ភាគរយរថយន្តប្រើនៅកម្ពុជាទទួលស្គាល់ពីរោងចក្រផលិត….

អាន៖ ប្រទេសនៅអាស៊ីពីរជាសំបុក Hacker របស់ពិភពលោក...

អត្ថបទ៖ ប៊ុណ្ណារ៉ា