ចេញមុខមាត់ ប្រុសសង្ហាអនាគតស្វាមី ឆ័យលី ដាឡែន

2014-12-22 16:53:26
ចំនួនមតិ 0 | ចំនួនចែករំលែក 0

ចន្លោះមិនឃើញ

អត្តសញ្ញាណ ក៏ដូចជាមុខមាត់ប្រុសសង្ហាអនាគតស្វាមីកញ្ញា ឆ័យលី ដាឡែន ត្រូវបានទម្លាយ ដោយតារាចម្រៀង និងសម្ដែងម្នាក់មកកាន់ Sabay បន្ទាប់ពីលោក អេឡិច ចាន់ត្រា ក៏បានប្រកាសក្ដែងៗពីរឿងនេះ ក្នុងថ្ងៃខួបកំណើតរបស់លោក។

តាមប្រភពបញ្ចេញឲ្យដឹង អនាគតស្វាមីតារាចម្រៀងមកពីខេត្តបាត់ដំបងនេះឈ្មោះ ភូ តាក់វ៉ាន់ ហៅ "តារា" ជាតារាសម្ដែង និងដើរម៉ូដ។ "តាមខ្ញុំដឹង ពួកគេនឹងរៀបការជាមួយគ្នានៅថ្ងៃទី១០ជាង នៅបាត់ដំបង តែអត់ច្បាស់ថា ១០ប៉ុន្មានទេបង ហើយបន្ទាប់មក ពួកគេនឹងមកកាត់ចំណងដៃម្ដងទៀតនៅភ្នំពេញយើងនេះ!”។

ងាកមកសាមីខ្លួន កញ្ញា ឆ័យលី ដាឡែន បានទទួលស្គាល់ដែរថា ព័ត៌មានដែលធ្លាយចេញនេះគឺជាការពិត។ កញ្ញា ថ្លែងថាពិតជាគ្រោងរៀបការមែន ក្នុងនោះថ្ងៃល្អសម្រាប់ពិធីជ័យរបស់នាង នឹងប្រារព្ធនៅថ្ងៃទី ១៦ មករា ២០១៥ នៅស្រុកកំណើតរបស់នាងនាខេត្តបាត់ដំបង។ ដាឡែន ឲ្យដឹងទៀតថា មង្គលការរបស់នាង នឹងមានតែសាច់ញាតិប៉ុណ្ណោះ មិនមានវត្តមានមិត្តរួមអាជីពឡើយ។ ដោយសារនាងមិនចង់រំខានអញ្ជើញពួកគាត់ទៅឆ្ងាយដល់បាត់ដំបងនោះឡើយ។

កញ្ញា បញ្ជាក់ថា មិត្តរួមអាជីពរបស់នាង នឹងមានវត្តមានជុំគ្នានៅថ្ងៃទី២៣ ខែមករា ២០១៥ ដែលជាថ្ងៃនាងធ្វើពិធីកាត់ចំណងដៃ។ ពិធីនេះ គ្រោងធ្វើនៅមជ្ឈមណ្ឌលកោះពេជ្រ ប៉ុន្តែ ឆ័យលី ដាឡែន មិនបានបង្ហើបឲ្យដឹងថា មិត្តភ័ក្ដិរួមអាជីពរបស់នាងចំនួនប៉ុន្មានដែលនាងនឹងអញ្ជើញឡើយ។

កញ្ញា ឆ័យលី ដាឡែន និងលោក ភូ តាក់វ៉ាន់ អនាគតស្វាមី

មុនទម្លាយចេញព័ត៌មានរៀបការកញ្ញា ឆ័យលី ដាឡែន ធ្លាប់មានព័ត៌មានចចាមអារ៉ាមថា នាង និងលោក អេឡិច ចាន់ត្រា ជាគូស្នេហ៍នឹងគ្នា ដោយសារឃើញពួកនាងបានចាប់គូធ្វើជាតារាចម្រៀងគូ ហើយពួកគេតែងចេញដំណើររួមគ្នាទៅទីជិតទីឆ្ងាយទាំងក្នុង និងក្រៅស្រុក។ ជម្រះបញ្ហានេះ ទើបលោក បានទម្លាយរឿង ឆ័យលី ដាឡែន ជិតរៀបការ ក្នុងថ្ងៃខួបកំណើតរបស់លោក។

“ថ្ងៃនេះសូម ប្រកាសជាផ្លូវការតែម្តងថា កញ្ញា ដាឡែន គាត់នឹងចូលរោងការ ហើយនៅថ្ងៃទី១៦ ខែមករា ឆ្នាំ២០១៥ ខាងមុខហើយ។ អីចឹងសូមប្រិយមិត្តឈប់យល់ច្រឡំ ខ្ញុំនឹងគាត់កន្លងមកគ្រាន់តែមិត្តភ័ក្តិទេ ហើយក៏សុំអ្នកសារព័ត៌មានឈប់យល់ច្រឡំទៀតទៅ”៕