Rock បង្ហាញមុខតួហូលីវូដក្នុងរឿងចំណាយទុនជិត១លានដុល្លារផ្លូវការ

2014-09-14 18:38:39
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីធ្លាយព័ត៌មានថ្មីៗនេះថា Rock កំពុងសម្ងំថតភាពយន្តខ្នាតធំមួយរឿង "Before The Fall" ឬ "មុនការដួលរលំ" នោះ ម្សិលមិញនេះ អ្នកផលិតភាពយន្តដ៏ធំក្នុងស្រុកមួយនេះ បានបង្ហាញតារាធំៗរបស់ខ្លួនមកពីហូលីវូដជាផ្លូវការហើយនៅក្នុងកម្មវិធី "រាត្រីកម្សាន្ត"កាលពីយប់មិញ បន្ទាប់ពីសាច់រឿងទើបបញ្ចប់ការថត។

(រាប់ពីឆ្វេង) លោក Ian Virgo កញ្ញា Pauline Cammal លោក Nicolas Duvauchelle និងលោក Justine

តារាអន្តរជាតិទាំងនោះរួមមាន លោក Ian Virgo តួឯកប្រុសដែលល្បីក្នុងរឿង “Black Hawk Down” និងរឿង“Band of Brothere” កញ្ញា Pualin Cammal កូនខ្មែរកាត់បារាំង ជាតួឯកស្រី លោក Nicolas Duvauchelle សម្ដែងជាតួអ្នកកាសែត លោក Ian White អ្នកដឹកនាំរឿងសញ្ជាតិអូស្ត្រាលី និងលោក Justine អ្នកស្វែងរកទីផ្សារអន្តរជាតិសម្រាប់រឿងនេះ។

លោក យឹម សុសត្យា ប្រធានគ្រប់គ្រងការផលិតរបស់ផលិតកម្ម Rock ប្រាប់ថា ការប្រញាប់បង្ហាញមុខក្រុមតារាអន្តរជាតិរបស់រឿងដែលចាយទុនធំជាប្រវត្តិសាស្ត្រជិត១លានដុល្លារ "Before The Fall" យប់មិញនេះ ដោយសារពួកគេត្រូវត្រឡប់ទៅប្រទេសកំណើតវិញនៅសប្ដាហ៍ក្រោយនេះ។

ថ្លែងនៅមុខអ្នកទស្សនាជាច្រើនក្នុងកម្មវិធី "រាត្រីកម្សាន្ត" ក្រុមតារាអន្តរជាតិមួយក្រុមនេះ និយាយថា ពួកគេរីករាយ និងមោទនភាពមែនទែនដែលបានចូលរួមថតភាពយន្តខ្មែរនៅលើទឹកដីខ្មែរ ខណៈពួកគេខ្លះបានរៀបគម្រោងរួចស្រេចមកកម្ពុជាទៅហើយ។

“Before the Fall” បានដាក់បង្ហាញឈុតខ្លះៗយប់មិញនេះ បន្ទាប់ទើបថតចប់ថ្មីៗ។ "គ្រាន់តែថតចប់ ក៏យកមកបង្ហាញភ្លាម គឺយកចេញពីកាមេរ៉ាមកតែម្ដងអត់មានទាន់បានកាត់តកែសម្រួលអីបន្តិចទេ"។ លោក យឹម សុសត្យា បញ្ជាក់។

(រាប់ពីឆ្វេង)អ្នកនាង ចន្ថា អ្នកបកប្រែ លោក Ian Virgo កញ្ញា Pauline Cammal លោក Nicolas Duvauchelle លោក Ian White អ្នកដឹកនាំរឿង និងលោក Justine

អ្នកគ្រប់គ្រងការផលិតរូបនេះ បន្ថែមថា "Before The Fall" ឬ "មុនការដួលរលំ" គឺផលិតឡើងដោយផលិតកម្ម Rock ទាំងស្រុង ក្នុងនោះបានជួលអ្នកដឹកនាំរឿង និងអ្នកថត (Camera Man) មកពីហូលីវូដ ឯឧបករណ៍ផ្សេងៗគឺជារបស់ Rock ទាំងអស់។ លោក ថា Rock ធ្វើរឿងនេះឡើង ទី១ដើម្បីឲ្យទស្សនិកជនដឹងពីស្ថានភាពប្រទេសកម្ពុជាមុនឆ្នាំ ១៩៧៥ ទី២ដើម្បីផ្ដល់គ្រប់រសជាតិក្នុងវិស័យសិល្បៈភាពយន្តខ្មែរ និងទី៣ដើម្បីបង្ហាញថា ភាពយន្តខ្មែរក៏អាចឈានទីផ្សារបរទេសដែរ ខណៈរឿងនេះ ផលិតឡើងដោយផ្ដោតលើទីផ្សារក្រៅស្រុកជាស្រេច។

តាមលោក Justine អ្នករកទីផ្សារក្រៅប្រទេសនៃភាពយន្តដ៏ធំនេះ បានឲ្យដឹងថា "Before The Fall" ឬ "មុនការដួលរលំ" នឹងយកទៅដាក់បញ្ចាំងនៅបណ្តាប្រទេសក្នុងតំបន់អាស៊ាន មានដូចជា ថៃ វៀតណាម ជាដើម។ ក្រៅពីនេះ មានអូស្ត្រាលី ហុងកុង និងអាចឈានទៅដាក់បញ្ចាំងនៅសហរដ្ឋអាមេរិកទៀត។

តាមលោក សត្យា នេះក៏ជាមូលហេតុដែល Rock សម្រេចជ្រើសរើសតួសម្ដែងមកពីតារាហូលីវូដមកសម្ដែងដែរ ព្រោះសាច់រឿងត្រូវនិយាយជាភាសាអង់គ្លេសសុទ្ធ។ តាមផែនការ ក្រោយចំណាយពេលកាត់តសម្រួលបច្ចេកទេសរួចរាល់ "Before The Fall" ឬ "មុនការដួលរលំ" នឹងអាចដាក់បញ្ចាំងជូនទស្សនិកជនបានទស្សនា នៅរង្វង់ដើមឆ្នាំ ២០១៥៕