ភាពយន្តរឿង "ភ្លើង" ដាក់បញ្ចាំងក្រោយថតជាង១ឆ្នាំ

2014-12-24 18:07:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្នាតធំរបស់ផលិតកម្ម Rock រឿង "ភ្លើង" ប្រភេទបាញ់ប្រហារមនោសញ្ចេតនាស៊ីជម្រៅ បានបើកសម្ពោធដាក់បញ្ចាំងហើយ នៅរោងភាពយន្តលុច្សនាព្រឹកនេះ បន្ទាប់ពីចំណាយពេលថតដល់ទៅជាង១ឆ្នាំ។ នេះបើតាមលោក យឹម សុសត្យា នាយកគ្រប់គ្រងផលិតកម្ម Rock បញ្ជាក់។

“រឿងហ្នឹងចំណាយពេលយូរណាស់ដល់ទៅជាង១ឆ្នាំឯណោះ ឯវិលមកការចំណាយក៏ចំណាយច្រើនដែរ គឺដល់ទៅជាង ១០ម៉ឺនដុល្លារ រឿងផ្សេងៗអស់តែពីរបីម៉ឺនអីទេ។ គិតមើលថាម៉េចបានអស់ច្រើន គឺយើងទៅថតដល់តំបន់ឆ្ងាយ និងកៀរគរមនុស្សជាច្រើន មានទាំងប៉ូលិសកម្លាំងអីច្រើនទៀត ដែលមានសម្របសម្រួលពីឯកឧត្តមអគ្គទៀត"។

វិលមកសាច់រឿង "ភ្លើង" ដែលដើមឡើងមានចំណងជើងថា "មាសសុទ្ធ" វិញ អ្នកគ្រប់គ្រងរូបនេះ ថ្លែងថា "ភ្លើង" គឺជាដើមហេតុដែលបង្កើតឲ្យមានពន្លឺ ឲ្យមានកម្ដៅផ្ដល់ភាពកក់ក្ដៅសុខដុមរមនា ងាកមកភាពយន្ត "ភ្លើង" ក៏ដូចគ្នា គឺមានគ្រប់រសជាតិ ក្នុងនោះភ្លើងដែលផ្ដល់ភាពកក់ក្ដៅតំណាងក្រុមសមត្ថកិច្ច ឯភ្លើងកិលេស តំណាងជនចិត្តអាក្រក់។

លោក យឹម សុសត្យា នាយកគ្រប់គ្រងការផលិតរបស់ផលិតកម្ម Rock

“ប៉ូលិស យើងតំណាងឲ្យភ្លើងដែលផ្ដល់ពន្លឺ ផ្ដល់សេចក្ដីសុខដល់ប្រជាពលរដ្ឋ ពួកគាត់បានខិតខំធ្វើការកម្ចាត់ពួកចិត្តអាក្រក់ដែលតំណាងដោយភ្លើងកិលេស។ ដូច្នេះហើយទើបកើតជារឿង "ភ្លើង" ហើយសាច់រឿងយ៉ាងណា សូមតាមដានទាំងអស់គ្នា!”។

លោក យឹម សុសត្យា អះអាងទៀតថា "ភ្លើង" គឺជារសជាតិថ្មី និងប្លែកជាប្រភេទបាញ់ប្រហារស៊ើបអង្កេតដើម្បីតាមចាប់ពួកឧក្រិដ្ឋជន។ យ៉ាងណា លោក ក៏មិនហ៊ានអះអាងដែរចំពោះភាពជោគជ័យដោយហេតុថា វាជារសជាតិថ្មីមួយ ខណៈទស្សនិកជននៅដក់ជាប់រឿងបែបកំប្លែងសើចសប្បាយនៅឡើយ។ លោក បន្តថា លោកធ្វើរឿងនេះ គឺដើម្បីឲ្យភាពយន្តខ្មែរ មានគ្រប់រសជាតិ។

“ភ្លើង" ចូលរួមសម្ដែងដោយតារាល្បីៗជាច្រើន មានលោក ទេព រិនដារ៉ូ អ្នកនាង ចន ច័ន្ទលក្ខិណា កញ្ញា សៀក ស័ក្ដិរុណា លោក លាង ឧត្តម លោក ប៉ែន ចិន្ដា និងតារាជាច្រើនរូបទៀត។ លោក ទេព រិនដារ៉ូ សម្ដែងជាតួអង្គចិត្តអាក្រក់លើកដំបូងក្នុងប្រវត្តិប្រឡូកសិល្បៈជិត២០ឆ្នាំ ថ្លែងថា លោកទទួលការលំបាកបំផុត។ "ដូចដឹងហើយខ្ញុំធ្លាប់តែលេងតួអង្គមនុស្សល្អ ដល់រឿងនេះ តួកាច ចិត្តអាក្រក់ អីចឹងពិបាកណាស់ ត្រូវប្រើទឹកមុខ និងស្រែកគំហកខ្លាំងអីជាដើម និយាយទៅពិបាកណាស់!”។

លោក ដារ៉ូ រំពឹងថា ភាពយន្តនេះ នឹងទទួលបានការគាំទ្រច្រើនពីទស្សនិកជន។ ឯអ្នកនាង ចន ច័ន្ទលក្ខិណា ក៏រំពឹងដូចគ្នា ភាពយន្តស្នាដៃថ្មីមួយរបស់អ្នកនាង ទទួលជោគជ័យ។

បន្ទាប់បើកសម្ពោធ ភាពយន្តខ្នាតធំ "ភ្លើង" នឹងមានដាក់បញ្ចាំងនៅរោងភាពយន្តលុច្សចាប់ពីថ្ងៃនេះតទៅ។ ឯភាពយន្តទំនើបទាំងអស់រួមមាន Major Cineplex By Cellcard, Platinum Cineplex និង Legend Cinema ទាំងបីសាខា( City Mall, TK Avenue និង Steung Meanchey Market) ក៏នឹងដាក់បញ្ចាំងស្របគ្នាទៀត ចាប់ពីថ្ងៃទី ២៩ ធ្នូ ២០១៤៕