ជិត៣ពាន់នាក់តម្រៀបគ្នាជាដើមណូអែលធំជាងគេលើលោក

2014-12-25 16:19:18
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីដើមខែធ្នូនេះ ប្រទេសហុងឌុយរ៉ាស់បានបំបែកកំណត់ត្រារបស់ស្ថាប័ន Guinness បន្ទាប់ពីមនុស្ស ២៩៤៥នាក់ តម្រៀបគ្នាជាដើមណូអែលធំបំផុត នៅទីលានប្រជាធិបតេយ្យនៃសេតវិមានប្រធានាធិបតី ក្នុងរដ្ឋធានី Tegucigalpa។

កម្មវិធីនេះ បានទទួលកិត្តិយសចូលរួមពីប្រធានាធិបតីហុងឌុយរ៉ាស់ លោក Orlando Hernandez ដែលជាអ្នកជំរុញឲ្យមានព្រឹត្តិការណ៍នេះឡើង រួមនិងកូនស្រីទាំងពីរនាក់ ប្រធានសភា លោក Mauricio Oliva ព្រមទាំងមន្ត្រីជាច្រើនរូបទៀត។ លោក Hernandez បាននិយាយនៅក្នុងឱកាសនោះថា "ហុងឌុយរ៉ាស់ស្រលាញ់សន្តិភាព ហើយចង់រស់នៅក្នុងសន្តិភាព"។

អ្នកចូលរួមទាំង ២៩៤៥នាក់ បានស្លៀកសំលៀកបំពាក់ពណ៌បៃតង ក្រហម លឿង ខ្មៅ ឈរតម្រៀបគ្នារយៈពេល ៦នាទី បង្កើតជាទស្សនីយភាពដើមណូអែលដ៏អស្ចារ្យមួយ។ ប្រធានាធិបតីគឺជាអ្នកទទួលលិខិតបញ្ជាក់កំណត់ត្រាដោយផ្ទាល់ និងបានថ្លែងអំណរគុណដល់អ្នកចូលរួមទាំងអស់ ដែលធ្វើឲ្យព្រឹត្តិការណ៍នេះកើតឡើង ដើម្បីអបអរបុណ្យណូអែលនៅសេតវិមាន។

អ្នកតំណាងស្ថាប័ន Guinness ម្នាក់បាននិយាយថា កំណត់ត្រាចាស់ក្នុងការតម្រៀបគ្នាជាដើមណូអែល កាន់កាប់ដោយសហគមន៍មួយក្នុងប្រទេសអាហ្សង់ទីន ដោយមានអ្នកចូលរួមសរុប ១៩៨២នាក់៕