Jack Ma យកអង្គរក្សសុទ្ធតែគ្រូគុនថៃ ជីល្បីឈ្មោះ
- 2014-12-31 15:00:53
- ចំនួនមតិ 0 | ចំនួនចែករំលែក 0
Jack Ma យកអង្គរក្សសុទ្ធតែគ្រូគុនថៃ ជីល្បីឈ្មោះ
ចន្លោះមិនឃើញ
ប៉ុន្មានសប្ដាហ៍កន្លងទៅ ស្ថាបនិកក្រុមហ៊ុន Alibaba លោក Jack Ma បានឡើងលើមហាសេដ្ឋី Li Ka-shing ជាបុរសមានបំផុតនៅអាស៊ីជាមួយទ្រព្យសម្បត្តិ ២៨,៣ ពាន់លានដុល្លារ។ តែលើកនេះ បណ្ដាញផ្សព្វផ្សាយផ្ដោតចំណាប់អារម្មណ៍ទៅលើអង្គរក្សកំពូលអ្នកមាននេះវិញម្ដង ដោយសារបុរសរូបនោះជាគ្រូបង្វឹកក្បាច់គុន ថៃ ជី ក្នុងទីក្រុង Hangzhou ប្រទេសចិន។
អ្នកការពាររូបនេះមានកម្ពស់ ១,៧ ម៉ែត្រ ទម្ងន់ ៨៥ គីឡូក្រាម និងហ្វឹកហាត់ក្បាច់ថៃ ជីតាំងពីអាយុ ៨ ឆ្នាំមកម្ល៉េះ។ លោកមានឈ្មោះថា Li Tianjin កើតក្នុងភូមិ Chenjiagou សង្កាត់ Wen ខេត្ត Henan ដែលជាកន្លែងកំណើតក្បាច់គុនថៃ ជីតែម្ដង។
Li Tianjin (ទី ១ រាប់ពីឆ្វេង) ពេលការពារ Jack Ma ឡើងរថយន្ត
Li ជាប្អូនប្រុសពៅក្នុងចំណោមបងប្អូនប្រុស ៥ នាក់ តែជាអ្នកដែលមានជំនាញក្បាច់គុនខ្លាំងជាងគេ។ ហ្វឹកហាត់ពីអាយុ ៨ ឆ្នាំដល់អាយុ ១៤ ឆ្នាំលោកបានក្លាយជាកូនសិស្សរបស់លោក Wang Xian គ្រូគុនថៃ ជីដ៏ល្បីល្បាញ។
ក្នុងឆ្នាំ ១៩៩៨ ពេលអាយុ ១៩ ឆ្នាំ លោកបានឈ្នះពានរង្វាន់ការប្រកួតក្បាច់គុនថៃ ជីជាលើកដំបូង និងបន្តឈ្នះការប្រកួតថ្នាក់ជាតិជាច្រើនទៀតនៅឆ្នាំបន្តបន្ទាប់។
ក្នុងឯកសារជីវប្រវត្តិរបស់ Jack Ma ក៏មាននិយាយរៀបរាប់ពីអង្គរក្សរូបនេះដែរ។ អត្ថបទនោះបានរៀបរាប់ដូចនេះ៖ "ពេល Ma និងសមាជិកក្រុមអភិរក្សធម្មជាតិទៅកាន់វាលស្មៅ Hulun Buir តំបន់ស្វយ័តម៉ុងហ្គោលីដើម្បីសិក្សា ពួកគេបានជួបនឹងអ្នកចំបាប់ម៉ុងហ្គោលីម្នាក់ដែលដាក់សំណើថា "អ្នកឯងបីនាក់អាចរើសម្នាក់ក្នុងចំណោមពួកយើងមកសាកកម្លាំងគ្នា"។ ពេលនោះ Li Tianjin បានក្រោកឡើងហើយសួរទៅវិញថា "នរណាខ្លាំងជាងគេក្នុងចំណោមអ្នកឯង? ចេញមក ហើយវ៉ៃជាមួយខ្ញុំ”។ ចុងក្រោយ ជើងខ្លាំងចំបាប់ម៉ុងហ្គោលីត្រូវបាន Li វាយបំបាក់។
Li Tianjin បង្ហាញក្បាច់ថៃ ជី
ថៃ ជីប្រៀបបាននឹងកីឡាដែលយឺត និងទន់ភ្លន់ដែលមនុស្សវ័យចាស់ហាត់ដើម្បីសុខភាព តែ Li បានធ្វើឲ្យគ្រប់គ្នាភ្លឺភ្នែកថា វាក៏ជាអាវុធសម្រាប់ការពារខ្លួនដ៏ល្អដែរ។
Jack Ma គឺជាអ្នកចូលចិត្តវិជ្ជាគុនថៃ ជីម្នាក់ ដែលបានយកមូលដ្ឋានគ្រឹះនៃក្បាច់ប្រយុទ្ធនេះទៅអនុវត្តក្នុងជំនួញខ្លួនឯងដែរ។ លោកថា ថៃ ជីអាចសង្ខេបបានបីម៉ាត់។ ទីមួយគឺ "ស្ងប់" មិនថា មានអ្វីកើតឡើង។ ទី ២ "តាមចាប់" ក្រោយដឹងចំណុចខ្លាំងត្រូវតាមចាប់ចំណុចនោះជាប់ជានិច្ច និងចុងក្រោយគឺ "លែង" លែងអ្វីដែលដាក់បន្ទុកចោល។
បើសិនជាបានឃើញគ្រូក្បាច់គុននេះបញ្ចេញមួយក្បាច់ពីរ ពេលប្រយុទ្ធផ្ទាល់មិនដឹងល្អភ្នែកយ៉ាងណាទេ៕
Li Tianjin បង្ហាញក្បាច់ថៃ ជី
អាន៖ Jack Ma៖ ខ្ញុំពិបាកចិត្តណាស់ពេលក្លាយជាមហាសេដ្ឋី
ប្រែសម្រួល៖ សីហា ប្រភព៖ shanghaiist