គំនិតដ៏សាមញ្ញតែសំខាន់ជួយអ្នកជៀសពីការកកស្ទះចរាចរណ៍

2015-01-08 13:52:06
ចំនួនមតិ 0 | ចំនួនចែករំលែក 0

ចន្លោះមិនឃើញ

កំពុងតែនឿយហត់អស់កម្លាំងពីការងារផង ស្រាប់តែមកស្ទះផ្លូវទៅមុខមិនរួចទៅក្រោយមិនរួច នរណាមិនខឹង។ ប៉ុន្តែដើម្បីបញ្ជៀសការស្ទះកុំ ឲ្យជួបនៅពេលក្រោយទៀត គេគួរតែរកដំណោះស្រាយបង្ការទុក។ បើមិត្តយុវវ័យមិនទាន់រកឃើញនូវដំណោះស្រាយអ្វីទេ សាកមើលរបៀបបញ្ចៀសការកកស្ទះ ផ្ដល់ដោយយុវជនមួយក្រុមដូចខាងក្រោមបន្តិចមើល៍៖

កញ្ញា តុង ច័ន្ទមរកត អាយុ២៣ឆ្នាំ អ្នកលក់គ្រឿងអលង្ការក្នុងផ្សារមួយកន្លែង ឲ្យយោបល់ថា កុំចេញដើរ ឬទៅណាមកណាចំម៉ោងដែលគេនិយមចរាចរច្រើន ដូចជាម៉ោង៥កន្លះល្ងាច ឬម៉ោង៨ព្រឹកជាដើម។ ពេលវេលាហ្នឹងទាំងមន្រ្តីរាជការ សិស្សសាលា ឬបុគ្គលិកក្រុមហ៊ុនផ្សេងៗតែងចរាចរទៅមកលើដងផ្លូវ។

មរកត ប្រាប់ថា៖ “បើអាចជៀសបាន ជៀសម៉ោងទាំងនោះខ្លះទៅ ជាពិសេសបើយើងមិនមានការអីសំខាន់ប្រញាប់ខ្លាំងទេ។ ឧទាហរណ៍ បើចង់ទៅទិញខោអាវអី ទៅទិញពេលម៉ោង៩ ឬម៉ោង១០ព្រឹកអីទៅ។ បើមិនអញ្ចឹងម៉ោង២ ឬម៉ោង៣រសៀលអីហ្នឹង ក៏មិនសូវស្ទះផ្លូវដែរ។ អីចឹងយើងអាចកាត់បន្ថយការកកស្ទះបានខ្លះ”។

សម្រាប់លោក ផុន សម អាយុ២១ឆ្នាំ អ្នកលក់កាតទូរសព្ទបោះដុំម្តុំច្បារអំពៅ បានប្រាប់ឲ្យដឹងថា៖ “ប្រការមួយទៀត យើងអាចទៅណាមកណាដោយថ្មើរជើង ប្រសិនបើគោលដៅដែលយើងចង់ទៅមានចម្ងាយជិតហ្នឹងទេ។ ម៉្យាងទៀត ជិះឡានក្រុងក៏អាចជួយបានដែរ”។

ចំណែកយុវជន ណុត នុស អាយុ១៧ឆ្នាំ សិស្សថ្នាក់ទី១១ នៃវិទ្យាល័យទួលស្វាយព្រៃ បានប្រាប់ថា៖ “យុទ្ធសាស្ត្រមួយដែលខ្ញុំមើលឃើញគឺកុំជិះផ្លូវណាដែរស្ទះ។ បើដឹងថាផ្លូវហ្នឹងសំបូរអ្នកជិះច្រើន ល្បីគេថាស្ទះច្រើន ទៅជិះបន្ថែមឲ្យស្ទះធ្វើអី។ ជាក់ស្ដែង ផ្លូវស្ទឹងមានជ័យ អញ្ចឹងខ្ញុំអត់ជិះតាមផ្លូវហ្នឹងទេ ខ្ញុំជិះវៀងហើយ”។

យុវតី កែវ ស្រីម៉ៅ សិស្សវិទ្យាល័យព្រះសីហនុក្នុងខេត្តកំពង់ចាម បានប្រាប់ថា គេគួរជិះតែផ្លូវណាធំទូលាយមិនចង្អៀត មិនងាយស្ទះទៅ ព្រោះផ្លូវធំអាចផ្ទុកអ្នកដំណើរចរាចរទៅមកបានច្រើន។ មួយវិញទៀត ជៀសវាងមហាវិថីណាដែលមានស្តុបច្រើន។ ជិះតែផ្លូវមានស្តុបតិចតួចទៅ ប្រហែលជួយកាត់បន្ថយការស្ទះបានខ្លះ”។

សម្រាប់អ្នក មានអ្វីចែករំលែកពីការកាត់បន្ថយការកកស្ទះចរាចរណ៏ដែរទេ?

អត្ថបទ៖ លឹម សុនា