ប័ណ្ណបើកបរចាស់ត្រូវប្ដូរ ជំនួសដោយប័ណ្ណថ្មីមានសុពលភាព ១០ ឆ្នាំ

2015-01-09 13:00:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ច្បាប់ស្ដីពីចរាចរណ៍ផ្លូវគោកថ្មី បានកំណត់អំពីសុពលភាព នៃប័ណ្ណបើកបរត្រឹមរយៈពេល ១០ ឆ្នាំ។ ដូច្នេះប័ណ្ណបើកបរចាស់ត្រូវប្ដូរទាំងអស់ ក្រោយពីច្បាប់ថ្មីចូលជាធរមានបន្ទាប់ពីព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ឡាយព្រះហស្តលេខា។ នេះបើយោងតាមការលើកឡើងរបស់ លោក ពៅ ម៉ាលី អគ្គលេខាធិការរង គណៈកម្មាធិការជាតិសុវត្ថិភាពចរាចរណ៍ផ្លូវគោកប្រាប់ Sabay កាលពីរសៀលថ្ងៃទី ៨ ខែមករា ម្សិលមិញនេះ។

លោក ពៅ ម៉ាលី បាននិយាយថា ច្បាប់ចរាចរណ៍ជើងគោកថ្មីបានកំណត់អំពីសុពលភាពប័ណ្ណបើកបរ គឺមានរយៈពេល ១០ ឆ្នាំ។ ម្យ៉ាងប័ណ្ណថ្មីនេះ គឺអាចប្រើប្រាស់បានទាំងរថយន្ត និង ម៉ូតូ ដោយមិនចាំបាច់មានប័ណ្ណពីរ ដូចមុន គឺមានទាំងប័ណ្ណបើកបរម៉ូតូផង និង ប័ណ្ណបើកបរឡានផង។ "ខ្ញុំជម្រាបជូនថា អ្នកបើកបរម្នាក់ មានប័ណ្ណមួយ គឺបើកបានទាំងឡាន និង ម៉ូតូ ហើយទទួលបានប័ណ្ណពិន្ទុផងដែរ"។

ច្បាប់ថ្មីដែលមាន ១២ ជំពូក និង ៩២ មាត្រា ដែលត្រូវបានរដ្ឋសភាអនុម័ត កាលពីថ្ងៃទី ៥ ធ្នូ ឆ្នាំ ២០១៤ ដោយមានសំឡេងគាំទ្រ ១០៣ លើ ១០៦ សំឡេង ដែលច្បាប់នេះបង្កើតឡើងក្នុងគោលបំណងកាត់បន្ថយគ្រោះថ្នាក់ចរាចរ ដោយបន្ថែមទោសធ្ងន់ជាងច្បាប់ចាស់ ដែលត្រូវបានដាក់ឲ្យប្រើប្រាស់កាលពីឆ្នាំ ២០០៧ ។

លោក ពៅ ម៉ាលី បានបញ្ជាក់ថា សេចក្ដីព្រាងច្បាប់ចរាចរណ៍ថ្មី ដែលទើបអនុម័តពីរដ្ឋសភា និង ទើបឆ្លងផុតពីព្រឹទ្ធសភា ហើយឥឡូវកំពុងរង់ចាំការចុះហត្ថលេខាពីប្រមុខរាជរដ្ឋាភិបាល និង ចុងក្រោយឡាយព្រះហស្តលេខាពីព្រះមហាក្សត្រ គឺ ច្បាប់នេះនឹងចូលជាធរមាន។ "នៅពេលច្បាប់ចូលជាធរមានហើយនោះ យើងនឹងធ្វើការបោះពុម្ពជាសៀវភៅដើម្បីធ្វើការផ្សព្វផ្សាយទៅកាន់សាធារណជន ដូច្នេះ យើងមិនមែនចេញច្បាប់ភ្លាមយើងអនុវត្តភ្លាមទេ គឺយើងផ្សព្វផ្សាយសិន"។

នៅក្នុងអំឡុងពេលផ្សព្វផ្សាយពន្យល់ពីច្បាប់ចរាចរណ៍ថ្មី គឺប័ណ្ណបើកបរចាស់នៅតែអាចប្រើប្រាស់បានដដែល ប៉ុន្តែ ផុតកាលកំណត់រយៈពេលផ្សព្វផ្សាយ គឺផ្ដើមការអនុវត្តច្បាប់ ហើយអ្នកមិនបានធ្វើការប្ដូរប័ណ្ណបើកបរទេគឺនឹងទទួលទោសតាមច្បាប់។ "យើងមិនទាន់កំណត់ថា រយៈពេលប៉ុន្មានថ្ងៃ ខែ ដើម្បីធ្វើសេចក្ដីប្រកាស និង ពន្យល់ទេ គឺយើងរង់ចាំច្បាប់នោះចេញជាធរមានសិន រួចហើយយើងនឹងប្រជុំ បន្ទាប់មកយើងកំណត់ពេលវេលាជាក់លាក់មួយ ចាំសិនអូន យើងមិនទាន់និយាយបាន"។

តាមពិតទៅទម្រាំដល់ពេលអនុវត្តន៍ច្បាប់ចរាចរណ៍ គឺប័ណ្ណបើកបរចាស់ដែលមានរយៈពេល ៥ ឆ្នាំ គឺផុតសុពលភាពល្មម ហើយពួកគាត់នឹងត្រូវទៅធ្វើថ្មីតែម្ដង។ "ខ្ញុំសូមលើកឧទាហរណ៍ថា កាលពីពួកគាត់ធ្វើប័ណ្ណ ៥ ឆ្នាំ ហើយខ្លះនៅសល់ពេលពី ២-៣ ឆ្នាំអីហ្នឹង ហើយទម្រាំដល់ចប់ការផ្សព្វផ្សាយអប់រំពីច្បាប់ចរាចរណ៍ថ្មី គឺពួកគាត់អស់សុពលភាពល្មម ហើយត្រូវមកធ្វើប័ណ្ណថ្មី គឺប័ណ្ណថ្មីមានរយៈពេល ១០ឆ្នាំ សម្រាប់ឡានតូច ឯឡានធំ គឺមានរយៈពេល ៥ ឆ្នាំប៉ុណ្ណោះ"។ លោក ពៅ ម៉ាលី និយាយ។

ដើមឡើយអ្នកបើកបរបានកាន់ប័ណ្ណបើកបរអចិន្រ្ដៃយ៍ បន្ទាប់មកប័ណ្ណដែលគិតចាប់ពីពេលធ្វើរហូតដល់អាយុ ៦០ ឆ្នាំ ទើបផុតកំណត់ ប៉ុន្ដែប័ណ្ណទាំងនោះក្រសួងបានស្នើឲ្យមកធ្វើថ្មីមានរយៈពេល ៥ ឆ្នាំ។ ប៉ុន្ដែ ប័ណ្ណចាស់ដែលកាន់អចិន្ដ្រៃយ៍ និង ប័ណ្ណអស់សុពលភាពត្រឹមអាយុ ៦០ ឆ្នាំ រហូតមកទល់នឹងពេលនេះ គឺមានមនុស្សតិចតួចមកផ្លាស់ប្ដូរប័ណ្ណ។ នេះបើតាមការលើកឡើងរបស់ លោក ពៅ ម៉ាលី។

ការផ្លាស់ប្ដូរប័ណ្ណចាស់មកជាថ្មី លោក ពៅ ម៉ាលី បានបញ្ជាក់ថា អ្នកបើកបរនឹងរអ៊ូរទាំចំពោះការអស់ថវិកាខ្លះប៉ុន្តែ លោកបានស្នើឲ្យមានការយោគយល់ និង ចូលរួមទាំងអស់គ្នា ក្នុងការអនុវត្តច្បាប់។ ដើម្បីផ្លាស់ប្ដូរប័ណ្ណ គឺ ម្ចាស់ប័ណ្ណគ្រាន់តែភ្ជាប់ប័ណ្ណចាស់របស់ខ្លួន និង សំបុត្រពេទ្យបញ្ជាក់អំពីសុខភាពហើយទៅកាន់មន្ទីរខេត្ត-ក្រុង ឬ អគ្គនាយកដ្ឋានដឹកជញ្ជូន ទីដែលធ្លាប់ធ្វើ និង ចេញប័ណ្ណ ដើម្បីស្នើសុំផ្លាស់ប្ដូរប័ណ្ណគឺជាការស្រេច។ "ចំពោះថវិកាអស់ប៉ុន្មានខ្ញុំមិនបានចាំទេ គ្រាន់តែខ្ញុំដឹងថា វាមិនអស់ច្រើនដូចពេលរៀន និង ប្រឡងយកប័ណ្ណបើកបរនោះទេ មួយទៀតនៅទីតាំងទាំងនោះបានភ្ជាប់សេវាតម្លៃរួចជាស្រេច"។ លោក ពៅ ម៉ាលី បន្ថែម។

លោកបានឲ្យដឹងទៀតថា ការធ្វើប័ណ្ណបើកបរថ្មី គឺងាយស្រួលនៅក្នុងការគ្រប់គ្រងក៏ដូចជា អនុវត្តន៍ច្បាប់ ព្រោះប័ណ្ណថ្មីនេះ គឺប្រើប្រាស់តែមួយដោយមិនបាច់មានប័ណ្ណបើកបរម៉ូតូ។ "ខ្ញុំលើកឧទាហរណ៍កន្លងទៅ នគរបាលចរាចរណ៍បានផាក ឬ ព្យួរទុកប័ណ្ណបើកបរម៉ូតូទៅតាមទោសកំហុស ប៉ុន្តែ ពួកគេមានប័ណ្ណបើកបរឡាន គឺនៅតែធ្វើចរាចរណ៍ដដែល"។ ម៉្លោះហើយប័ណ្ណថ្មីនេះ គឺគ្រាន់តែព្យួរទុកមួយរួចជាការស្រេច ដោយអ្នកបើកបរមិនអាចបើកបាននោះទេ។

យ៉ាងណាមិញគេនៅមិនទាន់ដឹងថា ច្បាប់ចរាចរណ៍ថ្មី នឹងដាក់ទោសទៅលើអ្នកបើកបរយានជំនិះគ្មានប័ណ្ណ ឬ ក្នុងរយៈពេលព្យួរទុកនៅឡើយទេ ប៉ុន្ដែ បើយោងតាមច្បាប់ចរាចរណ៍ផ្លូវគោក ឆ្នាំ ២០០៧ ចាស់ គឺ នៅត្រង់មាត្រា ៧៤ ចែងថា ជនណាបើកបរយានដោយគ្មានប័ណ្ណបើកបរ ឬ ក្នុងរយៈពេលដែលប័ណ្ណបើកបរត្រូវដកហូតព្យួរទុក ឬ ទុកជាមោឃៈ ត្រូវផ្ដន្ទាទោសដាក់ពន្ធនាគារពីប្រាំមួយថ្ងៃ (៦) ថ្ងៃ ទៅមួយ (១) ខែ ឬ/ និង ពិន័យជាប្រាក់ពី ពីរម៉ឺនប្រាំពាន់រៀល (២៥.០០០) រៀល ទៅម្ភៃម៉ឺន (២០០.០០០) រៀល។

ក្នុងឆ្នាំ ២០១៣ កន្លងទៅ អ្នកបើកបរបានមករៀន និង ប្រឡងយកប័ណ្ណបើកបរសរុបចំនួន ២ សែន ៨ ម៉ឺន នាក់។ ក្នុងចំណោម តួលេខនេះ មាន ១០ % ទទួលបានប័ណ្ណបើកបរម៉ូតូ។ នេះបើតាមការបញ្ជាក់ពី លោក ពៅ ម៉ាលី អគ្គលេខាធិការរង គណៈកម្មាធិការជាតិសុវត្ថិភាពចរាចរណ៍ផ្លូវគោកប្រាប់ឲ្យដឹង។ តួលេខឆ្នាំ ២០១៤ លោក ពៅ ម៉ាលី បានបញ្ជាក់ថា នៅមិនទាន់បូកសរុបនៅឡើយ៕

អត្ថបទ៖ ប៊ិន ប៊ុណ្ណា