សំឡឹងបកក្រោយ សិល្បករ-សិល្បការិនីខ្មែរ មួយចំនួនខាតបង់រាប់ពាន់ម៉ឺនដុល្លារ

2015-01-12 17:39:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំ២០១៥ ទើបបានឈានជើងចូលមកបានប៉ុន្មានថ្ងៃ មិនទាន់មានអ្វីកើតឡើងគួរឲ្យកត់សម្គាល់លើសិល្បករ សិល្បការិនីឡើយ។ ប៉ុន្តែក្រឡេកទៅឆ្នាំចាស់ ២០១៤ ដែលទើបអូសជើងផុតនេះ មានសិល្បករ សិល្បការិនីយើងខ្លះជួបគ្រោះចោរកម្មអស់ប្រាប់រាប់រយរាប់ពាន់ដុល្លារសហរដ្ឋអាមេរិក។ តើពួកគេមាននរណាខ្លះ...តោះតាមដាន៖

លោក បញ្ញាសិទ្ធ ៖ តារាចម្រៀងរូបនេះ បានបើកឆាកករណីបាត់បង់ទ្រព្យមុនគេក្នុងចំណោមសិល្បករក្នុងឆ្នាំ២០១៤កន្លងទៅ។ លោក បញ្ញាសិទ្ធ បានបាត់បង់រថយន្តរបស់ខ្លួនកាលពីថ្ងៃទី១៧ កក្កដា ពេលដែលចតចោលនៅមុខផ្ទះរបស់លោក មានអាសយដ្ឋាននៅសង្កាត់ទឹកល្អក់២ ខ័ណ្ឌទួលគោក ម្តុំសាលារៀនសន្ធរម៉ុក។

រថយន្តរបស់លោក បញ្ញាសិទ្ធ ដែលត្រូវចោរលួចគាស់សោយកទៅបាត់នោះ ម៉ាកឆ្លាម ពណ៌ខ្មៅ ស៊េរី ៩៩ មានស្លាកលេខ ២H ៧២៩៨៕

វី ជីវ័ន៖ តារាសម្ដែងសក់សំពោងរូបនេះ ជាបុគ្គលបន្ទាប់ក្នុងជួរសិល្បករដែលជួបគ្រោះចោរកម្ម។ កាលពីយប់ថ្ងៃទី ២៧ ខែសីហា កន្លងទៅនៅសង្កាត់ ភ្នំពេញថ្មី ខណ្ឌ សែនសុខ។ គ្រានោះ លោក ជីវ័ន បានស្រវឹងយ៉ាងខ្លាំង ក្រោយចូលរួមពិធីជប់លៀងរបស់មិត្តភ័ក្ដិហើយបានទទួលទានស្រាពីរបីកែវ។ លោកបើកបររថយន្តមកឈប់នៅលើផ្លូវក្នុងភូមិសាស្ត្រខាងលើ ហើយក៏បានលង់លក់ទៅ។ បន្ទាប់ពីនោះ មានជនមិនស្គាល់មុខបានបើកទ្វាររថយន្តលួចយកសម្ភាររបស់លោករួមមាន ទូរសព្ទដៃពីរគ្រឿង iPad មួយគ្រឿង និងឯកសារមួយចំនួនទៀត សរុបជាទឹកជាង១ពាន់ដុល្លារសហរដ្ឋអាមេរិក។

តារាសម្ដែងរូបនេះដាក់ការសង្ស័យថា ទំនងជាមានអ្នកដាក់ថ្នាំសណ្ដំក្នុងកែវស្រាចង់ធ្វើបាប ទើបធ្វើធ្វើឱ្យលោកបាត់បង់ស្មារតីដូច្នេះ ខណៈរាល់ដងលោកលើកឡើងថា ញ៉ាំស្រាច្រើនជាងនេះពីរទៅបីដងទៀត ប៉ុន្តែមិនដែលមានបញ្ហាឡើយ។

ពេជ្រ អាវីហ្សា ៖ កញ្ញា ពេជ្រ អាវីហ្សា បានបិទទំព័រឆ្នាំ ២០១៤ ក្នុងនាមជាបុគ្គលក្នុងសង្គមសិល្បៈចុងក្រោយគេដែលជួបរឿងចោរកម្ម។ កញ្ញា បានបាត់រថយន្តម៉ាកឡិចស៊ីស RX300 មួយគ្រឿង កាលពីថ្ងៃទី ១៣ តុលា នៅមុខហាងស៊ុបយីហោ"ស៊ុបគោ៤០" ស្ថិតក្នុងសង្កាត់ផ្សារថ្មីទី១ ខណ្ឌដូនពេញ ។ នៅថ្ងៃនោះ ប្អូនប្រុសកញ្ញា ពេជ្រ អាវីហ្សា បានបើករថយន្ត ម៉ាកឡិចស៊ីស RX300របស់នាងដឹកក្រុមគ្រួសារទៅទទួលទានស៊ុបនៅហាងស៊ុបខាងលើ ដោយចតរថយន្តនៅចិញ្ចើមផ្លូវទល់មុខហាង លុះចេញមកវិញ ក៏បានរថយន្តតែម្ដង។

អាវីហ្សា បានដាក់ពាក្យបណ្ដឹងភ្លាមទៅសមត្ថកិច្ចដើម្បីជួយរករថយន្តរបស់នាងវិញ។ ប៉ុន្តែមកដល់ពេលនេះ រថយន្តទំនើបរបស់នាងមិនទាន់រកឃើញនៅឡើយ៕