ហេតុការណ៍គ្រោះថ្នាក់បំផុតនឹកស្មានមិនដល់កើតឡើងក្នុងពេលសាងសង់ស្ពានអ្នកលឿង

2015-01-14 17:39:22
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋមន្ត្រីក្រសួងសាធារណៈការ និង ដឹកជញ្ជូន លោក ត្រាំ អ៊ីវតឹក ថ្លែងក្នុងពិធីចាក់បេតុងភ្ជាប់ស្ពានអ្នកលឿង កាលពីព្រឹកមិញនេះថា នៅក្នុងពេលសាងសង់ស្ពានអ្នកលឿងនេះ ក្រុមការងារយើងបានជួបប្រទះនូវឧបសគ្គ និងការលំបាកមួយចំនួន ដោយសារតែទីតាំងសាងសង់ស្ពានស្ថិតចំអតីតឃ្លាំងគ្រាប់ ដែលបន្សល់ទុកពីសម័យសង្គ្រាម កាលពីឆ្នាំ ១៩៧០-១៩៧៥។

ឯកឧត្ដម ថ្លែងទៀតថា៖ មុនពេលសាងសង់ កងកម្លាំងមជ្ឈមណ្ឌលជាតិគ្រប់គ្រងកំលាំងរក្សាសន្តិភាពបោសសំអាតមីន និង កាកសំណល់សង្គ្រាម បានរុករកយុទ្ធភ័ណ្ឌមិនទាន់ផ្ទុះបានជាង ៤០០០ គ្រាប់ ទាំងនៅលើដី និង ក្នុងទន្លេ។

នៅថ្ងៃទី ១៦ ខែកក្កដា ឆ្នាំ២០១២ ខណៈកំពុងខួងសសរគ្រឹះនៅត្រើយខាងកើត យើងបានជួបប្រទះនូវឧបទ្ទវហេតុផ្ទុះគ្រាប់ប្រភេទប្រឆាំងរថក្រោះ នៅក្នុងដី ជម្រៅ ២៦,៥ម៉ែត្រ ប៉ុន្តែ មិនបានបណ្ដាលឲ្យមានគ្រោះថ្នាក់ដល់បុគ្គលិក កម្មករយើងទេ គ្រាន់តែប៉ះពាល់ដល់ពេលវេលា និង កម្មវិធីសាងសង់ត្រង់សសរដែលផ្ទុះនោះរហូតដល់ជាង ៤ ខែ។ ក្រៅពីនោះ ទឹកជំនន់ក្នុងឆ្នាំ ២០១១-២០១២ ក៏ជាឧបសគ្គធំក្នុងការសាងសងស្ពានអ្នកលឿងនេះដែរ។ លោក រដ្ឋមន្ត្រី បញ្ជាក់ដូច្នេះ។

ស្ពានអ្នកលឿង មានប្រវែង ២,២២០ ម៉ែត្រ ជាស្ពានខ្សែកាបយោងទី១ ដែលវែងជាងគេនៅប្រទេសកម្ពុជា នឹងត្រូវតភ្ជាប់បេតុងនៅថ្ងៃនេះ។ ស្ពាននេះមានទទឹងប្រវែង ១៣ ម៉ែត្រ និង មានកម្ពស់ផុតពីផ្ទៃទឹកនៅរដូវវស្សា ៣៧,៥ ម៉ែត្រ គឺបានចំណាយថវិកាសាងសង់ ១២៧ លានដុល្លារអាមេរិក ជាជំនួយឥតសំណងរបស់រាជរដ្ឋាភិបាលជប៉ុន ក្នុងនោះប្រាក់បដិភាគរបស់រាជរដ្ឋាភិបាលកម្ពុជា ២លាន៦សែនដុល្លារ៕