មហិច្ឆតាសម្បើម De5inite របស់ខ្មែរធ្វើតែបទចម្រៀងចំណាយចាប់ពី៥ពាន់ដុល្លារឡើងទៅ!

2014-10-02 17:54:07
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមលោក ចាន់ណា រ៉ូណាន ប្រធានក្រុមតារាចម្រៀង De5inite បានឲ្យដឹងថា លោកនឹងចំណាយទុនខ្ពស់ចាប់ពី ៥០០០ដុល្លារឡើងទៅឯណោះសម្រាប់ផលិតវីដេអូចម្រៀងមួយបទ ដោយផ្ដោតខ្លាំងលើគុណភាពតែម្ដង។

តួលេខនេះ បើតាមការខ្សឹបប្រាប់ពីប្រភពម្នាក់ គឺខ្ពស់ជាងគេ ខណៈផលិតកម្មផ្សេងទៀត ចំណាយខ្ទង់ ១០០០ដុល្លារ ឬខ្ពស់ជាងនេះបន្តិចបន្តួចប៉ុណ្ណោះ លើការធ្វើវីដេអូចម្រៀងមួយបទ។ បទ "Photo” គឺជាឧទាហរណ៍ជាក់ស្ដែងមួយ ដែលតាមលោក រ៉ូណាន គឺបានប្រើប្រាស់ការចំណាយខ្ទង់៥០០០ដុល្លារនេះរួចហើយ។ បទនេះ ជាប្រភេទបទញាក់ និយាយអំពីភាពសំខាន់ ក៏ដូចជាគុណប្រយោជន៍របស់ "រូបថត" ឬ "Photo” ហើយត្រៀមចេញក្នុងរយៈពេលមិនយូរខាងមុខ។

តាមលោក រ៉ូណាន បទនេះឆ្លុះបង្ហាញច្រើនសម័យកាល មានទាំងបច្ចុប្បន្ន សម័យឧត្ដុង្គ លង្វែក ជាដើម រួមទាំងជួលអ្នករាំដែលមានជំនាញច្បាស់លាស់ល្អៗ ចំណាយលើសម្ភារផ្សេងៗ និងចំណាយលើការប្រើបច្ចេកទេសទំនើបៗច្រើនទៀត ទើបធ្វើឲ្យការចំណាយអស់ច្រើនដូច្នេះ។

យ៉ាងណា សិល្បករមកពីខេត្តបន្ទាយមានជ័យរូបនេះ ប្រាប់ថា មិនជាបញ្ហាឡើយ ដោយសារថា ពួកលោករកបានអ្នកឧបត្ថម្ភធំៗមួយចំនួនសម្រាប់ដាក់ក្នុងបទចម្រៀងនេះរួចហើយ សម្រាប់ជួយទ្រទ្រង់លើការចំណាយ។

ក្រុម De5init (រូបថត Facebook Rich Kids Media)

ជាមួយនឹងការតាំងចិត្តមុតមាំលើការផលិតបទចម្រៀងមានគុណភាពនេះ លោក ចាន់ណា រ៉ូណាន ប្រាប់បន្ថែមថា ចាប់ពីពេលនេះទៅ ក្រុម De5inite របស់លោកនឹងធ្វើតែបទ Original ប៉ុណ្ណោះ ហើយក៏មិនធ្វើដែរក្នុង១ឆ្នាំ។ "ដូចនៅស្រុកគេអីចឹង យើងអត់ធ្វើច្រើនទេ គឺធ្វើតែមួយបទចំណាយទុនខ្ពស់ ហើយធ្វើយកគុណភាពល្អតែម្ដង"។

De5inite គឺក្រុមតារាចម្រៀងរបស់ផលិតកម្ម Rich Kids Media ដែលមានសាខានៅប្រទេសម៉ាឡេស៊ី ថៃ និងកម្ពុជា។ មិនត្រឹមតែបទចម្រៀង ផលិតកម្មថ្មីមួយនេះ មានផែនការផលិតភាពយន្តមានគុណភាពបន្ថែមទៀតដែរ៕

អត្ថបទស្ដីពីតន្ត្រីជាតិផ្សេងៗទៀត មាននៅទីនេះ...!!!

តាមដានព័ត៌មានពីសកម្មភាពតារាជាតិផ្សេងទៀត មាននៅទីនេះ…!

អត្ថបទ៖ ទារិកា