កូនឈិន ឡុងបន្ទោសឪពុកថា ធ្វើឱ្យធ្លាក់ខ្លួនប្រើគ្រឿងញៀន

2015-01-15 00:39:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយតុលាការកាត់ទោសឱ្យជាប់ពន្ធនាគារ៦ខែ Jaycee Chan បានបង្ហាញភាពអស់សង្ឃឹម ហើយស្ដីបន្ទោស ឈិន ឡុង ដែលជាឪពុកថា មិនបានបារម្ភ និងមើលថែខ្លួនឱ្យបានល្អ ជាហេតុធ្វើឱ្យខ្លួនធ្លាក់ក្នុងសង្គមគ្រឿងញៀន។

កាលពីទីថ្ងៃ៩ ខែមករា Jaycee ត្រូវតុលាការចិន កាត់ទោសឱ្យជាប់ពន្ធនាគារ៦ខែ ពីបទប្រើប្រាស់គ្រឿងញឿន ហើយនៅថ្ងៃស្ដាប់សាលក្រមចុងក្រោយ ឈិន ឡុង និង Joan Lin ជាឪពុកម្ដាយ មិនមានវត្តមានឡើយ។

តារាចម្រៀង និងសម្ដែងខាងលើ បានបន្ទោសទៀតថា ហេតុតែភាពប្រងើយកន្តើយ និងមិនចេះមើលថែរបស់ឪពុក ទើបធ្វើឱ្យខ្លួន ធ្លាក់ចូល ក្នុងហ្វូងមនុស្សអាក្រក់ និងមានទម្លាប់មិនល្អយ៉ាងដូច្នេះ។

ក្រោយមក Jaycee បានសរសេរសំបុត្រវែងបីច្បាប់ទៅអ្នកស្រី Joan ជាម្ដាយ។ អ្នកលេងហ្គីតាវ័យ៣២ឆ្នាំពន្យល់ថា លោកធ្លាក់ក្នុងសភាពបែបនេះ ព្រោះតែលោកនៅប្រមូលផ្ដុំជាមួយហ្វូងមនុស្សអាក្រក់ ហើយចាប់ផ្ដើមប្រើគ្រឿងញៀន ដើម្បីសម្រួលអារម្មណ៍ ពេលខូចចិត្ត។

Jaycee ក៏បានសរសេររៀបរាប់ពីបញ្ហាប្រឈមក្នុងគ្រួសារល្បីល្បាញផងដែរ។ លោកថា ភាពល្បីល្បាញ បានដាក់សម្ពោធខ្លាំងលើរូបលោក និងបានបង្ហាញក្ដីមិនសប្បាយចិត្តចំពោះ ឈិន ឡុង ដែលមិនព្រួយឱ្យដល់ខ្លួន។ ទោះយ៉ាងណា Jaycee ក៏ដឹងដែរថា ឪពុកម្ដាយខំប្រឹងជួយលោកដែរ។ ចំពោះទង្វើនេះ លោកក៏បានបង្ហាញអារម្មណ៍សោកស្ដាយ និងសន្យាទៅម្ដាយថា នឹងផ្លាស់ប្ដូរជីវិតថ្មី។

ជុំវិញរឿងនេះ អ្នកគ្រប់គ្រងរបស់ Jaycee លោក Steven បានដាក់ការសង្ស័យលើអត្ថន័យសំបុត្រនោះថា មានអ្នកក្លែងបន្លំដោយនិយាយថា "មិនអាចទៅរួចទេ! Jaycee មិនដែលធ្វើការឆ្លើយតប ទាំងគ្មានទំនួលខុសត្រូវអីចឹងឡើយ។ បន្ថែមលើនេះ រាល់សំបុត្រដែលគាត់សរសេរ ត្រូវឆ្លងកាត់ការត្រួតពិនិត្យ របស់មេធាវីសិន...ទាំងនេះជាសំបុត្រក្លែងក្លាយ"៕

ប្រែសម្រួល៖ អ៊ុំ សុភក្តិ ប្រភព៖ jaynestars.